ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރު ނިންމާ މެންބަރުންް ޗުއްޓީ ފަށައިފި އެވެ.

މަޖިލީހުގެ މިއަދުގެ ޖަލްސާ ނިންމަވާލައްވަމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެކަން އިއުލާނު ކުރައްވާފަ އެވެ.

އަބްދުއްރަހީމް ވަނީ މި ދައުރުގެ މަސައްކަތްތަކުގެ ބައެއް ތަފްސީލު ވެސް ހިއްސާ ކުރައްވާފަ އެވެ. ވިދާޅުވީ ފުރަތަމަ ދައުރުގައި 32 ޖަލްސާ ބޭއްވުނު ކަމަށެވެ. އެ ޖަލްސާތަކުގައި މެންބަރުން ވަނީ 59 ގަޑިއިރު ހޭދަ ކުރައްވާފަ އެވެ.

Advertisement

މި ދައުރުގައި ކޮމެޓީތަކުގެ 193 ބައްދަލްވުން ބޭއްވި އެވެ. ކޮމެޓީ ބައްދަލްވުންތަކުގައި މެންބަރުން ވަނީ 139 ގަޑިއިރާއި 30 މިނެޓް ހޭދަ ކުރައްވާފައި ކަަމަށް އަބްދުއްރަހީމް ވިދާޅުވި އެވެ.

މީގެ އިތުުރުން މި ދައުރުގައި ނުވަ ބިލެއްގެ މަސައްކަތް ނިންމާ ފާސްކޮށްފައިވެ އެވެ. އޭގެ ތެރޭގައި އިމިގްރޭޝަންގެ ގާނޫނަށް ގެނައި އިސްލާހުގެ ބިލާއި ދުންފަތް ކޮންޓްރޯލް ކުރުމުގެ ގާނޫނު އިސްލާހު ކުރުން އަދި ގޭންގު ކުށްތައް ހުއްޓުވުމުގެ ބިލް ވަނީ ފާހަގަ ކުރައްވާފަ އެވެ.

މަޖިލީހަށް ހުށައެޅުނު މަސައްކަތުގެ 73 އިންސައްތަ މަސައްކަތް ނިންމާފައިވާ ކަމަށް އަބްދުއްރަހީމް ވިދާޅުވި އެެވެ. އަބްދުއްރަހީމް ވަނީ މަޖިލީހުގެ މަސައްކަތްތަކަށް މެންބަރުން ދެއްވި އަހަންމިއްޔަތު ފާހަގަ ކުރައްވާފަ އެވެ.