ބަންގްލަދޭޝްގެ ވަގުތީ ސަރުކާރުގެ ސިޔާސަތުތަކާމެދު ގިނަ ބަޔަކު ހިތްހަމަނުޖެހި، އެގައުމުގެ މަސްރަހު އަނެއްކާވެސް ހޫނުވާން ފަށައިފިއެވެ.

ޝެއިޚް ހަސީނާގެ ވެރިކަމާ ދެކޮޅަށް އެތައް ހާސް ބަޔަކު ޑާކާއާއި އެހެން ސިޓީތަކުގެ މަގުތަކަށް ނިކުމެ ބޭއްވި މުޒާހަރާތަކަށްފަހު އެކަމަނާ ގައުމު ދޫކުރައްވައި ވަޑައިގަތުމުން، މިދިޔަ އަހަރުގެ އޮގަސްޓް މަހު މުހައްމަދު ޔޫނުސްގެ ބެއްލެވެވުމުގެ ދަށުން ވަގުތީ ސަރުކާރެއް އެކުލަވާލެވުނެވެ. ޔޫނުސް އަކީ ނޮބެލް ސުލްހައިގެ އިނާމު ހާސިލްކުރައްވާފައިވާ، ބަންގްލަދޭޝްގެ މަސައްކަތްތެރިންގެ މެދުގައި މަޤްބޫލު ބޭފުޅެކެވެ. ޔޫނުސްއަށް ނޮބެލް އިނާމު އެރުވީ އޭނާގެ ގްރެމީންގެ ބޭންކުން، ބަންގްލަދޭޝްގެ ރައްޔިތުންގެ ފަޤީރުކަން ނައްތާލުމަށް އެހީތެރިވުމަށް ދެމުން އަންނަ މައިކްރޯ ލޯންތަކުގެ ސަބަބުންނެވެ.

ހަސީނާގެ ވެރިކަން ބަދަލުކޮށްލުމަށްފަހު، އެމުޒާހަރާތައް ލީޑްކުރަން އުޅުނު ޒުވާނުން ވަގުތީ ގޮތުން ވެރިކަން ހަވާލުކުރީ ޔޫނުސްއާއެވެ. އެހެންނަމަވެސް އޭނާގެ ވެރިކަމާމެދު މިހާރު ގިނަ ބަޔަކު އަންނަނީ ހިތްހަމަނުޖެހުން ފާޅުކުރަމުންނެވެ. އަދި އިންތިޚާބު ލަސްވާ މައްސަލައިގައި އަސްކަރިއްޔާ އާއި ސަރުކާރާ ދެމެދު އޮންނަ ގުޅުން އަންނަނީ ގޯސްވަމުންނެވެ.

ސިވިލް ސަރވަންޓުން ވަޒީފާއިން ވަކިކުރުން ފަސޭހަކޮށް، ސަރުކާރަށް އެކަމުގައި އޮންނަ ބާރުވެރިކަން އިތުރުކުރުމާ ގުޅިގެން ސިވިލް ސަރވަންޓުން މިދިޔަ އާދިއްތަ ދުވަހުން ފެށިގެން އަންނަނީ ހިތްހަމަނުޖެހުން ފާޅުކުރަމުންނެވެ. އަދި މުސާރަ ބޮޑުކޮށްދިނުމަށް ޑިމާންޑްކޮށް، ސަރުކާރު ސްކޫލްތަކުގެ ޕްރައިމަރީ ޓީޗަރުން ހޯމަ ދުވަހުން ފެށިގެން އިހުތިޖާޖުކުރުމުގެ ގޮތުން ވަނީ ވަޒީފާއަށް ނިކުތުން ހުއްޓާލާފައެވެ.

ޓެކްސްއާއި ބެހޭ އިދާރާ ނޭޝަނަލް ބޯޑް އޮފް ރެވެނިއު އުވާލައި، އެތަނުގެ މަސައްކަތްތައް ފިނޭންސް މިނިސްޓްރީގެ ބެލުމުގެ ދަށަށް ގެންދިޔުމަށްވެސް ސަރުކާރުން އަމުރެއް ނެރުނެވެ. އެހެންނަމަވެސް މުވައްޒަފުން މުޒާހަރާކޮށްފާނެކަމުގެ ބިރަށް އެނިންމުން މިހާރު ވަނީ ބަދަލުކޮށްފައެވެ.

އިންތިޚާބެއް ބާއްވާނެ ދުވަހެއްގެ މައްސަލައިގައި ސިޔާސީ ޕާޓީތަކަށްވެސް އެއްގަލަކަށް ނޭރި، މަސްރަހު ގޯސްވަމުންދާއިރު، އަނެއްކާވެސް ބަންގްލަދޭޝްގެ މަގުތަކަށް ޒުވާނުން ނުކުމެ މުޒާހަރާކުރަން ފެށުމުގެ ބިރު އެބައޮތެވެ.