ކޮރަޕްޝަން ނައްތާލުމަށް ސަރުކާރުން ފަށާފައިވާ މަސައްކަތްތަކުގައި ޒިންމާދާރުކަމާއެކު ބައިވެރިވުމަށް އިދިކޮޅު ސިޔާސީ ފަރާތްތަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ގޮވާލައްވައިފިއެވެ.

ޑިޖިޓަލް ޤައުމަކަށް ރާއްޖެ ހެދުމަށް ކުރަމުންގެންދާ މަސައްކަތުގެ ދަށުން ސަރުކާރުން ރޭ ވަނީ މޯލްޑިވްސް 2.0 މަޝްރޫޢު ރަސްމީކޮށް އިފްތިތާހުކޮށްފައެވެ. ރާއްޖެ ޑިޖިޓަލް ޤައުމަކަށް ހެއްދެވުމުގެ މައިގަނޑު ބޭނުމަކީ ކޮރަޕްޝަނުގެ ވަބާ މި ޤައުމުން ފުހެލުންކަމަށް ރައީސް ރޭ ވަނީ ވިދާޅުވެފައެވެ.

މޯލްޑިވްސް 2.0 އާ ގުޅޭގޮތުން އިދިކޮޅު ފަރާތްތަކުން ސޯޝަލް މީޑިއާގެ އެކި ވަސީލަތްތަކުގައި ދަނީ ސަރުކާރަށް ވަރަށްބޮޑަށް ފާޑުކިޔަމުންނެވެ. މިކަމާ ގުޅިގެން ސޯޝަލް މީޑިއާގައި ރައީސް ޑރ.މުއިއްޒު ކުރެއްވި ޕޯސްޓެއްގައި ވަނީ، ކޮރަޕްޝަން ނައްތާލުމަށް މަސައްކަތެއް ފަށާއިރަށް، ސިޔާސީ އިދިކޮޅު ފަރާތްތަކުން އެކަމާ ދެކޮޅު ހަދަނީ ކީއްވެ ކަމަށް ސުވާލު ކުރައްވާފައެވެ.

ރޭ އިފްތިތާހް ކުރެވިގެންދިޔަ މި ސަރުކާރުގެ ތަސައްވަރު ސާފުކޮށްދެއްވަމުން ރައީސް ޑރ.މުއިއްޒު ވިދާޅުވީ، މޯލްޑިވްސް 2.0 އަކީ ދައުލަތުގެ ނިޒާމުގެ ތެރެއިން ކޮރަޕްޝަން ނައްތާލަން އެޅޭ އެންމެ ބޮޑު ފިޔަވަޅުކަމަށެވެ. މިއީ ކޮންމެ ރައްޔިތަކަށް އެ ރައްޔިތެއްގެ މަޢުލޫމާތު (ޑޭޓާ) ގެ ފުރިހަމަ ކޮންޓްރޯލާއި ބާރުވެރިކަން ލިއްބައިދޭ ނިޒާމުކަން ފާހަގަކުރައްވަމުން ރައީސް ވިދާޅުވީ، މިއީ ދެ ފުށް ފެންނަ، އަވަސް، ލުއި ފަސޭހަ، ޚިދުމަތުގެ ފެންވަރު މަތީ ނިޒާމެއް ކަމަށެވެ.

ރައީސް ވިދާޅުވީ މި ނިޒާމު އައުމާއެކު ކޮރަޕްޝަން މަދު ޤައުމުތަކުގެ ލިސްޓުގައި ރާއްޖެ އެތައް ދަރަޖައެއް މަތިވެގެންދާނޭ ކަމަށެވެ.  އަދި ޕްރެސް ފްރީޑަމް އިންޑެކްސްގައި ވެސް ރާއްޖެ އެތައް ދަރަޖައެއް މަތިވެގެންދާނޭ ނިޒާމްކަން ފާހަގަކުރައްވައި ރައީސް ވިދާޅުވީ، މިއީ ރައްޔިތުން އެދޭ އަމާޒުކަމަށެވެ. މި އަމާޒަށް ވާސިލް ވުމަށް ކުރާ ދަތުރުގައި، އަޅުގަނޑުމެން ކުރިޔަށް ދާނީ ރައްޔިތުންނާ ގާތުން، ރައްޔިތުންނާ އެކު ކަމަށެވެ. އެގޮތުން މި ދަތުރުގައި ޒިންމާދާރުކަމާއެކު ބައިވެރިވުމަށް ސިޔާސީ އިދިކޮޅު ފަރާތްތަކަށް ރައީސް ޑރ.މުއިއްޒު ވަނީ ގޮވާލައްވާފައެވެ.

ސަރުކާރުން ރޭ އިފްތިތާހުކުރި މޯލްޑިވްސް 2.0 އާ ގުޅޭގޮތުން އެމްޑީޕީގެ ރައީސް ޢަބްދުﷲ ޝާހިދު އަދި ކުރީ ސަރުކާރުގެ ކުޅިވަރާ ބެހޭ ވަޒީރު އަހުމަދު މަހްލޫފް ވިދާޅުވެފައިވަނީ، ދައުލަތުގެ ހުރިހާ މުއައްސަސާތައް ޑިޖިޓަލައިޒް ކުރުމުގެ ނަމުގައި ރޭ ފެށި ކަމަކީ، އިލެކްޓްރޯނިކް ވޯޓިން ތައާރަފްކޮށް އިންތިހާބު އޮޅުވާލުމަށް ފެށި މަސައްކަތެއް ކަމަށެވެ.