ނޫސްވެރިއަކަށް ފުލުހުން އަނިޔާކުރި ކަމުގެ ތުހުމަތާއި ގުޅިގެން އެ މައްސަލައާގައި ފުލުހުން ވާހަކަ ދައްކައިފި އެވެ.

ވަން އޮންލައިންގެ ނޫސްވެރިޔާ ހަމްދާން އަހްމަދަށް ފުލުހުން އަނިޔާކުރި ކަމަށް ބުނެ އޭނާ ވަނީ ފޭސްބުކްގައި ސްޓޭޓަސްއެއް ޖަހާފަ އެވެ. އެކަން ހިނގާ ދިޔަ ގޮތް ވަރަށް ތަފްސީލުކޮށް އޭނާ ހިއްސާކޮށްފައިވެ އެވެ.

ހުޅުމާލެ ހިޔާ އަވަަށުގައި ޑްރޯނެއް އަރުވަން ހުއްޓާ ފުލުހުން އެ ސަރަހައްދަށް އައިސް ހުތުރު ބަހުން މުއާމާލަތް ކުރި ކަމަށާ އަދި ޕޮލިސް ސްޓޭޝަންގެ މެސް ރޫމަށް ގެންގޮސް އަނިޔާ ކުރި ކަމަށް ތުހުމަތު ކޮށްފައިވެ އެވެ. އޭނާ އަކީ ނޫސްވެރި އަކަށް ވީތީ ހުތުރު ބަހުން މުއާމަލާތްކޮށް އަނިޔާ ކުރަން ޖެހޭ ކަމަށް އެ ފުލުހުން ބުނެފައިވާ ކަމަށް ވެސް ތުހުމަތު ކޮށްފައިވެ އެވެ.

އެކަމާ ގުޅޭގޮތުން ސުވާލު ކުރުމުން ފުލުހުން ދިނީ ތަފާތު ޖަވާބެކެވެ. ފުލުހުންގެ މީޑިއާ އޮފިސަރު ވިދާޅުވީ ޑްރޯން އަރުވަން ހުރި މީހާއާ ފުލުހުން ސުވާލު ކުރުމުން މައުލޫމާތު ދިނުމަށް އިންކާރު ކުރި ކަމަށެވެ. އަދި ހުއްދަ ދެއްކުމަށް އިންކާރުކޮށް ހުއްދަ ދައްކަން ނުޖެހޭ ކަމަށް ބުނެ ހަޑިހުތުރު ބަހުން ފުލުހުންނާ މުއާމަލާތު ކޮށްފައިވާ ކަމަށެވެ.

މީގެ އިތުރުން ފުލުުހުންގެ އަމުރަށް ނުކިޔަމަންތެރިވުމުގެ މައްސަލާ ގައި ޕޮލިސް ސްޓޭޝަނަށް ގެންގޮސް ސުވާލުކޮށް ހުއްދަ ނެތި ޑްރޯން ނޭރުވުމަށް ނަސޭހަތްތެރިވި ކަމަށެވެ.

ފުލުހުން ބުނީ އެ މީހާއަށް އަނިޔާކުރި ކަމަށް ތުހުމަތު ކުރާތީ އެކަމާއި ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ. ނަމަވެސް މިހާތަނަށް ބެލި ބެލުމުން އެފަދަ ކަމެއް ހިނގާފައިވާ ކަަމަށް ނުބެލެވޭ ކަމަށެވެ.

ފުލުހުންގެ މި ސްޓޭޓްމަންޓް ގައި ފުލުހުން އެ ނޫސްވެރިޔާއާ ހުތުރު ބަހުން މުއާމަލާތް ކޮށްފައިވާ ކަމަށް ނުބުނެ އެވެ. ނަމަވެސް ނޫސްވެރިޔާ އާންމުކޮށްފައިވާ ވީޑިއޯގައި ހުތުރު ބަހުން ފުލުހުން ދެއްކި ވާހަކަ އަކާއި ހުތުުރު ބަހުން ވާހަކަ ދެއްކި ފުލުސް މީހާ ވެސް ދައްކާފައިވެ އެވެ.