ކުޑަކުދިންގެ ދުވަހާ ގުޅިގެން ހުޅުމާލެ ފޭސް 2 ހިޔާ ޕާކުގައި މިއަދު އޮންނަ ކުޑަކުދިންގެ ހަވީރުގައި، ކުޑަކުދިންގެ މެދުގައި މަޤުބޫލުކަން ހޯދާފައިވާ، ރޮބޯމޭން ބައިވެރިވާނެ ކަމަށް އެ އިވެންޓް އިންތިޒާމްކުރާ ޓީމުން ބުނެފިއެވެ.

މި ހަވީރަކީ މިއަހަރުގެ ކުޑަކުދިންގެ ދުވަސް ފާހަގަކުރުމުގެ ގޮތުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަދި އުރީދޫ ގުޅިގެން ކުރިއަށް ގެންދާ ޚާއްޞަ ހަރަކާތެކެވެ.

މިއަދުގ ހަވީރު 4:00 އިން 6:00 އަށް ހުޅުމާލެ ފޭސް 2 ހިޔާ ޕާކު އަދި ރުއްގަނޑު ސަރަހައްދުގައި ކުރިއަށް ގެންދާ ކުޑަކުދިންގެ ހަވީރުގައި ރޮބޯމޭންގެ ގިނަ ހަރަކާތްތަކެއް ކުރިޔަށްދާނެ ކަމަށް ސޯޝަލް މިނިސްޓްރީއިން ވަނީ ބުނެފައެވެ. އޭގެ ތެރޭގައި ކުދިންނާއެކު އުފާވެރި ވަގުތުކޮޅެއް ހޭދަކުރުމާއި، ރޮބޯމޭނާއެކު ފޮޓޯ ނެގުމުގެ ފުރުޞަތު ހިމެނެއެވެ. އަދި މި ހަވީރުގައި ބައިވެރިވާ ކޮންމެ ކުއްޖަކަށް ހަދިޔާއެއް ލިބޭނެ ކަމަށް މިނިސްޓްރީން ބުނެއެވެ.

ރޮބޯމޭންގެ އިތުރުން، ކުދިން ޝައުޤުވެރިވާނެ ގިނަ ކުޅިވަރުތަކެއް މި ހަވީރުގައި ހިމެނޭނެއެވެ. މީގެ ތެރޭގައި ބައުންސިން ކާސަލް، ވޮކްއަމޯލް، ފޯމް ޕާޓީ އަދި ހޯސް ރައިޑިންގ ފަދަ ކުޅިވަރުތައް ހިމެނެއެވެ. މީގެ އިތުރުންވެސް ކުދިންނަށް އުފާވެރިކަން ގެނެސްދޭނެ އެހެނިހެން ކުޅިވަރުތައް މި ހަވީރުގައި ހިމެނޭނެ ކަމަށް ބުނެފައިވެއެވެ.

ސޯޝަލް މިނިސްޓްރީ އަދި އެޗްޑީސީންވެސް ބުނެފައިވަނީ މިއަހަރުގެ ކުޑަކުދިންގެ ދުވަސް ފާހަގަކުރުމަށް ބާއްވާ ހަވީރަކީ ކުދިންނަށް ވަރަށް އުފާވެރިކަން ގެނެސްދޭނެ އަދި ތަފާތު ތަޖުރިބާތަކެއް ލިބިގެންދާނެ ޚާއްސަ ހަވީރަކަށް ވެގެންދާނެކަމަށެވެ. އަދި ވީހާވެސް ގިނަ ކުދިން އާއިލާތަކާއެކު މި ހަރަކާތުގައި ބައިވެރިކޮށްދިނުމަށް އެ ފަރާތުންވަނީ އެފިދައެވެ.