މަކަރާ ހީލަތުގެ ރެކޯޑްގެ އޮތް މީހާ އަދިވެސް މީހުންނަށް ލަނޑު ދިނުމުގައި، އަނެއްކާ ހައްޔަރު ކޮށްފި
މަކަރާއި ހީލަތުގެ ކުށުގެ އަމަލު ހިންގާފައިވާ ކަމުގެ ކުށުގެ ރެކޯޑް އޮތް ގ. ސިނަމާލެ 1 05-13 / މާލެ، ޒައިދާން މުޙައްމަދު ހާޝިމް، އިތުރު މައްސަލަތަކެއްގައި އަލުން ހައްޔަރު ކޮަށްފި އެވެ.
ފުލުހުން މިއަދު ބުނީ ތަފާތު އެކި ދުވަސްމަތިން "ފުޑީސް ޑެލިވަރީ" އަށް ކާބޯތަކެއްޗަށް އޯޑަރުކޮށް، ހިދުމަތް ހޯދުމަށްފަހު ފައިސާ ދެއްކި ކަމަށް ބުނެ އަސްލު އޮޅުވާލައިގެން ސައްހަ ނޫން ސްލިޕްތަކެއް ހަދައި "ފުޑީސް ޑެލިވަރީ" އަށް ފޮނުވާފައިވާ ކަމަށް ތުހުމަތުކުރެވޭ މައްސަލައާ ގުޅިގެން ޒައިދާން ހައްޔަރުކޮށްފައިވާ ކަމަށެވެ.
މީނާއަކީ މަކަރާއި ހީލަތުގެ ކުށުގެ އަމަލު ހިންގާފައިވާ ކަމުގެ ކުށުގެ ރެކޯޑު އޮންނަ މީހެއްކަން ތަހުގީގަށް އެނގިފައިވާ ކަމަަށް ވެސް ބުންޏެވެ.
މި މައްސަލައާ ގުޅިގެން ޒައިދާންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވެއެވެ.
މި މައްސަލަ ފުލުހުން ދަނީ ތަހުގީގު ކުރަމުންދާ ކަމަށް ވެސް ބުންޏެވެ.
މި މީހާ ވަނީ މީގެ ކުރީން ވެސް އެތައް ބަޔަކަށް ލަނޑުދީފަ އެވެ. މީހުންގެ އެޕާޓްމަންޓްތައް ކުއްޔަށް ނަގާ ތަނުގައި ހުންނަ ހުރިހާ ސާމާނެއް ވަގަަށް ނަގާފައިވެ އެވެ. އަދި ތަންތަން ކުއްޔަށް ދޭ ކަމަށް ބުނެ މީހުންގެ އަތުން ބޮޑެތި އަދަދުތަކުން ފައިސާ ނަގާފައިވެ އެވެ.
މިއިން އެއްވެސް މައްސަލައެއްގައި އިންސާފު ގާއިމު ކުރެވިފައިނުވާއިރު މީނާ ކުރީން ހައްޔަރު ކުރީ ވެސް އާންމުން އެތައް ފަހަރަކު ރިޕޯޓް ކޮށްގެނެވެ. އަދި ހައްޔަރު ކޮށްފައި ވެސް އަލުން ދޫކޮށްލަ އެވެ.
Advertisement
This content is created and paid for by advertisers and does not involve Voice Journalists
