ކޮރަޕްޓް ސިޔާސީ މީހުން ގިނަވުމަކީ، ކޮރަޕްޝަން ހުއްޓުވުމަށް އޮތް ގޮންޖެހުމެއްކަމަށް ލޯކަލް ގަވަރނަންސް މިނިސްޓަރު އާދަމް ޝަރީފް ވިދާޅުވެއްޖެއެވެ.

ރައީސް ޑރ.މުހައްމަދު މުއިއްޒު ރާއްޖެ ޑިޖިޓަލް ކުރުމަށް އިއްޔެ ފެށި މޯލްޑިވްސް 2.0 އާ ގުޅިގެން އިދިކޮޅު ސިޔާސީ ބައެއް ފަރާތްތަކުން ކިޔަމުންގެންދާ ފާޑުކިޔުންތަކާ ގުޅިގެން ރައީސް ޑރ.މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވަނީ ކޮރަޕްޝަން ނައްތާލުމަށް މަސައްކަތެއް ފަށާއިރަށް، ސިޔާސީ އިދިކޮޅު ފަރާތްތަކުން އެކަމާ ދެކޮޅު ހަދަނީ ކީއްވެ ކަމަށް ސުވާލު ކުރައްވާފައެވެ.

ރައީސްގެ ޕޯސްޓް ޝެއާކުރައްވައި އާދަމް ޝަރީފް ވިދާޅުވީ، ކޮރަޕްޝަނާ ދެކޮޅަށް ރާއްޖެ މަސައްކަތް ކުރުމަކީ އުއްމީދު އާލާވާ ކަމެއް ކަމަށާއި، ކޮރަޕްޝަން މަދުކުރުމަށް އޮތް އެންމެބޮޑު ގޮންޖެހުމަކީ ކޮރަޕްޓްވެފައިތިބި ސިޔާސީ މީހުން ގިނަވުމާއި ސިސްޓަމްތައް ކޮރަޕްޓްވުން ކަމަށެވެ. މިިސްޓަރު އާދަމް ޝަރީފް ވިދާޅުވީ، މި ސަރުކާރުން ކޮރަޕްޝަން މަދުކުރާނޭކަން ޔަގީންކަމަށެވެ.

މޯލްޑިވްސް 2.0 އިފްތިތާހް ކުރުމުގެ ރަސްމިއްޔާތުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވެފައިވަނީ، މުޖްތަމައުގެ ތެރޭގައި އޮތް އެންމެ ބޮޑު ވަބާ އަކީ ކޮރަޕްޝަން ކަމަށާ ރާއްޖެ ޑިޖިޓަލައިޒް ކުރުމުގެ އެންމެ ބޮޑު ބޭނުމަކީ އެ ވަބާ ނައްތާލުން ކަމަށެވެ. ރައީސް ވިދާޅުވީ، ހިދުމަތް ދިނުމުން ފެށިގެން ގޮސް ހުރިހާ ދިމާއެއްގައި ކޮރަޕްޝަންގެ ނުރައްކާ އެބަ އޮތް ކަމަށެވެ. އަދި މިހާރު ހިނގަމުންދާ ގޮތް ބަދަލުނުކޮށް އެކަން ރަނގަޅު ކުރެވެން ނެތް ކަމަށް އެމަނިކުފާނު ވަނީ ވިދާޅުވެފައެވެ.

މޯލްޑިވްސް 2.0 ވުޖޫދުވުމާއެކު ދައުލަތުގެ ހިދުމަތްތައް ޑިޖިޓަލްކޮށް އެއް ފުރާޅެއްގެ ދަށުން ދެވޭނެއެވެ. މި ނިޒާމުގެ ދަށުން ހަމަހަމަކަމާއެކު ސަރުކާރުގެ ހިދުމަތްތައް ހޯދުމަށް މަގުފަހިވެގެންދާއިރު، ވަކި ރައްޔިތެއް އިސްތިސްނާ ކުރުމެއްނެތި އަދި ވަކި ރައްޔިތަކަށް ވަކި ހާއްސަކަމެއްނެތި ހިދުމަތްތައް ދިނުމަށް މަގުފަހިވެގެންދާނެއެވެ. ނަމަވެސް ޑިޖިޓަލްކޮށް ސަރުކާރުގެ ހިދުމަތްތައް ދޭއިރުވެސް ހާއްސަ އެހީއަށް ބޭނުންވާ މީހުންނާއި އުމުރުން ދުވަސްވީ މީހުންނަށް ކުރިންވެސް އޮންނަ ހާއްސަ އުސޫލްތަކުގެ ތެރެއިން ހިދުމަތްތައް ލިބިގެންދާނެކަމަށް ސަރުކާރުން ފާހަގަކުރެއެވެ.