ޑްރޯންތަކަށް އަމާޒުކޮށްގެން ހަމަލާދޭ، އަގުހެޔޮ މިސައިލް ސިސްޓަމެއް އިންޑިއާއިން ޓެސްޓްކޮށްފިއެވެ.

ސޯލަރ ޑިފެންސް އެންޑް އެއަރޯސްޕޭސް ލިމިޓެޑުން އުފެއްދި މި ކައުންޓަރ ޑްރޯން ސިސްޓަމް އިއްޔެ ގޯޕާލްޕޫރުގައި ހުންނަ ސީވޯޑް ފަޔަރިންގ ރޭންޖްގައި ޓެސްޓްކޮށްފައިވެއެވެ. އިންޑިއާގެ އާމީގެ އިސް އޮފިސަރުންގެ ހާޒިރުގައި އިއްޔެ ކުރިއަށްގެންދިޔަ ޓެސްޓްތައް ވަރަށް ކާމިޔާބުކަމަށް އެކުންފުނިން ވަނީ ބުނެފައެވެ.

އިންޑިއާއިން ގެންދަނީ އެގައުމުގައި އަމިއްލައަށް އުފައްދާ، އަމިއްލަ ޓެކްނޮލޮޖީތައް އަސްކަރިއްޔާއަށް ގެނައުމަށް ޚާއްސަ އިސްކަމެއް ދެމުންނެވެ. ވަކިން ޚާއްސަކޮށް އަސްކަރީ ޓެކްނޮލޮޖީ އުފައްދާ ކުންފުނިތަކާއެކު އިންޑިއާގެ އަސްކަރިއްޔާއިން ޚާއްސަ ގުޅުންތަކެއް ވަނީ އުފައްދާފައެވެ.

ޑްރޯނަށް އަމާޒުކޮށް ހަމަލާދޭ މިސައިލް ސިސްޓަމެއް އިންޑިއާއިން އަނެއްކާވެސް ޓެސްޓްކޮށްފައި މިވަނީ އިންޑިއާއާއި ޕާކިސްތާނާ ދެމެދު އަސްކަރީ ކުރިމަތިލުންތަކެއް ހިނގައި، ދެގައުމުގެ މެދުގައި މަސްރަހު ހޫނުވެފައިވާ ދަނޑިވަޅެއްގައެވެ.