ކުޑަ ދަރިފުޅާއެކު ޕާކަށް ދިޔައީ ހަފްތާ ބަންދުގައި އެ ދަރިފުޅަށް އުފާވެރި ވަގުތުކޮޅެއް ހޭދަކޮށްލުމުގެ ފުރުސަތު ހޯދާ ދިނުމަށެވެ. ޕާކަށް ވަދެވުމާ އެެކު ދޮށީ އަންހެން ދަރިފުޅާއި ހަގު ދަރިފުޅު ކުޅިވަރުގައި މަސްއޫލުވި އެވެ. އެ ވަގުތު ދަންނަ ރައްޓެއްސަކަށް ފެނިގެން އައިސް ވާހަކަ ދައްކަން ފެށި އެވެ.

އެކަމަކު އޭނާ ސުވާލުކުރީ އަހަރެންގެ ހާލަތާއި ގުޅޭގޮތަކުންނެވެ. ކުދީންގެ ކަންކަން ރަނގަޅުތޯ އެއް ނޫނެވެ. ދިރިއުޅުމުގެ ކަންކަމާ މެދުގަ އެއް ނޫނެވެ. އޭނާ ކަންބޮޑުވީ އުމުރުން ތިން އަހަރު އަހަރަށްދާ އަންހެން ދަރިފުޅު ބުގުރާ އަޅާފައި ހުރުމުންނެވެ. އޭނާގެ ބަހުން ނަމަ "ބުރުގާ އަޅުވާފަ" ހުރީމަ އެވެ.

އޭނާ ބުނާ ގޮތުން އެ ދަރިފުޅަށް އަދި ރަނގަޅަށް ހިނގައި ނުގަނެވި އުޅެނިކޮށް ބުރުގާ އެޅުވީ އެވެ. އެއީ ފުކެއް ބޮޑުވަރު ކަމުގައި ބުނެ ފުރައްސާރައިގެ ބަސްތައް ރައްދު ކުރި އެވެ. ދެން ކުރީ ސުވާލެކެވެ. ކާކަށް ކޯއްޗެއް ފޮރުވަންހޭ ބުނެ އެވެ. އޭނާ ދެކޭ ގޮތުން ފެޝަން ރީތި, ކުރު ހެދުމެއް ވެސް ލައްވާ ލެވޭނީ ޅަ އުމުރުގަ އެވެ. 

އޭނާގެ ނަޒަރު ދެން ހުއްޓުނީ ދޮށީ އަންހެން ދަރިފުޅަށެވެ. އެ ދަރިފުޅު ވެސް އޭނާގެ ވިހަ ބަސްތަކުން ސަލާމަތެއް ނުވި އެވެ. ދޮށީ އަންހެން ދަރިފުޅު ބުރުގާ އެޅި ފަހުން ކިތަންމެ ދުވަހެކެވެ. އެހެންވެ އޭނާ ފުރައްސާރައަކަށް ހަދާ ސުވާލެއް ކޮށްލި އެވެ. އެހާ ޅަ އުމުރުގައި ވެސް އެ ދަރިފުޅު ބުރުގާ އެޅިވީމު ނޫހެއްޔެވެ. ދެން އޭނާ މޫނު އަޅާނީ ކޮން އިރަކުން ހެއްޔެވެ. މިހެން ގޮސް އޭނަ ހިތަށް އެރިހާ ވާހަކައެއް ދެއްކި އެވެ. އޭނާ ހިތުން އެއީ ވަރަށް ވިސްނޭ މީހެކެވެ. ތަހުޒީބު މީހެކެވެ. ކުދީންގެ ހައްގުތައް ދަންނަ ދަރީން ދެކެ ވަރަށް ލޯބިވާ މީހެކެވެ.

މި ވާހަކަތަކާއި ގުޅިގެން މި ކުދީންގެ މަންމަ ވަނީ އެ ވާހަކަތައް ސޯޝަލް މީޑިއާގައި ހިއްސާކޮށްފަ އެވެ. އެ ވާހަކަތަކާއެކު ވަރަށް ގިނަ ބަޔަކު ވަނީ އެ މީހުންނަށް ވެސް މިފަދަ އެތައް ކަމަކާ ކުރިމަތިލާން ޖެހިފައިވާކަން ހާމަކޮށްފަ އެވެ. އެ ވާހަކަތަކުން އެނގެނީ މިއީ މުޖްތަމައުގައި ބޮޑުވެފައި އޮތް ވިހަ ވަބާއެއް ކަމެވެ.

އަޅުގަނޑުމެންގެ ތެރެއިން ބައެއް މީހުން ދެކޭ ގޮތުގައި އިސްލާމް ދީނުގެ އުސޫލުތަކުގެ ތެރެއަށް ކުއްޖާ ގެންނަން ޖެހޭނީ އެ ކުއްޖަކު ބޮޑުވުމުންނެވެ. ޅަ އުމުރުގައި ނިވާކަން ކުޑަ ހެދުން އެޅުވުމަކީ މައްސަލައެއް ނޫނެވެ. އެއީ ކުދީންނަށް ހޯދައިދެވޭ އުފަލެކެވެ. ހިތްހަމަޖެހުމެކެވެ. އަދި ބޮޑުވުން ފެންނާން އޮންނާނެ އުފާވެރި ހަނދާނެކެވެ.

ނަމަވެސް މިއީ އިސްލާމް ދީން އަޅުގަނޑުމެންނަށް ގެނެސްދީފައިވާ ގޮތެއް ނޫނެވެ. އެއީ ހުޅަނގުން ޒީނަތެއް ކަމުގައި ދައްކާފައިވާ ކަންކަމެވެ. އެފަދަ ވިސްނުމުގައި އަމަލު ކުރާ ބެލެނިވެރީންނަށް އާހިރުގައި ލިބެނީ ބޮޑު ހިތާމަ އެކެވެ. ޅަ އުމުރުގައި ދޭން ޖެހޭ ތަރުބިއްޔަތު ނުދެވި ކުއްޖާ ބޮޑުވެ އެ ކުއްޖާ ވެގެން ދަނީ މައިންބަފައިންނަށް ބޮޑު ހިތާމަ އަކަށެވެ.

ޅަ އުމުރުގައި އިސްލާމީ ތަރުބިއްޔަތު ދޭން ޖެހެނީ އެހެން ވެގެންނެވެ. ތަރުބިއްޔަތު ދޭން ޖެހެނީ ކުއްޖާއަށް އެންމެ މުހިންމު އުމުރުގަ އެވެ. އެ އުމުރުގައި ދެވޭ ތަރުބިއްޔަތުން މުޅި ދިރިއުޅުމަށް ހެޔޮ އަސަރު ކުރާނެ އެވެ. 

އިސްލާމް ދީނުގައި އެންމެ ބޮޑު އަމުރެއް އޮތް އެކަމަކީ ނަމާދު ގާއިމު ކުރުމެވެ. އުމުރުން ހަތް އަހަރުވުމުން މަޖުބޫރު ކުރުވައިގެން ވެސް ދަރީން ލައްވާ ނަމާދު ކުރުވަން ޖެހެ އެވެ. ބާލިޢުވުމުން ނަމާދު ކުރަން ވާޖިބުވެ އެވެ. އެއީ އަންހެން ކުއްޖެއް ނަމަ އޭނާާގެ ބުރުގާ އަޅާ ހިޖާބުވާން ޖެހޭ އުމުރެވެ.

ކުއްޖާ އެންމެ ޅަފަތުން ފެށިގެން އިސްލާމީ ފޭރާން އަޅުވާ ފުރިހަމަ ގޮތުގައި ތަރުބިއްޔަތު ދެވޭނަމަ އަޅުކަން ވާޖިބުވާ ހިސާބަށް އަންނައިރު ހުންނާނީ އެކަންކަމަށް ފުރިހަމައަށް ތައްޔާރުވެވިފަ އެވެ. އެހެން ނޫންނަމަ ކުއްޖާ ބޮޑުވަމުންދާ ވަރަކަށް އަޅުކަން ކުރުމާއި އިސްލާމީ ފޭރާން ލުން ވެގެންދާނީ ބުރަ އަދި އުނދަގޫ ކަމަކަށެވެ.

އެހެން ކަމުން ޅަ އުމުރުގައި ކުއްޖާ ބުރުގާ އެޅުވުމަކީ ސުވާލުކޮށް ފުރައްސާރަ ކުރަން ޖެހޭ ކަމެއް ނޫނެވެ. އެއީ އެކަމުން ނަމޫނާ ލިބި ތިމާގެ ދަރީންވެސް އެ ގޮތަށް ބޮޑު ކުުރުމަށް ލިބޭ ބާރަކަށް ހަދަންވީ އެވެ.