ހައްޖު ދުވަހާއި އަޟްހާ ޢީދު ބަންދުގައި އިމިގްރޭޝަންގެ ހިދުމަތްދޭނެ ގަޑިތައް އިމިގްރޭޝަނުން އާންމުކޮއްފިއެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވަނީ، ހައްޖު ދުވަހާއި ޢީދު ބަންދުގައިވެސް އެ އިދާރާގެ ޙިދުމަތް ލިބެން ހުންނާނެކަމަށެވެ. އަދި އެ ދުވަސްތަކުގައި ޙިދުމަތްލިބޭނެ ވަކިހާއްސަ ގަޑިތައްވެސް ވަނީ އާންމުކޮށްފައެވެ.

އިމުގާ ޕޯޓަލް މެދުވެރިކޮށް ޕާސްޕޯޓުގެ ހިދުމަތް 24 ގަޑިއިރު ދިނުމަށް ނިންމާފައިވާއިރު، ޕާސްޕޯޓު ދޫކުރުމަށް ވަނީ ވަކި ހާއްސަ ގަޑިތަކެއް ކަނޑައަޅާފައެވެ. އެއީ ހެެެނދުނު 9:00 އިން މެންދުރުފަހު 2:00 އާއި ހަމައަށެވެ. ނަމަވެސް ޖޫން 6 ވާ  ޢަލްހާ ޢީދު ދުވަހު ބަންދުވާނެއެވެ. މި ހިދުމަތް ދެވޭނީ ހަމައެކަނި މާލެ ސަރަހައްދުގައި ހިމެނޭ ޕާސްޕޯޓު އޮފީސްްތަކުން ކަމަށް އިމިގްރޭޝަނުން ބުނެއެވެ.

ވިސާގެ ޙިދުމަތް  ދިނުމަށް ހަމަޖެހިފައިވަނީ ހަމައެކަނި އެމަރޖެންސީ ޙާލަތްތަކުގައި ރާއްޖެއިން ބޭރަށް ފުރާ ބިދޭސީ ފަރާތްތަކަށެވެ. ހަމަ މިއާއެކު ރާއްޖެއަށް އަންނަ ފަރާތްތަކަަށް މި ދުވަސްތަކުގައި ވެސް 'އިމުގާ' ޕޯޓަލް މެދުވެރިކޮށް 'ސްޕޮންސާޝިޕް ޑެކްލަރޭޝަން' އަށް ހުށަހެޅުމުގެ ފުރުސަތު އޮންނާނޭކަމަށް އިމިގްރޭޝަނުން ބުނެއެވެ.

މީގެ އިތުރުން ސީޕޯޓް ޑިވިޝަނުގެ ހިދުމަތްތަކާއި އެންފޯސްމަންޓް ކޮމްޕްލައިންސްގެ ހިދުމަތްތައްވެސް ހަމަޖެހިފައިވާ އުސޫލުގެ ދަށުން އީދު ބަންދުގައި ލިބޭނޭކަމަށް އިމިގްރޭޝަނުން ބުނެއެވެ.