‏ޢީދު ފާހަގަ ކުރުމުގައި މުންކަރާތްތަކާ ދުރުހެލިވުމަށް އެދި ޢިލްމުވެރިންގެ ގުޅުމުގެ ފަރާތުން ރާއްޖޭގެ ހުރިހާ ކައުންސިލްތަކަށް ނަސޭހަތުގެ ސިޓީއެއް ފޮނުވައިފި އެވެ.

އެ ސިޓީގައި ބުނެފައި ވަނީ ދިވެހިންނަކީ އިސްލާމް ދީނުގެ ހިދާޔަތް ލިބުމުގެ މަތިވެރި ނިޢުމަތް މާތް ﷲ ދެއްވާފައިވާ ނަޞީބުވެރި ބައެެއް ކަމަށާ ރާއްޖެއަކީ، މުޅި ދުނިޔޭގައި ވެސް އޮތް ސައްތައިން ސައްތަ އިސްލާމީ މަދު ޤައުމުތަކުގެ ތެރޭގައި ހިމެނޭ ޤައުމެއް ކަމުން މި މަތިވެރި ނިޢުމަތަށް ޓަކައި، މާތް ﷲ ގެ ޙަޟްރަތަށް، ތާއަދަބުމެ، ޝުކުރުވެރިވުން މަތީގައި ދެމިތިބުމަކީ އަޅުގަނޑުމެންގެ ތެރެއިން ކޮންމެ މީހަކު ވެސް ކުރަންޖެހޭ ކަމެއް ކަމަށެވެ.

އަދި މިފަދަ މަތިވެރި ނިޢުމަތްތަކަށް ޝުކުރުވެރިވުމުގެ ތެރޭގައި ހިމެނޭ އެންމެ މުހިންމު ކަމަކީ، މާތް ﷲ ގެ އަމުރުފުޅުތަކަށް ކިޔަމަންވުމާއި، އެކަލާނގެ ޙަރާމްކުރައްވާފައިވާ މުންކަރާތްތަކުން ދުރުހެލިވެ ތިބުންކަން ފާހަގަ ކޮށްފައިވެ އެވެ.

“އެހެންކަމުން، އަޅުގަނޑުމެންނާ ބައްދަލުކުރަން ކުޑަތަންވެފައިވާ، މިއަހަރުގެ އަޟްޙާ ޢީދު ދުވަހާއި، އެނޫންވެސް ކޮންމެ އަހަރަކު އަޅުގަނޑުމެންނާ ބައްދަލުކުރާ ޝަރުޢީ ޢީދުތައް ފާހަގަކުރުމަށް ޓަކައި އެކަލާނގެ އަންގަވާފައިވާ ކަންކަން ކުރުމުގެ އިތުރުން، އެކަލާނގެ ދީނުގައި ކަނޑައެޅިގެން ޙަރާމް ކަމުގައި ކަނޑައަޅުއްވައި، އެކަލާނގެ ނަބިއްޔާ صلى الله عليه وسلم ގެ ޙަދީޘް ބަސްފުޅުތަކުގައި ޞަރީޙަކޮށް ބަޔާންކޮށްދެއްވާފައިވާ މުންކަރާތްތައް ކަމުގައިވާ، ހިލޭ އަންހެނުންނާއި ހިލޭ ފިރިހެނުން، ޢައުރަ ރަނގަޅަށް ނިވާކުރުމެއް ނެތި، މައްސުނިވެގެން ހިންގާ ޙަރަކާތްތަކާއި، ލަވައާއި މިޔުޒިކު ފަދަ މުންކަރާތްތަކާ ދުރުހެލިވުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެއްކަން ހަނދުމަފުޅުކޮށް އަރުވަމެވެ،”

ވަކިން ޚާއްޞަކޮށް މީސްތަކުންގެ ކަންކަން ބަލަހައްޓައި ރާވައި ހިންގުމުގެ މަޤާމުތަކުގައި ތިބޭ ފަރާތްތަކަށް މިކަމުގެ ޒިންމާ ވަކީން ބޮޑުކަމާއި، އެކަންކަމާ މެދު ޖަވާބުދާރީ ވާންޖެހޭނެކަން ވެސް ހަނދާންކޮށްދީފައިވެ އެވެ. އަދި ކީރިތި ގުރުއާން އެކަމުގެ ދަލީލު ދައްކާފައިވެ އެވެ.

އެފަދަ މަސްއޫލިއްޔަތެއް ހަވާލުކުރައްވާފައިވާ ކޮންމެ ފަރާތަކީ މުންކަރާތްތައް ހުއްޓުވުމުގެ މަތިވެރި މަސްއޫލިއްޔަތު މާތް ﷲ ހަވާލުކުރައްވާފައިވާ ބައެއް ކަމަށާ އެކަމުގައި ފަރުވާކުޑަކޮށް، އިހުމާލުވެއްޖެ ނަމަ، ނުވަތަ އެފަދަ މުންކަރާތްތައް ރާވައި ހިނގައި، އެކަންކަން އިންތިޒާމު ކުރުމުގައި އެއްވެސް ހައިސިއްޔަތަކުން ބައިވެރިވާ ނަމަ، އެއީ އެ ފަރާތްތަކާއި، އެ މުޖުތަމަޢުއެއް ވެސް މާތްﷲގެ ކޯފާއަށް ހުށަހެޅުމުގެ ސަބަބަކަށް ވެގެންހިނގައިދާނެ ފަދަ ނުރައްކާތެރި ކަމެއްކަން ވެސް ހަނދާން ކޮށްދީފައިވެ އެވެ. 

“ވީމާ، މާތް ﷲ އަށް ޝުކުރުވެރިވެ އެކަލާނގެ މަތިވެރި ކުރުމަށް ޓަކައި، މުއުމިނުންނަށް ޝަރުޢު ކޮށްދެއްވާފައިވާ ޢީދުތައް ފާހަގަކުރުމުގައި ދެ ޖިންސު މައްސުނިވުމާއި، ހިލޭ އަންހެނުންނާއި ހިލޭ ފިރިހެނުން އެއްބައެއް އަނެއް ބައެއްގެ ކުރިމަތީ ނެށުމާއި، މިއުޒިކު ކުޅުން ފަދަ ކަންކަމާ ދުރުހެލިވެ ތިއްބެވުމަށާއި، ތިޔަ ބޭފުޅުންގެ ބެލުމުގެ ދަށުގައި ތިއްބެވި ރައްޔިތުން ވެސް އެފަދަ ކަންކަމުން ދުރުހެލިކުރުވުމަށް ނަޞޭޙަތްތެރިވަމެވެ. އަދި އިސްލާމީ ޢީދުތައް ފާހަގަ ކުރުމަށް ޓަކައި، މާތް ﷲ ތަނަވަސް ކޮށްދެއްވާފައިވާ ޙަލާލު، ހުއްދަ އެހެނިހެން ކުޅިވަރުތަކާއި، އިޖުތިމާޢީ ގުޅުން ބަދަހިވާ ފަދަ އެހެނިހެން ޙަރަކާތްތަކުގެ ބޭނުން ހިއްޕެވުމަށް ވަޞިއްޔަތްކުރަމެވެ،” އިލްމުވެރީންގެ ގުޅުމުގެ ސިޓީގައިވެ އެވެ.