ފިޒިއޯ ކްލިނިކަށް ތެރަޕީ ނަގަންދިޔަ ކުއްޖަކަށް އަނިޔާކުރި މައްސަލާގައި އެ ކުލިނިކް ވަގުތީ ގޮތުން ބަންދުކޮށް މުވައްޒިފުންނަށް ފިޔަވަޅު އަޅާފައިވާ ކަމަށް ބުނެފި އެވެ.
މި މަހުގެ ފަސްވަނަ ދުވަހު ހުޅުމާލޭގައި ހުންނަ ކްލިނިކަކަށް ތެރަޕީ ނަގަންދިޔަ ކުއްޖަކަށް ޖިސްމާނީ ގޮތުން އަނިޔާ ވެދާނެ ގޮތަކަށް އަމަލު ކޮށްފައިވާ ކަމަށް ތުހުމަތު ކުރެވޭ މައްސަލައެއް ހުށައެޅި ފުލުހުން ދަނީ ތަހުގީގު ކުރަމުންނެވެ.
އެ މައްސަލައާ ގުޅިގެން އެ ކުލިނިކުން ވަނީ ފޭސްބުކްގައި އެ ކްލިނިކްގެ އެކައުންޓުން ސްޓޭޓްމަންޓެއް އާންމުކޮށްފަ އެވެ. އެ ސްޓޭޓްމަންޓްގައި ބުނެފައި ވަނީ އެ މައްސަލަ ސަމާލުކަމަށް އައި ހިސާބުން ވަގުތުން ފިޔަވަޅު އެޅި ކަމަށެވެ. އަދި ކުއްޖާއަށް އަނިޔާވާފަދަ އަމަލެއް ކުރި މުވައްޒިފާއި އެ ވަގުތު އެެތަނުގައި ހުރި މުވައްޒިފު ވަޒީފާއިން ވަކިކޮށްފައިވާ ކަމަށެވެ.
މި މައްސަލަ ވަރަށް ސީރިއަސް މައްސަލައެއް ގޮތުގައި އެ ކްލިނިކުން ދެކޭ ކަމަށާ މައްސަލަ ބަލަން ވަގުތު ދިނުމުގެ ގޮތުން ވަގުތީ ގޮތުން ކްލިނިކް ބަންދު ކޮށްފައިވާ ކަމަށް ވެސް ވަނީ ބުނެފަ އެވެ.
އަދި އެ މައްސަލަ އެނގުނު ހިސާބުން ފުލުހުންގެ ސަމާލު ކަމަށް ގެނެސް އެ މައްސަލަ އާ ގުޅޭ ތަހުގީގަށް ސީސީޓީވީ ފްޓޭޖް ހަވާލުކޮށްފައިވާ ކަމަށް ވެސް ބުންޏެވެ. ކްލިނިކުން ބުނީ އެ މައްސަލައިގެ ތަހުގީގަށް ފުރިހަމަ އެއްބާރުލުން ދޭނެ ކަމަށެވެ.
Advertisement
This content is created and paid for by advertisers and does not involve Voice Journalists
