މާލެ ސިޓީ ކައުންސިލުން މާފަންނުގައި ތަރައްގީ ކުރަމުން އަންނަ މައިޒާނަށް މާފަންނު މައިޒާން ގެ ނަން ދީ އެ ތަން ތަރައްގީ ކުރާާނެ ގޮތް ފާސްކޮށްފި އެވެ.

މި ނަން ދީފައި ވަނީ، މިއަދު އޮތް މާލެ ސިޓީ ކައުންސިލްގެ ޖަލްސާގައި، ބައިވެރިވި ކައުންސިލް މެންބަރުންގެ އަޣުލަބިއްޔަތުންނެވެ. 

ކައުންސިލުން މާފަންނުގައި މައިޒާން ތަރައްގީ ކުރަނީ މާފަންނު ސަހަރާ ހުރި ބިން، އެއްކޮށް ސާފުކުރުމަށް ފަހު އެވެ. 

މާފަންނު މައިޒާން ނިމޭއިރު އެ މައިޒާނުގެ ހުޅަނގު ދެނކުނު ކަންމަތީގައި މިހާރު ހުރި ޕާކިން ޒޯން ސަރަހައްދުގައި 3 އޮން 3 ބާސްކެޓް ކޯޓެއް އަޅާނެ އެވެ. އަދި މަޖީދީމަގު، ތޮއްޖެހުން ކުޑަކުރުމަށް، ބަސް ސްޓޮޕް (ޕޮކެޓް) ތަރައްގީ ކުރުމާއި 295 ސައިކަލު ޕާކް ކުރެވޭނެހެން ޕާކިން ޒޯނެއް ހަދާނެ އެވެ.

އަދި ރަސްމިއްޔާތު ތަކާއި، ހަފްލާތައް ބޭއްވުމަށް ހާއްސަ ކުރެވިފައިވާ ގްރީން އޭރިއާ އަކާއި ކަސްރަތުކުރުމަށް ކަނޑައެޅިފައިވާ، 496 އަކަ ފޫޓް ސަރަހައްދެއް ތަރައްގީ ކުރާނެ އެވެ.

މިއީ 36،153 އަކަފޫޓްގެ ސަރަހައްދެކެވެ. މި މައިޒާނުގައި ގަސް އިންދައި ފެހިކުރުމަށް ވެސް ކައުންސިލުން ދަނީ ތަައްޔާރު ވަމުންނެވެ. މައިޒާނުގައި އިންދުމަށް ނިންމާފައި ވަނީ، ބޮޑަށް ހިޔާދޭ ގަސްތަކާއި ބަގީޗާ ގަސްތަކާއި މާ ގަސްތަކުގެ އިތުރުން، މޭވާއާއި ތަކުރާރީ ގަސްތަކެވެ.

ކައުންސިލުން ނިންމާފައިވަނީ މާފަންނު މައިޒާން ތަރައްގީ ކުރުމަށްފަހު، މައިޒާން ހިމެނޭ ސަރަހައްދު 24 ގަޑިއިރު ބޭނުން ކުރެވޭހެން، ހުޅުވާލާފައި ބޭއްވުމަށެވެ . އަދި އެސަރަހައްދުގައި ފެންހިދުމުގެ ރަނގަޅު ނިޒާމެއް ވެސް ގާއިމު ކުރުމަށް ކައުންސިލުން ވަނީ ނިންމާފައެވެ.