މަތީ ތަޢުލީމަށް ސަރުކާރުން ދޫކުރާ ލޯނުގެ އެހީގައި ކިޔެވުމަށްފަހު އެ ލޯނު އަނބުރާ ދައްކަނީ %40 ކުދިންކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން ވަނީ، ސަރުކާރުން މިހާތަނަށް ލޯނު ދޫކޮށްފައިވާ ދަރިވަރުންގެ އަދަދާއި އެތަނުން ގަވާއިދުން ދައްކަނީ ކިހާ ކުދިންނެއްތޯ ވަޒީރު ހައިދަރާ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ހައިދަރު ވިދާޅުވީ، މި އަހަރުގެ އޭޕްރީލް މަހުގެ ނިޔަލަށް 157 މިލިއަން ރުފިޔާ ސްޓޫޑެންޓް ލޯނުގެ ގޮތުގައި ދޫކޮށްފައިވާ ކަމަށެވެ.

Advertisement

އަދި ލޯނު ފައިސާ އަނބުރާ ދެއްކުމުގައި ގިނަ މައްސަލަތަކެއް ހުންނަ ކަމަށާ ބަރާބަރަށް ހަމައަށް ލޯނުފައިސާ ދައްކާ ކުދިންގެ އަދަދު މަދު ކަމަށް ވަޒީރު ފާހަގަކުރެއްވިއެވެ.

މަތީ ތަޢުލީމާއި ތަމްރީން ހާސިލްކުރުމަށްޓަކައި ދަރިވަރުންނަށް ދޫކުރާ ލޯނު އަދާކުރަން ފަށަންޖެހެނީ ކިޔަވާ ނިމުމަށްފަހު 6 މަސް ފަހުންނެވެ.

މީގެ ކުރިން މަތީ ތަޢުލީމަށް ދޫކުރާ ލޯނުތައް ދައްކަން ޖެހެނީ ލޯނާއެކު ހިމެނިފައިވާ %1 އެޑްމިނިސްޓްރޭޓިވް ފީއާ އެކުގައެވެ. ނަމަވެސް ރައީސް ޑރ މުޙައްމަދު މުޢިއްޒު ވަނީ، އެ ލޯނު ތަކަކީ އިސްލާމީ ހަމަތަކަށް ފެތޭ ލޯންތަކަކަށް ހެއްދެވުމަށް ނިންމަވައި އެޑްމިނިސްޓްރޭޓިވް ފީގެ ގޮތުގައި ނަގަމުންދާ އަދަދު އެއްކޮށް އުނިކުރެއްވުމަށް ނިންމަވާފައެޗެ. އަދި، ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ޗާޖް ނުކުރުމަށް އެމަނިކުފާނު ވަނީ ނިންމަވާފައެވެ.