އީދު ފާހަގަކުރުމުގެ ނަމުގައި ބައެއް މީހުން ދީނާ ހިލާފު އެތައް ކަމެއް ކުރަމުން ގެންދާއިރު ބޮޑުވަރިހަމައިގައި ތިބެންވީތޯ ދައުލަތަށް ގިނަ ހިދުމަތްތަކެއް ކުރަައްވާފައިވާ މުހައްމަދު މުއިއްޒު އަދުނާން ސުވާލު ކުރައްވައިފި އެވެ.

މުއިއްޒު މި ސުވާލު ކުރައްވާފައި ވަނީ އިއްޔެ ފާހަގަކުރި އަލްހާ އީދާއި ގުޅިގެން ބައެއް ރަށްރަށުގައި ނެރުނު މާލީގެ ތެރެއިން ދެ މާއްޔެއްގެ ފޮޓޯ ހިމަނާ ކުރެއްވި ޕޯަސްޓެއްގަ އެވެ.

އޭގެ ތެރެއިން އެއް ފޮޓޯގައި ފެންނަނީ ލައުނަތް ލެއްވިގެންވާ ހާމާންގެ ސިފަ ޖެހިގެން ހުރި މީހެކެވެ. ދެން ފެންނަނީ މުޅި ގައިގައި ކަޅުކުލަލާ ޝައިތާނީ ސިފައެއް ޖެހިފައިވާ މާއްޔެކެވެ.

މުއިއްޒު ވަނީ މިއީ ވެސް ބަޔަކު އީދު ފާހަގަ ކުރުމަށް ކޮށްފައިވާ ކަމެއްކަން ފާހަގަކުރައްވާ މިކަންކަމާ އިސްލާމީ އީދުތަކާ ހުރި ގުޅުމަކީ ކޮބައިތޯ ސުވާލު ކުރަައްވާފަ އެވެ. އަދި މިއީ ދިވެހި ސަގާފަތާ ގުޅުން ހުރި ކަމެއްތޯ ވެސް ސުވާލު ކުރައްވާފައިވެ އެވެ.

އޭގެ ފަހުން ދެން ސުވާލު ކުރައްވާފައި ވަނީ މިދަރަޖަށް ކަންކަން ދާއިރުވެސް ބޮޑުވަރިހަމާގައި ތިބެންވީތޯ އެވެ.

“ޢީދު ފާހަގަކުރަނީޔޯ. އަޅުގަނޑުގެ ކަޓުމުއްލާކަމުން މިފަދަ މަންޒަރުތަކުން ހިތަށް ވަންނަނީ ޝައިތާނީވަންތަ މަންޒަރު. މިފަދަ ކަންކަމާ އިސްލާމީ ޢީދާއި ދިވެހި ޘަޤާފަތާ ހުރީ ކޮންގުޅުމެއްތޯ؟ ބޮޑުވަރިހަމައިގައި ހަމަ ތިބެންވީތޯ؟” މުއިއްޒު ސުވާލު ކުރައްވާފައިވެ އެވެ.

އިސްލާމީ މިފަދަ މަތިވެރި ދުވަހެެއްގައި ސައްތައިން ސައްތަ އިސްލާމީ މި ގައުމުގެ ބައެއް ރަަށްރަށުން މިފަދަ ހިތާމަވެރި މަންޒަރުތައް ފެންނާތީ އެތައް ބަޔަކު ވަނީ ކަންބޮޑުވުން ފާޅުކޮށްފަ އެވެ. އޭގެ ތެރޭގައި ދީނީ އިލްމުވެރީން ވެސް ހިމެނިވަޑައިގަންނަވަ އެވެ.

މަޝްހޫރު ދީނީ އިލްމުވެރިޔާ ޑރ. މުހައްމަދު ޤުބާދު އަބޫބަކުރު ވެސް މި ދެ ފޮޓޯ ހިއްސާކުރައްވާ އެކަމާ ކަންބޮޑުވުން ފާޅު ކުރައްވާފަ އެވެ. ޑރ. ޤުބާދު އެކަން ސިފަ ކުރެއްވީ އެބައެއްގެ ތެރޭގައި ލަދުވެތިކަން ނެތް ބަޔަކު ހިންގާނެ އަމަލުތަކެއްގެ ގޮތުގަ އެވެ.

އަދި މާތް ނަބިއްޔާގެ ބަސްފުޅެއް ހިއްސާ ކުރައްވާފައިވެ އެވެ:

ދީނީ އިލްމުވެރިޔާ އައްޝައިހް ޒަމްޒަމް ފާރިސް ވެސް ވަނީ އެ އަމަލުތަކާމެދު ކަންބޮޑުވުން ފާޅުކުރައްވާފަ އެވެ. ވިދާޅުވީ މާތް ﷲ އަށް ޝުކުރުވެރިކަން ފާޅުކުރުމަށް މުއުމިނުންނަށް ޝަރުޢުކުރެއްވި ޢީދު ދުވަސްތަކުގައި ވެސް ބައެއް މީހުން ފާޅު ކުރަނީ މާތް ﷲ ލަޢުނަތް ލައްވައި ޖަހަންނަމައިގެ އަނގުރު އަލިފާން ކަށަވަރު ކުރައްވާފައިވާ ހާމާނު ފަދަ ރަތްލާޖެހި ކުރުފުގެ ޝިޢާރުތައް ކަމަށެވެ.

“ޖާހިލުކަމުގެ ވެސް އިންތިހާ. والله المستعان. މިހުންނަނީ ދައުލަތުގެ ފަރާތުން ފިޔަވަޅު އަޅަންޖެހޭ ކަންކަން” ޒަމްޒަމް ވިދާޅުވި އެވެ.

އީދު ފާހަގަކުރުމުގެ ނަމުގައި ބައެއް މީހުން ދީނާ ހިލާފު މިފަދަ ކަންކަން ކުރުމުން އެކަން ކުށްވެރިކޮށް އިލްމުވެރީންނާއި އާންމުންގެ ގިނަ ބަޔަކު ކަންބޮޑުވުން ފާޅުކުރި ނަމަވެސް ބައެއް މީހުން ދަނީ އެކަންކަން ދިފާއު ކުރަމުންނެވެ.

އަދި އެއީ ޒަމާނުއްސުރެ ދިވެހީންގެ މެދުގައި އޮތް ސަގާފީ ކަމެއް ކަމަށް ބުނެ ބައެއް މީހުން ދަނީ އިލްމުވެރީންނަށް ހުތުރު ބަސްތައް ގޮވަމުންނެވެ.