ލ. ގަމާއި ފޮނަދޫއާއި ދެމެދު ގުޅާލާފައިވާ ލިންކް ރޯޑުގައި ރޭގައި ހިނގި ނުރައްކާތެރި އެކްސިޑެންޓްގައި އަނިޔާވި މީހުންގެ ތެރެއިން އެކަކަށް އިތުރު ފަރުވާ ދިނުމަށްޓަކައި މާލެ ގެނެސްފިއެވެ.

މި އެކްސިޑެންޓްގައި އަނިޔާވި 44 އަހަރުގެ މީހާގެ ކޮންމެހެން ހަދަންޖެހޭ ސާޖަރީތަކެއް ހެދުމަށް މާލެ ފޮނުވާލާފައިވާކަމަށް ގަމު ރީޖަނަލް ހޮސްޕިޓަލުން ވަނީ ބައެއް މީޑިއާތަކަށް މައުލޫމާތު ދީފައެވެ. އެމީހާ މާލެ ފޮނުވާލީ އެ ހޮސްޕިޓަލުން ސާޖަރީ ނުހެދޭތީއެވެ. މައުލޫމާތު ލިބިފައިވާ ގޮތުގައި އެމީހާގެ ފައިގެ ދެ ތަނަކުން ވަނީ ބިނދިފައެވެ.

ފުލުހުން ބުނެފައިވާ ގޮތުގައި މި އެކްސިޑެންޓް ހިނގީ ރޭ 7 ޖަހާކަންހާއިރެވެ. އެކްސިޑެންޓްގައި އަނިޔާވެފައިވަނީ ސައިކަލުގައި ދުއްވާފައި ދިޔަ ދެ މީހުންނަށެވެ. އަނިޔާވި ދެ މީހުންގެ ވެސް ބޮލުގެ އެކި ހިސާބުތަކަށާއި ދެ ފަޔަށް ވަނީ އެކި ވަރުގެ ޒަހަމްތަކެއް ލިބިފައެވެ.

ސައިކަލު ފަހަތުގައި އިން މީހާއަށް ވަނީ ގަމު ރީޖަނަލް ހޮސްޕިޓަލުގައި ފަރުވާ ދިނުމަށްފަހު ދޫކޮށްލައިފައެވެ. އަދި އެކްސިޑެންޓްގައި ކާރު ދުއްވަން އިން 62 އަހަރުގެ ދިވެހި ފިރިހެންމީހާއަށް އެއްވެސްވަރެއްގެ އަނިޔާއެއް ލިބިފައިނުވެއެވެ.

ފުލުހުންދަނީ މިމައްސަލަ އިތުރަށް ތަހުގީގުކުރަމުންނެވެ.