ރާއްޖެ އެތެރެކުރަން އުޅުނު 18 ކިލޯގެ މަސްތުވާތަކެތި އަތުލައިގަނެ އެ ތަކެތި އަޅާފައިހުރި އެއްޗެއްސާ ހަވާލުވާން ދިޔަ ބިދޭސީ މީހާ ހައްޔަރު ކުރުމަށް ފަހު ބަންދުން ދޫކޮށްލައިފި އެވެ.
އެ މައްސަލާގައި ހައްޔަރު ކުރީ ބަންގްލަދޭޝްއަށް ނިސްބަތްވާ އުމުރުން 35 އަހަރުގެ ފިރިހެނެކެވެ. ފުލުހުން ބުނީ އެ މީހާ މިހާރު ދޫކޮށްލާފައިވާ ކަމަށެވެ. ސަބަބެއް ކަމަށް ބުނީ އޭނާ އާއި މަސްތުވާތަކެތި އެތެރެކުރި މީހުންނާ ގުޅުމެއް އޮތް ކަމަށް ތަހުގީގަށް ނުފެންނާތީ ކަމަށެވެ.
މޯލްޑިވްސް ކަސްޓަމްސް އިން ބުނީ އެ ތަކެތި އަތުލައިގަތީ އިންޓެލިޖެންސަށް ލިބުނު މައުލޫމާތަކާއި ގުޅިގެން ކަމަށެވެ. 18 ކިލޯގެ މަސްތުވާތަކެތި އެތެރެކުރަން އުޅުނީ ޕްލާސްޓިކް ގަސް ޕޮޓްތަކެއްގަ ފޮރުވައިގެންނެވެ.
މި ތަކެތީގެ އަގު 26 މިލިއަން ރުފިޔާއަށް އަރާ ކަމަށް ކަސްޓަމްސް އިން ބުނެ އެވެ. މި ތަކެތި ފޮރުވާފައި ހުރީ 33 ޕެކެޓެއް ގައި ކަމަށެވެ.
އަދި މި ތަކެތި ޓެސްޓްކުރިއިރު މަސްތުވާތަކެތީގެ ބާވަތެއްކަމުގައިވާ ކެނަބިނޮއިޑް އޮއިލްއަށް ޕޮޒިޓިވް ވެފައިވާ ކަމަށެވެ. މަސްތުވާތަކެތި އެތެރެކުރީ ބެންގަލޫރު މަގުން ރާއްޖެއައި ފްލައިޓަކުން ކަމަށް ވެސް ބުންޏެވެ.
Advertisement
This content is created and paid for by advertisers and does not involve Voice Journalists
