ގައިންގަޔަށް އަރާ ނުރައްކާތެރި ބައްޔެއް ކަމަށްވާ މެނިންގޮކޯކަލްގެ ކޭހެއް ރާއްޖެއިން ފެނުމާއި ގުޅިގެން ހެދި ކޮންޓެކްޓް ޓްރޭސިން ނިމިފައިވާ ކަމަށާއި، އެ ބަލި ޖެހިފައިވާ އިތުރު މީހަކު ރާއްޖެއިން ފެނިފައި ނުވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފިއެވެ.

ރާއްޖެއިން މެނިންގޯކޮކަލްގެ ކޭހެއް ފެނުމުގެ ސަބަބުން ރައްކާތެރިކަމުގެ ފިޔަވަޅު އަޅަން ފަށައި، އެ ބަލި ޖެހިފައިވާ އިތުރު މީހަކު ހުރިތޯ ބެލުމަށް ކޮންޓެކްޓް ޓްރޭސިން ހެދުމުގެ މަސައްކަތް އެޗްޕީއޭއިން ވަނީ މިމަހުގެ 7 ވަނަ ދުވަހު ފަށާފައެވެ. އެއީ މި ބަލީގައި އުމުރުން 24 އަހަރުގެ ދިވެހި ޒުވާނަކު ވަނީ މަރުވުމާއި ގުޅިގެންނެވެ.

އެޗްޕީއޭއިން ބުނެފައިވާ ގޮތުގައި މެނިންގޯކޮކަލް ބަލީގެ ކޮންޓެކްޓް ޓްރޭސިން މިހާރު ވަނީ ހަދައި ނިމިފައެވެ. އަދި އޭގެ ތެރެއިން އެއްވެސް މީހަކު ބަލީގެ އަލާމާތެއް ހުރިކަމަށް ރިޕޯޓުކޮށްފައި ނުވާކަމަށެވެ.

މެނިންގޯކޮކަލް ބައްޔަކީ ބެކްޓީރިއާއަކުން ޖެހޭ ވަރަށް ނުރައްކާތެރި ބައްޔެކެވެ. މިހާތަނަށް ރާއްޖެއިން މެނިންގޯކޮކަލް ބަލި ފެނިފައިވަނީ ރާއްޖެއިން ބޭރުން ބަލި ޖެހިގެން އައި މީހުންގެ ގައިން ކަމަށް އެޗްޕީއޭއިން ބުންޏެވެ. އަދި ހަމައެހެންމެ މެނިންގޯކޮކަލް ބައްޔަކީ ނޭވާލާ ނިޒާމުގެ ޒަރީއާއިން ފެތުރޭ ބައްޔެކަމުން، މި ބަލި ޖެހިފައިވާ މީހަކާއިއެކު ގިނަ ވަގުތު ހޭދަކޮށް އުޅޭ މީހުންގެ ގަޔަށް ޖަރާސީމު އެރުމުގެ ފުރުސަތު ބޮޑެވެ.

މެނިންގޯކޮކަލް ބަލީގެ އަލާމާތްތަކުގެ ތެރޭގައި:

- ހުން އައުން

- ހަމުގައި ރަތް ބިހިތަކެއް ނެގުން

- ބޮލުގައި ރިއްސުން 

މެނިންގޯކޮކަލް ބަލީގައި ބޮޑުވަރުވުމުން ސިކުނޑިއަށް އެކަމުގެ އަސަރު ކުރުމުގެ އިތުރުން މުޅި ހަށިގަނޑަށް އިންފެކްޝަން ފެތުރުމުގެ ފުރުސަތު ބޮޑެވެ. މެނިންގޯކޮކަލް ބަލީގެ އަލާމާތްތައް ފެންނަން ފަށާނީ ބަލިޖެހޭތާ އެއް ދުވަހާއި 10 ދުވަހާ ދެމެދުގެ މުއްދަތުގައެވެ.