މިއަދަކީ ނަރުހުންގެ ދުވަހެވެ. ރެއާއި އިއްޔެ ވަރަށް ގިނަ ޓީވީ ޗެނަލްތަކުގެ ގިނަ ޕްރަގްރާމްތައް ހާއްސަ ކޮށްފައި އޮތީ ނަރުހުންނަށެވެ. ނަރުހުންގެ ހިދުމަތަށެވެ. ނަރުހުންގެ ދުވަހާއި ގުޅިގެން ކުރިއަށް ގެންދާ ތަފާތު ޕްރަގްރާމްތަކާއި ހަރަކާތްތަކުގެ މައުލޫމާތު ދިނުމަށެވެ.

އެ ޕްރޮގްރާމްތަކުގެ ތެރެއިން "މެންދުރު" ޓީވީން ގެނެސްދިން ޕްރަގްރާމެއްގައި އައިޖީއެމްއެޗްގެ ރަޖިސްޓާޑް ނާސް އަހްމަދު އަމާން ވަނީ ނަރުހުންގެ ދުވަހެއް ފާހަގަ ކުރުމުން ނަރުހެއްގެ ހައިސިއްޔަތުން ކުރެވޭ އިހްސާސްތައް ކިޔައިދީފަ އެވެ. އެ ޕްރޮގްރާމްގައި އަމާން ދެއްކި އެ ވާހަކަތައް އެ ޓީވީގެ ސޯޝަލް މީޑިއާ ޕްލެޓްފޯމްގައި ވަކީން ހިއްސާކުރި އެވެ.

އަމާން ބައިވެރިވި އެ ޕްރޮގްރާމް ބެލީ މަދު ބައެއް ނަމަވެސް އޭނާގެ ވާހަކަތައް ހިމަނައި ހިއްސާކުރި ކުރު ވީޑިއޯކޮޅު ވަރަށް ބޮޑަށް ވައިރަލްވި އެވެ. 24 ގަޑިއިރު ނުވަނީސް ލައްކައަކަށް ވުރެ ގިނަ މީހުން އެ ވީޑިއޯ ބެލި އެވެ.

އެ ވީޑިއޯ ބެލި މީހުންގެ ތެރެއިން ވަރަށް ގިނަ ބަޔަކު އެކި ވާހަކަތައް ހިމަނައި ކޮމެންޓް ކޮށްފައިވެ އެވެ. ފުރަތަމަ މުޅިން ވެސް ކޮށްފައި ހުރީ ވަރަށް ނެގެޓިވް ކޮމެންޓްތަކެވެ. ވަރަށް ޒާތީ, ދެރަވަރު ކޮމެންޓްތަކެވެ. އަމާން ވާހަކަ ދައްކާ ގޮތާމެދު ފުރައްސާރަކޮށް ކޮށްފައިވާ ކޮމެންޓްތަކެވެ. އެ ނޫންވެސް ވަރަށް ހުތުރު ކޮމެންޓްތައް ވެސް ކޮށްފައި ހުއްޓެވެ.

ބައެއް މީހުން އެ ކޮމެންޓްތަކަށް ލާފް ރިއެކްޓްކޮށް އެ ވާހަކަތަކާ ބައިވެރިވެފައިވެ އެވެ.

ނަމަވެސް އަމާންގެ ދިފާއުގައި އޭނާގެ މަންމަ ތެދުވެ އެ ވީޑިއޯއަށް ކުރި ކޮމެންޓާއެކު ފުރައްސާރައިގެ ކޮމެންޓްތަކަށް ނިމުން އައެވެ. ދެން ފުލުފުލުގައި އަންނަން ފެށީ ޕޮޒިޓިވް ކޮމެންޓްތަކެވެ.

އަމާންގެ މަންމަ, ރާބިއާ މުހައްމަދު, އޭނާގެ ދަރިފުޅާމެދު އިންތިހާއަށް ފަހުރުވެެރިވެ އެވެ. ދަރިފުޅު މިއަދު ގޮސްފައިވާ ހިސާބާމެދު އުފާކުރެ އެވެ. ރާބިއާ ބުނި ގޮތުގައި އޭނާގެ ދަރިފުޅު މިއަދު ހުރި މަގާމަށް ގޮސް އެ ހުރީ ވަރަށް ސާބިތު ކަމާއެކު އެވެ. މީހަކު ކިޔާފާނެ އެއްޗަކަށް ބެލުމެއް ނެތި އެވެ. އަދި މީހުން ދިމާކޮށް ފުރައްސާރަ ނުކުރާނެ ކަމަކަށް ބަލައިގެނެއްވެސް ނޫނެވެ. 

ގޮތެއް ނެތް މީހުންގެ ފުރައްސާރަ އައިމަންއަށް ކުރިމަތިވާނެ ކަން ރާބިއާ އަބަދުވެސް ދަނެ އެވެ.

އެެހެންވީމަ އޭނާގެ ދަރިފުޅަށް ފުރައްސާރަކޮށް ކޮށްފައިވާ ކޮމެންޓްތަކުން ރާބިއާ ހައިރާނެއް ނުވެ އެވެ. އެފަދަ ކަންކަން ކުރާނެ މީހުން މި މުޖްތަމައުގައި އުޅޭކަން އެ ދެމައިން ވެސް ރަނގަޅަށް ދަނެ އެވެ.

ރާބިއާ އިތުރަށް ބުނެފައިވަނީ ބުލީ ކުރުމަކީ އަމާން އަށް އާ ކަމެއް ނޫންކަމަށެވެ. އެއީ އަމާން މާކުރީން ފެށިގެން ތަޖުރިބާ ކޮށްފައިވާ ހިތި އެހެނަސް ހަގީގަތެވެ. އަދި މިއަދު ހުރި ހިސާބަށް އޭނާ ދިޔައީ ބުލީ ކުރުމާއި ހަނގާކުރުމާ ދެކޮޅަށް ހަނގުރާމަ ކުރަމުން ކަމަށް ރާބިއާ ބުންޏެވެ.

ރާބިއާއަށް އޭނާގެ ދަރިފުޅާ މެދު ފުރިހަމަ އިތުބާރު އެބަ އޮތެވެ. އޭނާ ބުނާ ގޮތުން އެފަދަ ފުރައްސާރަ އިން މިއަދު އަމާން ފަހަތަށް ނުޖެއްސޭނެ އެވެ. ހަރުބަހެއް ބޭނުން ކޮށް ރާބިއާ ބުނީ ފުރިފައި ހުރި އެއްޗެއް ގުޑުގުޑެއް ނާޅާނެ ކަމަށެވެ.

އޭނާގެ މި ކޮމެންޓަށް އެކަނިވެސް 1،200 މީހުން ލައިކް ކޮށްފަ އެވެ. އަދި ދަރިފުޅަށް ކުރި ފުރައްސާރައާ ދެކޮޅަށް މަންމަ ނިކުމެ ދެއްކި ހިތްވަރު އެތައް ބަޔަކު ފާހަގަކޮށްފައިވެ އެވެ.

އަދި ބުލީ ކުރާ މީހުން ފަހަތަށް ޖެއްސޭނީ ހިތްވަރާއެކު އެހެން މީހުން ނިކުމެ އެ މީހުންގެ ވާހަކަތަކާއި ދެކޮޅަށް ސާބިތުކަމާއެކު ރައްދު ދިނުމުން ކަން ފާހަގަކޮށް ބައެއް މީހުން ކޮމެންޓް ކޮށްފައިވެ އެވެ.

ބައެއް މީހުން, ފުރައްސާރަ ކުރަނީ އެއީ ވަރަށް އާދައިގެ ކަމެއް ކަމުގައި ދެކިގެންނެވެ. ބައެއް ފަހަރު އެތައް ބަޔަކު އެކުވެ އެ މީހުން ހިތްހަމަ ނުޖެހޭ ކުއްޖަކު / މީހަކު ބުލީގެ ޝިކާރައަކަށް ހަދާލާ އެވެ. 

މިއީ ސުކޫލު މާހައުލާއި މުޅި މުޖްތަމައުގައި ވެސް އޮތް ބޮޑު ބަލިމަޑުކަމެކެވެ. މިކަން އޮތީ ވަކި ބައެއްގެ ތެރޭގައޭ ވެސް ނުބުނެވޭ ވަރަށް މި ބަލިމަޑުކަން އޮތީ ބޮޑުވެފަ އެވެ. 

ބުލީ ކުރުމަކީ ސަޅި ކަމެއް ނޫނެވެ. އަދި ކިއެއްތަ! އެއީ އިންތިހާ ނުރައްކާތެރި ކަމެކެވެ. އެކަމުގެ އާހިރު ނަތީޖާ އިން މީހަކު މި ދުނިޔެއާ ވަކިކޮށްލާފަދަ ނުރައްކާތެރި ކަމެކެވެ. ބުލީގެ ޝިކާރައަށް ވެ އެތައް ކުދިންނެއްގެ ކިޔެވުން ވަނީ ގެއްލިފަ އެވެ. އެތައް ބަޔަކު ތިބީ ވަޒީފާ ދޫކޮށް ގޭގަ އެވެ. މުޖްތަމައުއަށް ނިކުންނަން ބިރުގަންނަ ދަރަޖައަށް ގޮސްފައިވާ އެތައް ބަޔަކު އެބަ ތިއްބެވެ. ބުލީގެ ސަބަބުން ނަަފްސާނީ ބަލީގެ ޝިކާރައަށް ހުށައެޅި އަމިއްލަ ނަފްސާއި ދިިރިއުޅުމާމެދު އިތުބާރު ގެއްލި މާޔޫސްވެ ހަޔާތާއިމެދު އުންމީދު ގެއްލިފައިވާ އެތައް ބަޔަކު އެބަ ތިއްބެވެ.

ބައެއް މީހުން، އެ މީހުންގެ އަމިއްލަ ނަފްސަށް ގެއްލުންދީފައިވެސް ވެ އެވެ.

އެހެން ކަމުން ތިމާއާ އެ ހާލަތު ބައްދަލުކުރުމުގެ ކުރީން ނުވަތަ ހިތާމަވެރި ހާދިސާއެއް މެދުވެރިވުމުގެ ކުރީން ބުލީ ކުުރުން ހުއްޓާލަން ޖެހެ އެވެ. ތިމާގެ ފަރާތުން އެހެން މީހަކަށް ފުރައްސާރަ ނުކުރުމަށް އަޒުމް ކަނޑައަޅަން ޖެހެ އެވެ.

ހިތްވަރާއެކު މުޖްތަމައުއަށް ނިކުމެ ޒިންމާދާރު މަގާމުތަކުގައި ތިބެ ގައުމާއި ރައްޔިތުންނަށް ހިދުމަތް ކުރަމުންދާ އަމާން ފަދަ ކޮންމެ މީހަކަށް ހިތްވަރު ދޭން ޖެހެ އެވެ. އެންމެންގެ ސިފަ އެއްގޮތެއް ނުވާނެ އެވެ. އަޑު އެއްގޮތެއް ނުވާނެ އެވެ. ކުރާ މަސައްކަތް ވެސް އެއްގޮތެއް ނުވާނެ އެވެ.

އެ ތަފާތު ތަކާއެކު އަހަރެމެން އެންމެންނަކީ އިންސާނުން ކަމާއި މުސްލިމުން ކަމުގައި ދެކި މި ނުބައި އާދަ ދޫކޮށްލަން ޖެހެ އެވެ.