ޓެރަރިސްޓުންނާއި، އެމީހުންނަށް ތާޢިދުކޮށް އެމީހުންނަށް ވާގިވެރިވާ މީހުންނާ ދެމެދު އެއްވެސް ތަފާތެއް ނެތްކަމަށާއި، ތަފާތު ނުވެސް ކުރާނެކަމަށް އިންޑިއާއިން ބުނެފިއެވެ.

އޮޕަރޭޝަން ސިންދޫރަށްފަހު އެކިއެކި ގައުމުތަކަށް އެ އޮޕަރޭޝަނާއި ބެހޭ މައުލޫމާތާއި، އިންޑިއާއިން ޓެރަރިޒަމާމެދު ގެންގުޅޭ ސިޔާސަތާއި ބެހޭ މައުލޫމާތު ދިނުމަށް ދުނިޔޭގެ އެކި ކަންކޮޅުންތަކަށް މިހާރު ދަތުރުކުރަމުންދާ އިންޑިއާގެ ޤާނޫނު ހަދާ މަޖިލީހުގެ ވަފުދުތަކުން ގެންދަނީ މި މެސެޖް ދުނިޔޭގެ ގައުމުތަކަށް ދެމުންނެވެ. އަދި އިންޑިއާއިން ޓެރަރިޒަމަށް ދޭނީ ޒީރޯ-ޓޮލަރެންސް ކަމަށާއި، ޕަހަލްގަމްގެ ހަމަލާއަށްފަހު ފެނިގެން ދިޔައީ އެމަންޒަރުކަމަށް މި ވަފުދުތަކުން އަންނަނީ ބުނަމުންނެވެ.

އިންޑިއާގެ މި މެސެޖް އެންމެ ހަރުކަށިކޮށް ދެއްވި އެއް ބޭފުޅަކީ ޖަޕާނަށް ވަޑައިގެންނެވި ވަފުދުގައި ހިމެނިވަޑައިގަންނަވާ ޓްރިނާމޫލް ކޮންގްރެސް ޕާޓީއަށް ނިސްބަތްވާ އަބީޝެކް ބެނާރްޖީ އެވެ. އޭނާ ވިދާޅުވީ ޕާކިސްތާނަށް ތާޢީދުކުރުމަކީ ޓެރަރިޒަމަށް ތާޢީދުކުރުން ކަމަށެވެ. އަދި ޓެރަރިޒަމަކީ ބަލިޖެހިފައިވާ ކުއްތާއެއްނަމަ، އެކުއްތާ ބަލަހައްޓާ މީހަކީ ޕާކިސްތާނުކަމަށް ވިދާޅުވެ، ޕާކިސްތާނަށާއި އެގައުމަށް ވާގިވެރިވާ ފަރާތްތަކަށް އޭނާ ވަރަށް ބޮޑަށް ފާޑު ވިދާޅުވިއެވެ.

ޕަހަލްގަމްގެ ހަމަލާއާއި އެހަމަލާގެ ރައްދުގައި ޕާކިސްތާނުގައި ހުރި ޓެރަރިސްޓް ޖަގަހަތަކަށް އަމާޒުކޮށްގެން އިންޑިއާއިން ހިންގި އޮޕަރޭޝަން ސިންދޫރާއި ބެހޭ މައުލޫމާތު ދިނުމަށް އިންޑިއާގެ ޤާނޫނު ހަދާ މަޖިލީހުގެ ހުރިހާ ޕާޓީއެއް ހިމެނޭ ވަފުދުތައް ދުނިޔޭގެ އެކި ކަންކޮޅުތަކަށް ދަނީ މިހާރު ދަތުރުކުރަމުންނެވެ. މި ދަތުރުތަކުގައި އެގައުމުތަކުގައި ތިބި ނޫސްވެރިންނާއި، ތިންކް ޓޭންކްތަކާއި އަދި ސަރުކާރުތަކުގެ އޮފިޝަލުންނާއެކު އިންޑިއާއިން ގެންދަނީ މައުލޫމާތު ދިނުމުގެ ބައްދަލުވުންތައް ބާއްވަމުންނެވެ.