ކުޅުދުއްފުށީގައި އޮޕަރޭޝަން ޑޮކްޓަރުންގެ ހާއްސަ ކޭމްޕެއް ބާއްވަނީ
ކުޅުދުއްފުށީ ރީޖަނަލް ހޮސްޕިޓަލުގައި އޮޕަރޭޝަން ޑޮކްޓަރުންގެ ހާއްސަ ކޭމްޕެއް ބޭއްވުމަށް ނިންމައިފިއެވެ.
ސިއްހީ ވުޒާރާ އާއި މާލޭ ސިޓީ ގްރޫޕް އޮފް ހޮސްޕިޓަލްސް ގުޅިގެން ކުރިއަށް ގެންދިއުމަށް ހަމަޖެހިފައިވާ، މި ކޭމްޕް ބޭއްވުމަށް ތާވަލްކޮށްފައިވަނީ، މިހިޖާ ޖޫންމަހުގެ 12 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ.
މި ކޭމްްޕްގައި ތަފާތު ގިނަ ހިދުމަތްތަކެއް ފޯރުކޮށްދިނުމަށް ވަނީ ހަމަޖެހިފައެވެ. އެގޮތުން ކަފާލައިގެން (އޯޕަން) އަދި ލޯވަޅުއަޅައިގެން (ލެޕްރަސްކޯޕިކް ) ކޮށް އޮޕަރޭޝަން ކުރުމާއި,ފަސޭހަނުވެ ގިނަދުވަސްވެފައި ހުންނަ ފާރުގަނޑު ތަކަށް ފަރުވާ ދިނުމުުގެ ހިދުމަތް ހިމެނެއެވެ. މީގެ އިތުރުން ޕްލާސްޓިކް ސާރޖަރީގެ ޚިދުމަތާއި ކެންސަރުބަލީގެ އޮޕަރޭޝަންގެ ހާއްސަ ޑޮކްޓަރުގެ ޚިދުމަތް މި މުއްދަތުގެ ތެރޭގައި ފޯރުކޮށްދިނުމަށް ވަނީ ހަމަޖެހިފައެވެ.
މި ކޭމްޕްގައި ބަރުދަން ލުއި ކުރުމާއި ގޮހޮރުގެ ބަލިތަކުގެ އޮޕަރޭޝަން ތަކުގެ ޑޮކްޓަރުގެ ޚިދުމަތާއި,ކުޑަކަމުދާ ނިޒާމުގެ ޙާއްސަ ޑޮކްޓަރު އަދި, ނުފިލާހުންނަ ތަދުތަކަށް ފަރުވާ ދިނުމުގެ އިތުރުން,ނާރުގެ ބަލިތަކުގެ އޮޕަރޭޝަން ޑޮކްޓަރުންގެ ހިދުމަތްވެސް ލިބިގެންދާނޭކަމަށް ކުޅުދުއްފުށީ ހޮސްޕިޓަލުން ބުނެއެވެ.
މި ކޭމްޕްގެ ތެރެއިިން ހޮސްޕިޓަލުގައި މަސައްކަތް ކުރައްވާ ޑޮކްޓަރުންނާއި ނަރުހުންނަށް ތަފާތު ތަމްރީނުތަކާއި ކްލާސްތައް ހިންގުމަށްވެސް ވަނީ ހަމަހެޖެހިފައެވެ.
Advertisement
This content is created and paid for by advertisers and does not involve Voice Journalists
