އަމީނަށް އިތުބާރު އޮތް ކަަމަށް ފާސްކޮށްފި
ޓްރާސްޕޯޓް މިނިސްޓަރު މުހައްމަދު އަމީނަށް އިތުބާރު އޮތް ކަމަށް ރައްޔިތުންގެ މަޖިލީހުން ދެންމެ ފާސްކޮށްފި އެވެ.
މިދިޔަ މަހުގެ 18 ވަނަ ދުވަހުގެ ރޭ ހިނގި ހާދިސާއާ ގުޅިގެން އަމީންގެ އިތުބާރު ނެތް ކަމަށް ހުށައަޅާފައި ވަނީ އިދިކޮޅު އެމްޑީޕީންނެވެ. އެމްޑީޕީން ބުނީ މިނިސްޓަރަކު ކޮށްގެން ނުވާނެ ކަންތައްތަކެއްގެ ވާހަކަ ގާނޫނު އަސާސީގައި ބަޔާންކޮށްފައިވާ ކަމަށާ އޭގެ ތެރެއިން ވަރަށް ގިނަ ކަންކަން އަމީން ކުރައްވާފައިވާ ކަމަށެވެ.
އަމީނަށް އިތުބާރު އޮތްތޯ ބެލުމަށް ދެންމެ ނެގި ވޯޓްގައި އިތުބާރު އޮތް ކަަމަށް 54 މެންބަރުން ވަނީ ވޯޓް ދެއްވާފަ އެވެ. އިތުބާރު ނެތް ކަމަށް ވޯޓް ދެއްވީ 11 މެންބަރުންނެވެ.
ޔުމްނު ވެއްޓުނު މައްސަލައާ ގުޅިގެން އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅުއްވާފައިވާ އަމީންގެ އިތުބާރު ނެތް ކަމުގެ މައްސަލައިގައި މަޖިލީހަށް ހާޒިރުވެވަޑައިގެން ވާހަކަ ދައްކަވަމުން ވިދާޅުވީ، އެ މައްސަލާގައި އޭނާގެ ތިމާގެ މީހަކަށް ތުހުމަތު ކުރެވޭ ކަމަށް މިހާތަނަށް ތަހުގީގީ އިދާރާތަކުން ހާމަކޮށްފައި ނުވާ ކަމަށެވެ.
އަމީން ވިދާޅުވީ، މއ. މާންދޫގެ ދެކުނު އަކީ އޭނާ އެކަނި ދިރިއުޅޭ ގެ ނޫން ކަމަށެވެ. އަދި އެތަނަކީ އޭނާގެ އިތުރުން އިތުރު ތިން މީހެއްގެ ނަން މަތީގައިވާ ތަނެއް ކަމަށާ އެހެންކަމުން އެ އިމާރާތުގައި ކުރެވޭ ކުށެއްގެ ޒިންމާ އޭނާ ވަކި މަގާމެއްގައި ހުރުމުން ނަގަންޖެހޭ ކަަމަށް ދެކުމަކީ ބުއްދި ގަބޫލު ކުރެވޭ ކަމެއް ނޫން ކަމަށް އަމީން ވިދާޅުވުއެވެ.
އެ ހާދިސާއާ ގުޅިގެން ބައެއް ކަންކަން އަމީން ސިއްރުކުރައްވާފައިވާ ކަމަށް މައްސަލައިގައި ބުނެފައިވާއިރު، ކަމެއް ސިއްރުކޮށްފައި ވާކަމަށް ވިދާޅުވާ ނަމަ، އެކަމެއް އަދި ސިއްރުކުރަން ކުރި ކަމެއް ސާފުކޮށްދެއްވަންވާނެ ކަމަށް ގަބޫލު ކުރައްވާކަމަށެވެ.
މީގެ އިތުރުން، ޔުމްނު ވެއްޓުނު ހާދިސާއާއި ގުޅުވައި އަމީންގެ ތިމާގެ ނުވަތަ ޢާއިލީ މަޞްލަޙަތު ހިމެނޭ ފަރާތެއް ބައިވެރިވާ ކަމުގެ ތުހުމަތު ވެސް އެއްވެސް އިދާރާއަކުން ކޮށްފައި ނެތީސް އެފަދަ އިދާރާއަކުން ކުރާ ތަޙުޤީޤަކަށް ނުފޫޒު ފޯރުވަންޖެހޭ ސަބަބެއް ނެތް ކަމަށްވެސް އަމީން ވަނީ ވިދާޅުވެފައެވެ.
"ބަހުސްގެ ބޭނުމަށް ބެލި ނަމަވެސް ނެތް. ބަހުސްގެ ބޭނުމަށް އެ ހާދިސާއަށް އަޅުގަނޑުގެ ތިމާގެ ނުވަތަ ޢާއިލީ މަޞްލަޙަތު އޮތް ފަރާތަކާ ގުޅުވި ނަމަވެސް، އެއީ ބޮޑެތި މީހުން. އަމިއްލަ ކަންކަމަށް އަމިއްލައަށް ޒިންމާ ނަގަންޖެހޭ ފަރާތްތައް. އަޅުގަނޑުގެ ދަރިންނެއް ނޫން އަޅުގަނޑުގެ އަތްބެއް ނޫން. އަޅުގަނޑުގެ މައިންބަފައިންނެއް ނޫން. އަދި އަޅުގަނޑު ބަލަހައްޓާ ފަރާތެއް ވެސް ނޫން"، އަމީން ވިދާޅުވިއެވެ.
ހަމަ އެހެންމެ، ޔުމްނު ވެއްޓުނު މައްސަލައިގައި ކުރީގެ ފުލުސް ކޮމިޝަނަރު އަލީ ޝުޖާއަށް އަމީން ގުޅުއްވި ކަމަށާ، ކޮމިޝަނަރަށް ގުޅުއްވީ އޭނާ ދިރިއުޅުއްވާ ގެކޮޅަށް ފުލުހުން އަންނަން ކޯޓު އަމުރެއް ބޭނުންނުވާނެ ވާހަކަ ދަންނަވަން ކަމަށް އަމީން ވިދާޅުވިއެވެ. ނަމަވެސް ޝުޖާޢު ފޯނު ނުނެންގެވި ކަމަށް އަމީން ވިދާޅުވިއެވެ.
އަމީން ވިދާޅުވި ގޮތުގައި މި މައްސަލައާ ގުޅިގެން އޭނާއަށް ކުރަނީ އެއްވެސް އަސާސެއް ނެތް ތުހުމަތުތަކެއް ކަމަށެވެ.
Advertisement
This content is created and paid for by advertisers and does not involve Voice Journalists