އަޟްހާ އީދު ދުވަހުގެ ހަވީރު މާލެ ސަރަހައްދުގެ މަގުތަކުގައި ވެހިކަލް ދުއްވުން މާލެސިޓީ ކައުންސިލުން މަނާކޮށްފިއެވެ.
މި އަހަރުގެ އަޟްހާ އީދު ފާހަގަކުރުމުގެ ގޮތުން އީދު ދުވަހު މާލެ ސަރަަހައްދުގެ މަގުތަކުގައި ވެހިކަލް ދުއްވުން މަނާކޮށްފައިވަނީ އީދު ދުވަހު ހަވީރު 16:00 އިން 18:00 އާއިހަަމައަށެވެ.
ނަމަވެސް އެމަޖެންސީ ހާލަތުގައި ދަތުރުކުރާ ވެހިކަލްތަކަށް ހަމަޖެހިފައިވާ އުސޫލުން ދަތުރުކުރެވޭނޭކަމަށް ސިޓީ ކައުންސިލުން ބުންޏެވެ. ސިޓީކައުންސިލުން ބުނީ އެންގުމާ ހިލާފަށް އުޅަނދު ދުއްވާ ފަރާތްތަކާމެދު ހަމަޖެހިފައިވާ އުސޫލުގެ ދަށުން ފިޔަވަޅު އަޅާނޭ ކަމަށެވެ.
ކޮންމެ އަހަރެއްގެވެސް އީދު ދުވަހު، ހަވީރު ފައިމަގުގައި އުޅޭގޮތަށް ހަމަޖައްސައެވެ. އޭގެ އެންމެ މުހިއްމު އެއް ބޭނުމަކީ މަގުތަކަށް ނިކުންނަ ފަރާތްތަކަށް އުފާވެރިކަމާއި އަމާންކަމާއެކު ހިނގާބިނގާވެ އުޅެވޭނޭމަގު ތަނަވަސްކޮށްދިނުމާއި އެދުވަހު ހަރަކާތްތައް ހިންގަން ފުރުސަތު ތަނަވަސްކޮށްދިނުމެވެ. މިފަހަރުގެ އީދު ދުވަސްވާނީ އަންނަ ހުކުރު ދުވަހަށެވެ.
Advertisement
This content is created and paid for by advertisers and does not involve Voice Journalists
