މަސްތުވާތަކެތީގެ މައްސަލައެއްގައި ވިލިނގިލިން މީހަކު ހައްޔަރުކޮށްފިއެވެ.
މިމަހުގެ 28 ވަނަ ދުވަހު އެރަށު ޕޮލިހުން ހިންގި އޮޕަރޭޝަނުގައި ހައްޔަރު ކޮށްފައިވަނީ ގއ. ވިލިނގިލި / ޖާވިޔާ، އުމުރުން 28 އަހަރުގެ ޖަޛްލާން ޢަލީ އެވެ.
އޭނާ ހައްޔަރު ކޮށްފައިވަނީ މަސްތުވާތަކެތި ގެންގުޅެ، އެ ތަކެތީގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ފުލުހުންގެ އިންޓެލިޖެންސާއި ވިލިނގިލީ ޕޮލިސް ގުޅިގެން ހިންގި އޮޕަރޭޝަނުގައެވެ.
ޖަޛްލާން ހައްޔަރު ކޮށްފައިވާ ސަބަބެއްގެ ގޮތުގައި ވިލިނގިލީ ފުލުހުން ބުނެފައިވަނީ މިމަހުގެ 28 ވަނަ ދުވަހު އެރަށު ޕޮލިހުން ހިންގި އޮޕަރޭޝަނުގައި އެރަށު މަގުމަތިން އޭނާ ހުއްޓުވަން އުޅުމުން، އޭނާ އެއްލައިލި ތަކެތި ފުލުހުން ބަލާ ފާސްކުރިއިރު މަސްތުވާތަކެތިކަމަށް ޝައްކުކުރެވޭ ތަކެތި ހުރި ރަބަރު ޕެކެޓުތަކެއް ފެނިފައިވާތީއެވެ. މިތަކެތީގައި 6 ގުރާމް ހުރި ކަމަށް ވެސް ފުލުހުންވަނީ ބުނެފައެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުންވަނީ، ފަސް ދުވަހަށް ބަންދުކުރުމަށް އަމުރުކޮށްފައެވެ.
މި މައްސަލަ ވިލިނގިލީ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
