ހުޅުމާލޭގެ 'އައިޑެންޓިޓީ' އަކަށް 100 މީޓަރުގެ "އައިކޯނިކް ޓަވަރެއް" އެޅުމަށް އަލަށް އެކުލަވައިލި ހުޅުމާލޭގެ މާސްޓާ ޕްލޭންގައި ހިމަނައިފިއެވެ.
އަލަށް އެކުލަވައިލި ހުޅުމާލޭގެ މާސްޓާ ޕްލޭން އިފްތިތާހުކުރުމަށް މިއަދު ބޭއްވި ރަސްމިއްޔާތުގައި މާސްޓާ ޕްލޭނާ ގުޅޭ މައުލޫމާތު ދެއްވަމުން އެޗްޑީސީގެ ޗީފް ޕްލޭނިން އޮފިސަރު އަހުމަދު ޒިނަފް ވިދާޅުވީ ހުޅުމާލޭ އާ މާސްޓާޕްލޭންގައި ފަރުކޮޅުފުށީގެ ނިމޭ ހިސާބުގައި 'އައިކޯނިކް ޓަވަރު' އެޅުމަށް ނިންމާފައިވާ ކަމަށެވެ.
އަދި އެ ޓަވަރަކީ ހުޅުމާލޭގެ ދެވަނަ 'އައިޑެންޓިޓީ'އެއް އުފެއްދުމަށް ބިނާކުރާ ޓަވަރެއް ކަމަށް އޭނާ ވިދާޅުވިއެވެ.
މި ޓަވަރުގެ އުސްމިނަކީ 100 މީޓަރު. ހުޅުމާލެއޭ ބުނީމަ، އެންމެ ފުރަތަމަވެސް އަޅައިގަންނާނެ ނުވަތަ ވިސްނޭނެ އެއްޗަކީ މިހާރު ވިއްޔާ ހުޅުމާލޭ 1 ގައި އެކެއްގައި ދެވަނައަށް އެޅި މިސްކިތް. ހުޅުމާލޭ 2 ގެ ހިޔާ ޓަވަރުތައް. އޭގެ އިތުރުން ތިންވަނަ އެއްޗަކަށް ހުޅުމާލެ އަށް އައިކޯނިކް ޓަވަރ އެއް މި ގެންނަނީ.
އެޗްޑީސީގެ ޗީފް ޕްލޭނިން އޮފިސަރު އަހުމަދު ޒިނަފް
މި ޓަވަރުގެ އަނެއް ބޭނުމަކީ ފައިނޭންޝިއަލް ޑިސްޓްރިކްޓެއް އުފެދިގެން އަންނައިރު އިތުރު ވަޒީފާއަށް ޖާގަދިނުން ކަމަށް ޒިނަފް ވިދާޅުވިއެވެ.
ތަރައްގީވެފައިވާ ގިނަ ގައުމު ތަކުގައި 'އައިކޯނިކް' ތަންތަނަށް ވަނީ އުސް ޓަވަރުތަކެވެ. އެފަދަ ތަންތަނަކީ އެގައުމުތަކަށް ޒިޔާރަތްކުރާ ފަތުރުވެރިންގެ މެދުގައި ވަރަށް މަޤުބޫލު ތަންތަނެވެ.
އެގޮތުން، މެލޭޝިއާގެ ޕެޓްރޯނަސް ޓްވިން ޓަވަރާއި، ޕެރިސްގެ އައިފެލް ޓަވަރާއި، ސިންގަޕޫރުގެ އެންމެ އުސް ޓަވަރުކަމަށްވާ ގުއޮކޯ ޓަވަރާއި، ކޮލޮމްބޯގައި ހުންނަ ލޮޓަސް ޓަވަރާއި މައްކާގެ ކްލޮކް ޓަވަރު ފަދަ ތަންތަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
