ހުޅުމާލޭ ފޭސް ދޭއްގައި އެނިމަލް ވެލްފެއާ މިނިސްޓްރީން ގާއިމުކޮށްފައިވާ އެނިމަލް ކެއަރ ފެސިލިޓީ (އޮޅުހިޔާ) ހިންގާނޭ ފަރާތެއް ހޯދުމަށް އިއުލާނުކޮށްފިއެވެ.

އެނިމަލް ވެލްފެއާ މިނިސްޓްރީން ބުނީ، އެއް އަހަރުދުވަހުގެ ނިޔަލަށް އެތަން ހިންގަން ބޭނުންވަނީ، އެ މިނިސްޓްރީއާ ގުޅިގެން ކަމަށެވެ. އެކަމަށް ޝައުގުވެރިވާ ފަރާތްތަކުން މިމަހުގެ 26 ވަނަ ދުވަހު މައުލޫމާތު ސާފުކޮށް ޖޫންމަހުގެ 12 ވަނަ ދުވަހު ޕްރޮޕޯސަލް ހުށައެޅުމަށް މިނިސްޓްރީން ބުނެއެވެ.

އޮޅުހިޔާ ޝެލްޓަރިންގައި ކުރެވޭނޭ މަސައްކަތްތަކުގެ ތެރޭގައި މާލެސިޓީގެ މަގުތަކުން ނަގައިގެން ގެންނަ ވީއްލިގެން އުޅޭ ބުޅާތައް ކަރަންޓީނުކުރުމާއި، ކޮށިތަކުގައި ތިބޭ ބުޅާތަކަށާް ކާންދީ ބެލެހެއްޓުމާއި، އެތަކެއްޗަށް ބޭސްދިނުމާއި، ޖަނަވާރުތައް ތަމްރީނު ކުރުމުގެ އިތުރުންވެސް އިތުރު ޒިއްމާތައް ހިމެނެއެވެ.

- މާލޭ މަގުތައްމަތީ އުޅޭ ބުޅާތައް އޮޅުހިޔާއަށް ވެއްދުން

- އިދާރީގޮތުން މުޅި އޮޅުހިޔާ ހިންގުން

- އޮޅުހިޔާގެ ސެކިއުރިޓީ ބެލެހެއްޓުން

- އޮޅުހިޔާގެ ކްލިނިކްތައް ހިންގުން

- އޮޅުހިޔާއާ ބެހޭ ފެއާތަކާއި ކޭމްޕްތައް ރާވައި ހިންގުން

- އޮޅުހިޔާއިން ބުޅަލުގެ އެޑޮޕްޝަން ކަންކަން ހިންގާ ބެލެހެއްޓުން

- އޮޅުހިޔާގެ އިންވެންޓްރީއާއި ސްޓޮކް ބެލެހެއްޓުން

- މަސައްކަތްކުރާ ސާމާނާއި ކުޑަ އޮފީސް ޖާގައެއް ހިންގާ ފަރާތައް ހަމަޖައްސައިދިނުން

މިނިސްޓްރީން ބުނީ އޮޅުހިޔާ ހިންގުމަށް އެދޭ ފަރާތު އެޑްވާންސް ފައިސާ ހޯދުމަށް ހުސަހަޅައިފިނަމަ މާލިއްޔަތު ގަވާއިދާ އުސޫލުތަކުގެ މަތިން ފައިސާ ދޫކުރެވޭނޭ ކަމަށެވެ. އެގޮތުން ފައިސާ ދޫކުރެވޭނީ ޕްރޮކިއުމަންޓްގެ ޖުމްލަ އަގު 250،000 ރުފިޔާއަށްވުރެ ބޮޑު ނުވާ ގޮތަށްކަމަށްވެސް މިނިސްޓްރީން ބުނެއެވެ.

މާލެ ސަރަހައްދު މަގުތައް މަތީގައި ބުޅާގިނަވުމުގެ މައްސަލައަށް ހައްލެއް ހޯދުމުގެ ގޮތުން އޮޅުހިޔާ ހުޅޫވާފައިވަނީ މިދިޔަ އަހަރުގެ ނޮވެމްބަރުމަހުގެ ދެވަނަ ދުވަހުއެވެ. އެތަން ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. އޮޅުހިޔާ  ގާއިމްކޮށްފައިވަނީ 5،000 އަކަފޫޓުގެ ބިމެއްގައެވެ