މަޖިލިސް މެންބަރުންގެ އަދަދު މިހާރަަށްވުރެ އިތުރު ނުކުރެވޭނެ ގޮތަށް ގާނޫނު އިސްލާޙް ކުރައްވާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައްޔިތުންނާއެކު ޕޮޑްކާސްޓްގައި ވާހަކަދައްކަވަމުން ރައީސް މުޢިއްޒު ވިދާޅުވީ، އައު ގާނޫނު އަސާސީގެ ދަށުން މަޖިލިސް ފެށިގެން އައި އިރު ތިބީ 77 މެންބަރުން ކަމަށެވެ. އަދި އާބާދީ އާއެކު ދާއިރާތައް އިތުރުވެ، މިހާރުގެ މަޖިލީހުގައި 93 މެންބަރުން ތިބިކަން އެމަނިކުފާނު ފާހަގަކުރެއްވިއެވެ.
77 މެންބަރުންވެސް ގިނަ. އެކަމަކު ރައްޔިތުން ރިޕްރެޒެންޓްވެސް ކުރެވެންވާނެ. އެހެންވީމާ އަޅުގަނޑު މިނހުށަހަޅާ އިސްލާޙަކީ ދެން ހިނގާށޭ އިތުރު ނުވާނޭ ގޮތަށް ގާނޫނަށް އިސްލާހު ގެންނަން. 93 އަކީ އަދަދު ކަމަށް. އެއަށްވުރެ ގިނަ ނުވާނޭ. އެހެންވީމާ 93 އަށް ލިމިޓް ކުރާ ގޮތަށް ގާނޫނު އިސްލާޙު ކުރާ ގޮތަށް ވާނީ ނިންމާފަ. އެގޮތަށް ހުށަހަޅާނަން.
ރައީސް ޑރ މުޙައްމަދު މުޢިއްޒު
ރައްޔިތުންނާއެކު ޕޮޑްކާސްޓްގެ ތެރެއިން: ފޮޓޯ/ ރައީސް އޮފީސް
މީގެ އިތުރުން ސިޓީ ކައުންސިލް ތަކާއި، އެއްރަށޭއްގައި ގިނަ ދާއިރާތައް އޮންނަ ކައުންސިލް ތަކުގައި އާބާދީ އިތުރުވާ ވަރަށް ދާއިރާތައް އިތުރުވާކަން ފާހަގަކުރައްވައި ރައީސް ވަނީ މިހާރަށްވުރެ ކައުންސިލް ތަކުގެ ދާއިރާތަކާއި ކައުންސިލަރުންގެ އަދަދު އިތުރު ނުވާނެ ގޮތަށް ގާނޫނު އިސްލާހް ކުރައްވަން ނިންމަވާފައިވާ ކަމަށްވެސް ވިދާޅުވެފައެވެ.
ހަމަ އެހެންމެ އަތޮޅު ކައުންސިލްތައް އުވާލައި، 2000 އަށްވުރެ އާބާދީ މަދު ރަށްރަށުގައި 3 ކައުންސިލަރުން ތިބޭ ގޮތަށް، އަދި އެއަށްވުރެ އާބާދީ ގިނަ ނަމަ 5 ކައުންސިލަރުން ތިބޭ ގޮތަށް ގާނޫނު އިސްލާޙް ގެނައުމަށް ނިންމަވާފައިވާ ކަމަށް ރައީސް ވަނީ ވިދާޅުވެފައެވެ.
އެފަދައިން ކަން ކުރުމުން ކައުންސިލް ތަކުގެ ހިންގުން ހަރުދަނާވެ، ކައުންސިލަރުންވެސް އިތުރަށް މަސައްކަތަށް ފަރުވާތެރިވާނެ ކަމަށް އެމަނިކުފާނު ވިދާޅުވިއެވެ. އެހެނީ، މަދު އާބާދީ ހުންނަ ބައެއް ރަށްރަށުގެ ކައުންސިލަރުން ކައުންސިލްގައި ކުރާނެ ކަމެއް ނެތި އަމިއްލަ މަސައްކަތުގައި އުޅޭ ކަމުގެ ޝަކުވާތައްވެސް ރައްޔިތުން ކުރާކަން ރައީސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
