އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތަށް ބަލައި، އަންނަ މަހުގެ ތެރޭގައި އެއްމިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރާނޭކަމުގެ އުއްމީދު އާވެއްޖެއެވެ.

ޓޫރިޒަމް މިނިސްޓްރީން ނެރެ އާއްމުކޮށްފައިވާ ރާއްޖެއަށް ޒިޔާރަތްކުރާ ފަތުރުވެރިންގެ ތަފާސްހިސާބަށް ބަލާއިރު، އަހަރުގެ މިހާތަނަށް ރާއްޖެއަށް ވަނީ، 950,212 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 8 އިންސައްތަ އިތުރު އަދަދެކެވެ. މިދިޔަ އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދަކީ 879،892 އެވެ.

ތަފާސްހިސާބު ތަކުން ދައްކާގޮތުގައި މި މެއި މަހުގެ މިހާތަނަށް އެކަނިވެސް 119،486 ފަތުރުވެރިން ވަނީ ރާެއްޖެއަށް ޒިޔާރަތް ކޮށްފައެވެ. އެއް މިލިއަން ފަތުރުވެރިން ހަމަވާން މިހާރު ބޭނުންވަނީ 49،788 ފަތުރުވެރިންނެވެ. މަހެއްގެ ތެރޭގައި ރާއްޖެއަށް ފަތުރުވެރިން ޒިޔާރަތްކުރާ ނިސްބަތަށް ބަލާއިރު، އަންނަ މަހުގެ މެދަކާ ހަމަޔަށްދާއިރު، މިލިއަން ވަަނަ ފަތުރުވެރިޔާ ޒިޔާރަތްކުރުމުގެ އުއްމީދު ބޮޑެވެ.

1. ޗައިނާ: 112،594 ފަތުރުވެރިން 

2. ރަޝިޔާ: 102،842 ފަތުރުވެރިން

3. އިނގިރޭސިވިލާތް: 97،561 ފަތުރުވެރިން

4. އިޓަލީވިލާތް: 81،218 ފަތުރުވެރިން 

5. ޖަރުމަނުވިލާތް: 72،822 ފަތުރުވެރިން

މިއަހަރުގެ މިހާތަނަށް މަހެއްގެ ތެރޭގައި އެންމެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވަނީ، ޖަނަވަރީ މަހުގައެވެ. އެއީ 214،863 ފަތުރުވެރިންނެވެ. 

ތަފާސްހިސާބަށް ބަލާއިރު، އަހަރުގެ މިހާތަނަށް ޒިޔާރަތްކޮށްފައިވާ 950،212 ފަތުރުވެރިންގެ ތެރެއިން 677،848 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި 220,581 ފަތުރުވެރިން ގެސްޓްހައުސްތަކުގައި ޗުއްޓީ ހޭދަކޮށްފައިވާއިރު، ސަފާރީތަކުގައި ޗުއްޓީ ހޭދަކުރި ފަތުރުވެރިންގެ އަދަދު އުޅެނީ 23,331 ގައެވެ.

ސަރުކާރުންގެ މިހާރުގެ އެންމެބޮޑު އަމާޒަކީ މި އަހަރު ނިމުމުގެ ކުރިން 2.3 މިލިއަން ފަތުރުވެރިން ރާއްޖެ ގެނައުމެވެ. އެ އަމާޒަށް ވާސިލްވުމަށް އެމްއެމްޕީއާރުސީން އަންނަނީ މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރުމަށް ގިނަ މަސައްކަތްތަކެއް ކުރަމުންނެވެ.