އީރާނުން ނިރުބަވެރި އިޒުރޭލަށް ދިން ހަމަލާތަކެއްގައި އިޒުރޭލުގެ 8 މީހަކު މަރާލައިފިއެވެ.

އީރާނުން ވަނީ ނިރުބަވެރި އިޒުރޭލުން ހިފާފައިވާ ސަރަހައްދުތަކަށް އަމާޒުކޮށް ވައިގެ މަގުން ހަމަލާތައް ދީފައެވެ. އެގޮތުން ތެލް އަވީވް އަށާއި ހައިފާގެ އެކި ހިސާބުތަކަށް އީރާނުންވަނީ ވައިގެ މަގުން ހަމަލާދީފައެވެ. އިޒުރޭލުން ދެމުންދާ ހަމަލާތަކަށް ފަސްޖެހުމެއްނެތި ރައްދުދެމުންދާނެކަމަށާއި މިކަން ވެގެންދާނީ އިސްރާއިލަށް ވޭންދެނިވި އަދި ހިތާމަވެރި ހަމަލާތަކަކަށް ކަމަށް އީރާނުން ވަނީ މީގެ ކުރިން ބުނެފައެވެ.

ދެފަރާތުންވެސް ހަމަލާ ބަދަލު ކުރަން ފަށާފައި މިވަނީ އިޒުރޭލުން އިސްވެ އީރާނުގެ ނިއުކުލިއަރ މަރުކަޒު ތަކަކަށް އަމާޒުކޮށްދިން ހަމަލާތަކުގައި އީރާނުގެ ބާރުގަދަ އިސްލާމީ އިންޤިލާބީ ލަޝްކަރުގެ އިސް ކޮމާންޑަރު ޙުސައިން ސަލާމީއާއި އަސްކަރިއްޔާގެ އިސް ޖެނެރަލް މުޙައްމަދު ބާޤިރީގެ އިތުރުން، އެ ޤައުމުގެ ނިއުކްލިޔަރ ޕުރޮގުރާމުގައި މަސައްކަތްކުރާ ހަ ސައިންޓިސްޓަކު ޝަހީދުވުމާއި ގުޅިގެންނެވެ.

އީރާނުން މިވަނީ ބަދަލު ހިފުމުގެ ގޮތުން އިޒުރޭލަށް ނުރައްކާތެރި ހަމަލާތަކެއްދީފައެވެ. އެގޮތުން ތެލް އަވީވް އަށް އަމާޒުކޮށް ދިން ހަމަލާތަކުގައި ތެލްއަވީވްގެ އިމާރަތްތަކެއްވަނީ ބިމާއި ހަމަވެފައެވެ. މި މަންޒަރުތަކުގެ ފޮޓޯ ނުނެގުމުަށާއި ދުރަށް ނުދެއްކުމަށް އިޒުރޭލުގެ ސަރުކާރުން ވަނީ އެޤައުމުގެ މީޑިއާތަކަށް އަންގާފައެވެ.

މީގެ އިތުރުން އިޒުރޭލުން އީރާނަށް ދިން ހަމަލާތަކުގައި 80 މީހުން ޝަހީދުވެފައިވާކަމަށާއި މީގެ ތެރޭގައި 20 ކުޑަކުދިން ހިމެނޭކަމަށް އީރާނުން ވަނީ ބުނެފައެވެ. އަދި 800 އަށް ވުރެ ގިނަ މީހުން މި ހަމަލާތަކުގައި ޒަހަމްވެފައިވާކަމަށް އީރާނުގެ މީޑިޔާތަކުން ވަނީ ރިޕޯޓްކޮށްފައެވެ.

މަސްރަހު ދިރާސާ ކުރާ ފަރާތްތަކުން ބުނާ ގޮތުގައި، އިޒްރޭލުން އީރާނަށް ހަމަލާދިން މައިގަނޑު ސަބަބަކީ އީރާނުން ނިއުކްލިއަރ ހަތިޔާރު އުފެއްދުމަށް ކުރަމުންދާ މަސައްކަތަށް ހުރަސް އެޅުން ކަމަށްވުމަކީ އެކަށީގެންވާ ކަމެކެވެ. ސަބަބަކީ އީރާނުން ނިއުކްލިއަރ ހަތިޔާރު އުފެއްދައިފިނަމަ މެދު އިރުމަތީގައި އީރާނުގެ ބާރު ގަދަވުން އެކަށީގެންވާތީއެވެ. ހަމައެހެންމެ އެމެރިކާގެ ރައީސް ޑޮނާލްޑް ޓްރަމްޕް ވަނީ އީރާނަށް ނިއުކްލިއަރ ހަތިޔާރު އުފެއްދުމަށް އެއްވެސް ފުރުސަތެއް ނުދޭނެކަމަށް ބުނެ އިންޒާރުވެސް ދީފައެވެ.

އީރާނުން އިޒުރޭލުގެ މުހިއްމު ސިޓީތަކަކަށް ހަމަލާދިން ވަގުތު، ގިނަބަޔަކު ވަނީ ބިންގަރާސްތަކަށްވަދެ އެތަންތަނުން ހިމާޔަތް ހޯދާފައެވެ. އަދި އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ޤައުމުދޫކޮށް ފިލާފައިވާކަމަށް އަޑުތަށް ފެތުރިފައިވެއެވެ.