ދިވެހިރާއްޖެ ޑިޖިޓަލައިޒް ކުރުމަށް ފަށާފައިވާ "ދިވެހިރާއްޖެ 2.0" ގެ ދަށުން ދައުލަތުގެ މުވައްޒިފުންގެ ތެރެއިން ތިންބައިކުޅަ އެއްބައި މުވައްޒިފުން ގޭގައި ތިބެެގެން މަސައްކަތް ކުރާ ގޮތަކަށް ބަދަލު ކުރަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ނަސަންދުރާ ބާސެލޯސް ގައި މިރޭ ފެށި "މޯލްޑިވްސް 2.0 ސަމިޓް" ހުޅުވުމުގެ ރަސްމިއްޔާތު ޝަރަފުވެރިކޮށް ދެއްވާ ވާހަކަފުޅު ދައްކަވަމުންނެވެ. ރައީސް ވިދާޅުވީ ރާއްޖެ ޑިޖިޓަލައިޒް ކުރުމަށް ފަށާފައިވާ "ދިވެހިރާއްޖެ 2.0" ގެ ދަށުން ގެންނާނެ އެއް ބަދަލަކީ އޮފީސްތަކުގައި ތިބެގެން ޚިދުމަތްދޭން ތިބޭ މީހުންގެ އަދަދު މަދުކުރުން ކަމަށެވެ.

އެ ގޮތުން 2028 ވަނަ އަހަރު އަންނަންވާއިރަށް ގެންނާނެ ބަދަލެއްގެ އަމާޒު އެމަނިކުފާނު ވިދާޅުވި އެވެ.

Advertisement

"...2028 ވަނަ އަހަރު ފެށޭ ހިސާބުން މުޅި ދައުލަތުގައި މިހާރު ޚިދުމަތުގައި މަސައްކަތް ކުރަމުންދާ 49,000 މުވައްޒިފުންގެ ތެރެއިން ތިންބައިކުޅަ އެއްބައި މީހުން ކަނޑައެޅޭ ވަކި އުސޫލެއްގެ ދަށުން ވޯކް ފްރަމް ހޯމް -- ގޭގައި ތިބެެގެން މަސައްކަތް ކުރާ ގޮތަކަށް ބަދަލު ކުރުން," ރައީސް ވިދާޅުވި އެވެ.

މިރޭ ފެށި "މޯލްޑިވްސް 2.0 ސައިޓް" ހުޅުވުމުގެ ރަސްމިއްޔާތު 

މި ބަދަލާއެކު 16,000 ވުރެ ގިނަ މުވައްޒިފުން ގޭަގައި ތިބެގެން މަސައްކަތް ކުރާ ގޮތަކަށް ބަދަލުކުރާނެ އެވެ. ރައީސް ވިދާޅުވީ އެ މުވައްޒިފުން އެގޮތަށް މަސައްކަތް ކުރާނީ އުސޫލެއްގެ ތެރެއިން ހަފްތާއަކު ވަކި މިންވަރެއް އޮފީހަށް ނިކުމެ މަސައްކަތް ކުރަން ޖެހޭ ގޮތަށް ކަމަށެވެ.

އެ ބަދަލާއެކު މުޅި ގައުމަށް ހެޔޮ ބަދަލުތަކެއް އަންނާނެ ކަން ފާހަގަ ކުރެއްވި އެވެ. އެ ބަދަލާއެކު ނަތީޖާ ރަނގަޅުވެ ރައްޔިތުންގެ ހައްގުތައްް އިތުރަށް ކަށަވަރު ކުރެވޭނެ ކަމަށް ވިދާޅުވި އެވެ. ރައީސް ވިދާޅުވި ގޮތުގައި ރާއްޖެ ޑިޖިޓަލައިޒް ކުރުމަށް ފަށާފައިވާ "ދިވެހިރާއްޖެ 2.0" ގެ ދަށުން އެންމެ އިސްކަން ދޭނީ ކޮރަޕްޝަން ނައްތާލުމަށް ކަމަށެވެ. އެކަން ކުރުމަށް ޚިދުމަތުގެ ނިޒާމު ވަރުގަދަކޮށް ޑިޖިޓަލައިޒް ކުރުން ވަރަށް މުހިންމު ކަމަށެވެ.