ކައިވެނީގެ ދުވަހަކީ ކޮންމެ ދެމަފިރިއަކަށް އެންމެ ހާއްސަ ދުވަހެކެވެ. ހަޔާތުގެ އެންމެ ހާއްސަ ދުވަސް އިތުރަށް ހާއްސަ ކޮށްލުމަށް ކައިވެނީގެ ހަލްފާ ކުލަގަދަ ކޮށްލުމަށް ބޭނުންވެ އެވެ. ކައިވެނި އޮންނަ ތަން ޒީނަތްތެރިކޮށްލަން ބޭނުންވެ އެވެ. ދެމަފިރީންގެ އެންމެ ފުރަތަމަ އަދި އެންމެ ހާއްސަ ވަގުތުކޮޅު މާތަކުން ޒީނަތްތެރިކޮށް ޑެކަރޭޓް ކޮށްލަން ބޭނުންވެ އެވެ. މެހެމާނުން ހިތުން ހާއްސަ މަގާމެއް ލިބޭނެ ފަދަ މީރު ކާއެއްޗެހި ހުންނަން ބޭނުންވެ އެވެ.

މި ހުރިހާ ކަމެއް ފުރިހަމަ ކުރުމަށް ކައިވެނި ވެވޭ ދެ މީހުންނާއި ދެ ފަރާތު އާއިލާ އިން ބޮޑު ހަރަދެއް ކުރެ އެވެ.

އައިޝަތު ނަދާއާ އޭނާގެ ފިރިމީހާ ވެސް ބޭނުންވީ އެފަދަ ކައިވެނި ޕާޓީއެއް ބާއްވާ ށެވެ. ބޮޑު ހަރަދެއް ކުރީ ހަޔާތުގެ އެންމެ އުފާވެރި މުނާސަބާ ވަރަށް ހާއްސަކޮށްލަން ބޭނުންވާތީ އެވެ. ނަމަވެސް ނަދާއަށް ކުރިމަތިވީ ހިތަށް ވެސް ތަސައްވުރު ނުކުރެވޭހާ ދެރަ ގޮތެކެވެ. ހަޔާތުގެ އެންމެ އުފާވެރި ދުވަސް އެންމެ ލަދުވެތި އެންމެ ހިތާމަވެރި ދުވަހަށް ވި އެވެ.

ނަދާއަށް ކުރަން ޖެހުނު ތަޖުރިބާތައް އޭނާ ވަނީ ސޯޝަލް މީޑިއާގައި ހިއްސާކޮށްފަ އެވެ. އެ ހުރިހާ ވާހަކަތަކެއް އޭނާ ހިއްސާ ކުުރީ ސާފު ހެއްކާ އެކު އެވެ. އެ ވާހަކަތައް ނަދާ ހިއްސާކުރި ޕޯސްޓް ވަރަށް ބޮޑަށް ވައިރަލްވި އެވެ.

ނަދާ ބުނި ގޮތުގައި "ޖަަސްޓް މެރީޑް" ޕޭޖު ހިންގަނީ ގ. ލައުޒާން މުހައްމަދު ހުނައިން އެވެ. އޭނާއަށް ކައިވެނީގެ ޑެކަރޭޝަން އާއި ކެއުމުގެ ކަންކަން ހަމަޖެއްސުމަށް އެތައް ހާސް ރުފިޔާއެއް ވަނީ ދައްކާފަ އެވެ.

ނަމަވެސް އުންމީދު ކުރި ގޮތަށް އެއްވެސް ކަމެއް ނުދިޔަ އެވެ. އަތުން ފައިސާތަކެއް ގެއްލުމާއި އާއިލާއާ އެކުވެރީންގެ ކުރިމަތީ ލަދުން އިސްޖަހާލަން ޖެހުނީ އެވެ. "ޖަަސްޓް މެރީޑް" އިޝްތިހާރު ކޮށްފައިވާ ރީތި ޑެކަރޭޝަންތަކުން ޑެކަރޭޝަނެއް އިހްތިޔާރު ކުރި ނަމަވެސް ކައިވެނީގެ ވަގުތު ޖެހުނުއިރު ވެސް އެކަން ނުނިމުނެވެ.

އެ ދެމަފިރީންގެ ހިތް މުޅީން ކުދިކުދިވީ ކައިވެނި ކޮށްނިމި ޕާޓީގެ ވަގުތު ފެށުނުއިރު ވެސް ކާއެއްޗެހި ގެނެސްފައި ނުވުމެވެ. އެކަމާއި ޝަކުވާކޮށް ވެގެން އުޅޭ ގޮތް ބަލަން ހުނައިނަށް އެތައް ފަހަރަކު ގުޅުނެވެ. އޭނާގެ ޖަވާބަކަށްވީ ވެގެން އުޅޭ ގޮތް ބަލަމުންދާ ކަމަށެވެ. އެހެން ވެގެން ނުވާނެ ކަމަށް ބުނެ އޮޅުވާލަމުން ގެންދިޔަ އެވެ. އެންމެ ފަހު ވަގުތާ ހަމައަށް ވެސް އޭނާ ދިޔައީ "ސްކޭމް" ހިންގާ އޮޅުވާލަމުންނެވެ.

ފަހުން ބެލިބެލުމުން އެނގުނީ ޕާޓީގެ ކޭޓަރިން ކަންކަން ހަމަޖައްސަން "ޖަަސްޓް މެރީޑް" އިން ހަވާލުކޮށްފައިވާ "ހައުސް އޮފް ޖޭޑް" އަށް ފައިސާ ދައްކާފައިނުވާ ކަމެވެ.

އެކަން އެނގުނީ ވެސް އެ ސަކަރާތެއްގައި ދެ ފަރާތު އާއިލާއާ ނަދާގެ ދެމަފިރީން އުޅޭތާ ދެ ގަޑިއެއްހާއިރުވާން ކައިރިވީ ފަހުންނެވެ.

އިތުބާރުކޮށް ކައިވެނީގެ އިންތިޒާމުތައް ހަމަޖެއްސުމަށް ހަވާލުކުރި "ޖަަސްޓް މެރީޑް" އިން ކަންކުރި ގޮތް ހެއްކާއެކު ނަދާ ހާމަކުރީ އެފަދަ ކަމެއް ދެވަނަ ބަޔަކަށް ތަކުރާރުވާން ނޭދޭތީ އެވެ. އަދި އެފަދަ "ސްކޭމް" ތައް ހިންގާ މީހުން ހުއްޓުވަން ބޭނުންވާތީ އެވެ.

ނަދާގެ އެ ޕޯސްޓް ވަރަށް ބޮޑަށް ވައިރަލްވި އެވެ. އެތައް ސަތޭކަ ބަޔަކު އެ ޕޯސްޓް ޝެއާ ކޮށްފައިވެ އެވެ. އަދި ގިނަ ބަޔަކު ކޮމެންޓް ކޮށްފައިވެ އެވެ.

ބައެއް މީހުންގެ ކޮމެންޓްތަކުން "ޖަަސްޓް މެރީޑް" އިން ލަނޑުދިން ފުރަތަމަ ބަޔަކީ ނަދާގެ ދެމަފިރީން ނޫންކަން އެނގެ އެވެ. ކޮމެންޓް ކުރި ބައެއް މީހުން ވަނީ އެ މީހުންނަށް ވެސް އެ ޕޭޖުން ލަނޑުދީފައިވާ ކަމަށް ބުނެފަ އެވެ. އެންމެ ފަހު ވަގުތު ހަބަރެއް ނުވެ ފައިސާކޮޅު ހިފައިގެން ފިލާފައިވާ ކަމަށް ބުނެފަ އެވެ.

އަނެއް ބަޔަކު ބުނީ "ޖަަސްޓް މެރީޑް" އިން އަމަލު ކުރި ގޮތުން އެ މީހުންގެ ކައިވެނީގެ ހަފްލާއަށް އިތުރަށް އެތައް ހާސް ރުފިޔާއެއް ހަރަދު ކުރަން ޖެހުނު ކަމަށެވެ.

އެހެން ކަމުން މިއީ "ސްކޭމް" ހިންގާ ޕޭޖެއްގެ ގޮތުގައި އެ މީހުން ސިފަކޮށްފައިވެ އެވެ.

ކޮންމެ ކަމެއްގައި ވެސް އޮޅުވާލުމާއި މަކަރު ހެދުން އާންމުވެފައިވަނީ ކަންބޮޑުވާ ޖެހޭ ދަރަޖަކައަކަށެވެ. އެފަދަ އަމަލުތަކުގެ ސަބަބުން ބައެއް މީހުން މުޅި އުމުރު އެއްކޮށްފައިވާ ފައިސާ ކޮޅު ގެއްލިގެން ދެ އެވެ. އަނެއް ބަޔަކަށް އެންމެ އުފާވެރި ދުވަސްތައް ހަޔާތުގެ އެންމެ ހިތާމަވެރި ދުވަހަށް ބަދަލު ވެގެން ދެ އެވެ.

މިފަދަ "ސްކޭމް" ތަކަށް ފުރުސަތު ނުދިނުމަށް ހޭލުންތެރިވާން ޖެހެ އެވެ. ފައިސާ ދެއްކުމުގެ ކުރީން އެތައް ފަހަރަކު ޔަގީން ކުރަން ޖެހެ އެވެ.