މޯލްޑިވްސް ބްރޯޑްކާސްޓިން ކޮމިޝަންގެ މެންބަރު ކަމަށް ކުރިމަތިލި ކެންޑިޑޭޓުންނާއި ސުވާލުކޮށް ޝަރުުތު ހަމަވާ ކެންޑިޑޭޓުން ކޮމެޓީން ކަނޑައަޅައިފި އެެވެ.

ބްރޯޑްކާސްޓިން ކޮމިޝަންގެ މެންބަރު ކަމަށް ހުޅުވާލީ އެ ކޮމިޝަންގެ މެންބަރު އައިމިނަތު އަމީނާ (އަނާ) ގެ ދައުރު ހަމަވާތީ އެވެ. އަނާގެ ދައުރު މިއަދު ވަނީ ހަމަވެފަ އެވެ.

އެހެން ކަމުން ކޮމިޝަނަށް މެންބަރު އައްޔަނު ކުރުމަށް, ހުޅުވާލުމުން ކުރިމަތިލި ކެންޑިޑޭޓުންނާއި ކޮމެޓީން ވަނީ މިދިޔަ ބުރާސްފަތި ދުވަހު އިންޓަވިއު ކޮށްފަ އެވެ. ފަސް ކެންޑިޑޭޓަކާއި އިންޓަވިއު އެވެ. އެއީ;

* ޒަމްއަތު އަހްމަދު ވަހީދު

* ޒީނާ ޒާހިރު 

* ޝިމާލް އަހްމަދު

* އަޝްރަފު އަލީ

* އަލީ ޔޫސުފް 

ކޮމެޓީން ނިންމީ އެ ކެންޑިޑޭޓުންގެ ތެރެއިން ޝަރުތު ހަމަވަނީ ތިން ކެންޑިޑޭޓުންގެ ކަމަށެވެ. އެއީ އަންހެން ތިން ކެންޑިޑޭޓުންނެވެ. ކޮމެޓީގެ ނިންމުމަކީ ޝަރުތު ހަމަވާ ކަމަށް ނިންމާނީ 75 އިންސައްތައިން މަތީ މާކުސް ލިބިގެން ކަމަށެވެ.

ކޮމެޓީގެ ނިންމުމުގައި ކުރީގައި އޮތީ ޒަމްއަތު އެވެ. ޒަމްއަތަށް 89.29 މާކުސް ލިބިފައިވެ އެވެ. ބްރޯޑްކާސްޓިން ކޮމިޝަންގެ މެންބަރު ކަމަށް ކުރީން ހުޅުވާލުމުން އެންމެ މަތީން މާކުސް ލިބުނު ޒީނާއަށް މި ފަހަރު ކޮމެޓީން ދިނީ 84.57 މާކުސް އެވެ. ޝިމްލާއަށް 76.86 މާކްސް އެވެ.

ރައީސްގެ ލިސްޓްގައި ވެސް ކުރީގައި އޮތީ ޒަމްއަތެވެ. މާދަމާ އޮންނަ ޖަލްސާގައި މި ނަންތަކާމެދު ގޮތް ނިންމާނެ އެވެ.