މަޖީދީމަގުގައި ޕާކުކުރާ ވެހިކަލްތައް ޓޯ ކުރަނީ، ދޫކުރާނީ ދެ ދުވަސް ފަހުން
މަޖީދީމަގުގައި އާންމު ދަތުރުފަތުރަާއި ޕަބްލިކް ޓްރާސްޕޯޓަށް ދަތިވާ ގޮތަށް ގަވާއިދާ ހިލާދަށް ޕާކުކުރާ ވެހިކަލްތައް ޓޯ ކުރާނެ ކަމަށް ފުލުހުން ބުނެފި އެވެ.
ފުލުހުން މިރޭ އާންމުކުރި ބަޔާނެއްގައި ބުނެފައި ވަނީ މަޖީދީ މަގުގައި އާންމު ދަތުރުފަތުރާއި ޕަބްލިކް ޓްރާންސްޕޯޓަށް ދަތިވާގޮތަށް ގަވާއިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯ ކުރުމުގެ މަސައްކަތް ކުރަމުން ގެންދާ ކަމަށެވެ.
އެގޮތަށް ޕާކް ކޮށްފައިވާ އުޅަނދު ދުއްވި މީހަކާމެދު ވެސް ފިޔަވަޅު އަޅާނެ ކަމަށް ބުންޏެވެ. އަދި ބުނީ މިގޮތަށް ޓޯ ކުރެވޭ އުޅަނދުތައް ދޫކުރާނީ 48 ގަޑިއިރު ފަހުން ކަމަށެވެ.
އުޅަނދުތައް ޕާކްކުރުމަށްޓަކައި ކަނޑައެޅިފައިވާ ޕާކިން ޒޯންތަކުގައި ޕާކު ކުރުމަށް ހާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސް ކޮށްފަ އެވެ.
އަދި މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މަސައްކަތްތަކަށް އާންމު ރައްޔިތުން ދޭ އެއްބާރުލުމަށް ފުލުހުން ވަނީ ޝުކުރު އަދާކޮށްފަ އެވެ.
މާލޭގެ މައި މަގު ކަމަށްވާ މަޖީދީމަގަކީ އެންމެ ކާރޫބާރު ބޮޑު މަގެވެ. އެ މަގުގެ ދެ ފަރާތުގައި ޕާކު ކުރުން ވަނީ މަނާކޮށްފަ އެވެ. ނަމަވެސް ގަވާއިދާ ހިލާފަށް ޕާކުކުރުން ވަނީ ހައްދުން ނައްޓާފަ އެވެ. އެކަމުގެ ސަބަބުން ހިނގާ އުޅޭ މީހުންނާއި ވެހިކަލް ދުއްވާ މީހުންނަށް ވެސް ވަރަށް ބޮޑަށް ދަތިވެ އެވެ.
Advertisement
This content is created and paid for by advertisers and does not involve Voice Journalists
