ޑިޖިޓަލް ދާއިރާއިން ރާއްޖެ އިންގިލާބީ އަދި އިސްލާހީ ބަދަލުތަކަކާ ދިމާލަށް ގެންދިއުމަށް މޯލްޑިވްސް 2.0 އިފްތިތާހުކޮށް ސަމިޓް ފަށައިފި އެވެ.

މޯލްޑިވްސް 2.0 ސަމިޓް އިފްތިތާހުކޮށް ދެއްވީ މިރޭ ނަސަންދުރާ ބާސެލޯސް ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ސަރުކާރުން ބުނީ މިއީ މޯލްޑިވްސް 2.0 އަކީ މުޅި ދައުލަތުގެ ހުރިހާ މުއައްސަސާތައް ގުޅިގެން މަސައްކަތްކޮށް ޑިޖިޓަލް ދާއިރާއިން ރާއްޖެ އިންގީލާބީ އަދި އިސްލާހީ ބަދަލުތަކަކާ ދިމާލަށް ގެންދިއުމަށް އިފްތިތާހްކުރާ ޕްރޮގްރާމެއް ކަމަށެވެ.

އަދި މިއީ ސަރުކާރުގެ ޑިޖިޓަލް ޓްރާންސްފޮމޭޝަން ސިޔާސަތު ތަންފީޒުކުރުމަށް ކުރިއަށް އޮތް ތިން އަހަރަށް ހިންގާނެ މަޝްރޫއެއް ކަމަށެވެ. މިއީ ސަރުކާރު މިހާރަށްވުރެ "ސްމާޓް"ކޮށް، ހަލުވި ހިދުމަތް ދިނުމަށާއި، ކޮރަޕްޝަން ނައްތާލައި، ދެފުށް ފެންނަ ގޮތަށް ޓެކްނޮލޮޖީގެ އެހީގައި ހިންގުން ބަދަލުކުރުމަށް ހިންގަން ފަށާ މަޝްރޫއުއެއް ކަމަށެވެ.

މޯލްޑިވްސް 2.0 އިފްތިތާހުކޮށް ސަމިޓް ފެށުން -- ފޮޓޯ: ރައީސް އޮފީސް

މި މަޝްރޫއުން ތަންފީޒު ކުރެވޭ އިސްލާހީ މަސައްކަތްތަކާއެކު ފިޒިކަލް އަދި ޑިޖިޓަލް ކިއުތަކުގެ ބަދަލުގައި މަދު ކްލިކްތަކަކުން ހިދުމަތް ލިބޭނެ ގޮތަށް ހިދުމަތްތައް ފަރުމާކުރެވޭނެ އެެވެ. މީގެ އިތުރުން ހިންގުމުގައި އަދި ހިދުމަތް ހޯދުމުގައި ވަކިވެފައިވާ ރަށްތަކެއްގެ ވިސްނުމާއި ހިދުމަތް ދިނުމަށް ވަކި ވަކި ނިޒާމުތެއް ގެންގުޅޭކަމުގެ އިހުސާސްގެ ބަދަލުގައި، ގުޅިފައިވާ ވިއުގައަކުން ހިދުމަތް ލިބޭ ގައުމެއް ގޮތަށް ރައްޔިތުންގެ އިހްސާސްތަކާއި ތަޖްރިބާ ބަދަލުކުރެވޭނެ އެވެ.

އަދި ހިދުމަތްތައް ލިބުމުގައި ލަސްވާ ލަސްވުމަށް ފަރުވާ ހޯދައި، އަވަސް ހިދުމަތެއް ފޯރުކޮށްދެވޭނެ އެވެ. މީގެ އިތުރުން ނަތީޖާ ނެރުމަށް އިސްކަން ދިނުމާއެކު ހިދުމަތް ހޯދުމުގައި ކަންކަންވާންވީ ގޮތް ނޭނގޭ ގޮތަށް އޮންނަ އޮތުން ބަދަލުކޮށް ދެފުށްފެންނަ ހުޅުވާލެވިފައިވާ ހިދުމަތް ދިނުމުގެ ނިޒާމެއް ބައްޓަން ކުރެވޭނެ އެވެ.

މިރޭގެ ސަމިޓްގައި މޯލްޑިވްސް 2.0 މިހިނދަށް ބޭނުންވާ ސަބަބުތަކާއި މޯލްޑިވްސް 2.0 ގެ މައި އަސާސްތަކާއި މޯލްޑިވްސް 2.0 އެ މައްޗަށް ބިނާވެފައިވާ ތަނބުތަކުގެ ތަފްސީލު ހިއްސާ ކޮށްފައިވެ އެވެ.