ބާބާގާޑިޔާގެ ފަރާތުން ފަލަސްތީނުގެ ރައްޔިތުންނަށް 20000 ރުފިޔާ ހަދިޔާ ކޮށްފިއެވެ. 

މިދިޔަ މަހުގެ ނިޔަލަށް ކުރިއަށް ގެންދިޔަ އުފެއްދުންތެރިކަމުގެ މައުރަޒުގައި، ފުވައްމުލަކުގައި ހިންގަމުން އަންނަ ބާބާގާޑިޔާވެސް ވަނީ މާލެ ގެނެސްފައެވެ. 

ދިވެހިންގެ މެދުގައި މަޝްހޫރު މި ގާޑިޔާއަށް ކޮންމެ ދުވަހަކުވެސް ގިނަ ބަޔަކު ޒިޔާރަތްކޮށް އެތަނުގެ ކާތަކެތީގެ ރަހަ ބަލާފައިވާއިރު، ރޭ އެތަނަށް ލިބުނު ފައިސާގެ %20 ވަނީ ފަލަސްތީނަށް ހަދިޔާ ކުރުމަށް ނިންމައި، އެ ފައިސާ އިންޓަނޭޝަނަލް އެއިޑް ކެންޕެއިން (އައިއޭސީ) އާ ހަވާލު ކޮށްފައެވެ. އެއީ 20،000 ރުފިޔާއެވެ. 

މިކަމާ ގުޅިގެން އައިއޭސީން ވަނީ ބާބާގާޑިޔަލަށް ޝުކުރު އަދާކޮށް، އެއީ ޣައްޒާގެ ރައްޔިތުންނަށް ފައިދާ ކުރުވަނިވި އެއްޗަކަށް ވެގެންދާނެކަން ފާހަގަކޮށްފައެވެ. 

އިސްރާއިލުން ހިންގަމުންދާ ޤަތުލުއާއްމު މެދު ކަނޑާލުމަށް ވީ އެ އެއްބަސްވުމާ ޚިލާފުވެ މާރިޗު 18ވަނަ ދުވަހު އެމީހުން ވަނީ އަލުން ޣައްޒާއަށް ޙަމަލާ ދޭން ފަށާފައެވެ. އެއްބަސްވުމާ ޚިލާފުވުމުގެ ދުވަސްކޮޅެއް ކުރިން، މާރިޗު މަހުގެ 2ވަނަ ދުވަހު އިސްރާއިލުން ވަނީ ޣައްޒާގެ ފުރަބަންދު ހަރުކަށިކޮށް، އެ ސަހަރަށް ކާބޯތަކެއްޗާއި އެހީގެ ސާމާނު ވެއްދުމަށް ހުރަސް އަޅާފައެވެ.

އޭގެ ފަހުން ދެ މަހަށްވުރެ ގިނަ ދުވަސް ފާއިތުވެފައިވާއިރު ޣައްޒާގެ 2.3 މިލިޔަން ރައްޔިތުން ދަނީ އިންތިހާ ދަރަޖައަށް ބަނޑުހައިހޫނުކަމާއި ބަލިމަޑުކަމާ ކުރިމަތިލަމުންނެވެ. ޣައްޒާއަށް މަދު ޢަދަދަކަށް ކާބޯތަކެއްޗާއި އެހީގެ ސާމާނު އެތެރެ ކުރުމުގެ ފުރުޞަތު އިސްރާއިލުން މިހާރު ދީފައިވާ ނަމަވެސް އެ ފުރުޞަތުގެ ދަށުން ޣައްޒާއަށް މިހާތަނަށް ފޯރު ކޮށްދީފައި ވަނީ އެ ސަހަރުގެ ރައްޔިތުންނަށް ބޭނުންވާ ހަޤީޤީ ޢަދަދާ ގާތް ވެސް ނުކުރާވަރުގެ މަދު ސާމާނުކޮޅެކެވެ.