އަޔަރލޭންޑާއި ނޭޕާލްގެ އިތުރުން ޔޫކްރެއިންއަށް ކަނޑައަޅާ ނޮން ރެޒިޑެންޓު ސަފީރުކަމަށް އައްޔަނުކުރަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފޮނުއްވި ތިން ބޭފުޅުންގެ ނަންތައް ދިރާސާ ކުރުމަށްޓަކައި ހާރިޖީ ގުޅުންތަކާ ބެހޭ ކޮމިޓީއަށް މިއަދު ފޮނުވައިފިއެވެ.

ދިވެހިރާއްޖެއިން އަޔަރލޭންޑަށް ކަނޑައަޅުއްވާފައި ހުންނަވާ ނޮން ރެޒިޑެންޓް ސަފީރުކަމަށް އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައި ވަނީ، މިވަގުތު ދިވެހިރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ކަމަށްވާ ހ. އޯކިޑް، އިރުތިޝާމް އާދަމް ގެ ނަމެވެ.

ދިވެހިރާއްޖެއިން ނޭޕާލަށް ކަނޑައަޅުއްވާފައި ހުންނަވާ ނޮން ރެޒިޑެންޓު ސަފީރުކަމަށް އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައި ވަނީ، މިވަގުތު ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ކަމަށްވާ މ. ބީނާފުށި، އައިޝަތު އަޒީމާ ގެ ނަމެވެ.

އަދި ހަމައެހެންމެ، ދިވެހިރާއްޖެއިން ޔޫކްރެއިންއަށް ކަނޑައަޅުއްވާފައި ހުންނަވާ ނޮން ރެޒިޑެންޓް ސަފީރުކަމަށް އައްޔަނުކުރަން ރައީސުލްޖުމްހޫރިއްޔާ ފޮނުއްވާފައި ވަނީ ދިވެހިރާއްޖެއިން ބެލްޖިއަމް އާއި ޔޫރަޕިއަން ޔޫނިއަންއަށް ކަނޑައަޅުއްވާފައި ހުންނަވާ ސަފީރު ކަމަށްވާ މ. ގީލާ ވިލާ، ގީލާ އަލީ ގެ ނަމެވެ.

ފާހަގަކޮށްލަންޖެހޭ ކަމަކީ، ނޮން ރެޒިޑެންޓު ސަފީރުންނަކީ އެއްވެސް މުސާރައެއް އަދި އުޖޫރައެއް ނުލިބޭ ގޮތަށް އައްޔަނުކުރެވޭ މަގާމުތަކެއްކަމެވެ.