އެމްޓީސީސީގެ އަމާޒަކީ މިއަހަރު ނިމުމުގެ ކުރިން 59 މަޝްރޫޢުއެއްގެ މަސައްކަތް ނިންމައި ހަވާލުކުރުންކަމަށް އެކުންފުނީގެ ސީއީއޯ އަހުމަދު ސައުދީ ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަދައްކަވަމުން ސައުދީ ވިދާޅުވީ، އެމްޓީސީސީއަށް މިހާރުވެސް ސަރުކާރުގެ 200 އެއްހާ މަޝްރޫޢު ލިބިފައި އެބައޮތްކަމަށާއި، އެގޮތުން އެކުންފުނިން އަމާޒުހިފާފައިވަނީ ކުރިއަށް މިއޮތް ދެ އަހަރުދުވަހުގެ ތެރޭގައި 131 މަޝްރޫޢުގެ މަސައްކަތް ނިންމުމަށްކަމަށެވެ. މިހިނގާ އަހަރު ނިމުމުގެ ކުރިން 59 މަޝްރޫޢުގެ މަސައްކަތް ނިންމުމަށް ހަމަޖެހިފައިވާއިރު، އަންނަ އަހަރުގެ ތެރޭގައި 72 މަޝްރޫޢު ނިންމުމަށް ކަނޑައަޅާފައިވާކަމަށް ސީއީއޯ ވިދާޅުވިއެވެ.

އެމްޓީސީސީން އަންނަނީ ރާއްޖޭގެ އިގްތިސާދުގެ ތެރޭގައި ހިމެނޭ އުމްރާނީ ތަރައްޤީގެ ގިނަ މަޝްރޫޢުތަކެއް ހިންގަމުންނެވެ. މީގެ ތެރޭގައި ބިންހިއްކުމާއި އަތޮޅުގެ ރަށްރަށުގެ ބަނދަރުތައް ހެދުމުގެ މަސައްކަތާއި އެއާޕޯޓްތައް ހެދުމުގެ މަސައްކަތްތައް ހިމެނެއެވެ. ސީއީއޯ ސައުދީ ވިދާޅުވީ، މިއަހަރުގެ ތެރޭގައި ސަރުކާރުން އެކުންފުންނަށް 20 މަޝްރޫޢުއެއް ހަވާލުކޮށްފައިވާއިރު، މިހާރު މަސައްކަތްތައް ހަމަޖެހިފައިވާގޮތަށް ކުރިއަށްދާގޮތުން މަހެއްގެ ތެރޭގައި 6 ނުވަތަ 7 މަޝްރޫޢު ނިންމައި ހަވާލުކުރެވޭނޭ ކަމަށެވެ. 

މި ފަސް އަހަރު ވެގެންދާނީ ރާއްޖޭގެ ތާރީހުގައިވެސް އެންމެގިނަ އުމްރާނީ ތަރައްޤީގެ މަސައްކަތްތައް ކުރެވިގެންދާ ފަސް އަހަރުކަން ފާހަގަކުރައްވަމުން ސީއީއޯ ވިދާޅުވީ، މީގެ ތެރޭގައި ސަރުކާރުގެ ހާއްސަ މަޝްރޫޢުތައް ހިމެނޭކަމަށެވެ. މިގޮތުން އެޑިއުކެޝަން މިނިސްޓްރީ، ހެލްތް މިނިސްޓްރީ، ހޯމް މިނިސްޓްރީ، އަދި އިސްލާމިކް މިނިސްޓްރީގެ އިތުރުންވެސް އެކިއެކި މުއައްސަސާތަކުގެ މަޝްރޫޢުތައް ހިމެނޭކަން ފާހަގަކުރެއްވިއެވެ.

ސައުދީ އިތުރަށް ވިދާޅުވީ އެމްޓީސީސީއާ ހަވާލުކޮށްފައިވާ މަޝްރޫޢުތައް ކަނޑައެޅިފައިވާ ތާވަލާއެއްގޮތަށް ކުރިއަށް ގެންގޮސް ނިންމާލުމުގެ ގާބިލްކަން އެކުންފުނީގައި އެބަހުރިކަމަށެވެ. އެގޮތުން އެމްޓީސީސީއަކީ ރައްޖޭގެ ކޮންސްޓްރަކްޝަން ސިނާއަތުގައި ހަރަކާތްތެރުވާ އެންމެ ދުވަސްވީ ކުންފުނިކަން ފާހަގަކުރައްވަމުން ސީއީއޯ ވިދާޅުވީ މެޝިނަރީއަކަށް މައްސަލަ ޖެހުނު ނަމަވެސް އެއެއްޗެއް ހައްލުކުރުމުގެ ގާބިލްކަން އެކުންފުނީގެ އެބައޮތްކަމަށެވެ. 

ތަރައްޤީގެ މަޝްރޫޢުތައް ހިންގުމުގެ އިތުރުން އެމްޓީސީސީން ދަނީ ރައްޔިތުންނަށް ދަތުރުފަތުރުގެ ހިދުމަތްވެސް ފޯރުކޮށްދެމުންނެވެ. ސީއީއޯ ސައުދީ ވިދާޅުވީ މިމަހުގެ ތެރޭގައި އެމްޓީސީސީން ރ އަތޮޅުގައި އާރުޓިއެލްގެ ހިދުމަތް ފެށިގެންދާއިރު، އަންނަ ޖުލައިމަހުގެ ތެރޭގައި ބ އަތޮޅުގެ ރަށްތަކަށް އެ ހިދުމަތް ފެށިގެންދާނޭކަމަށެވެ.

އެމްޓީސީސީއަކީ ދިވެހި ރައްޔިތުންނަށް އެންމެ ފުރަތަމަ ހިއްސާވިއްކަން ފެށި ކުންފުންޏެވެ.