ބަނގްލަދޭޝްގައި ދިހަހާސް އަށްވުރެ ގިނަ މީހުންގެ އަތުން ބޮޑު އަދަދުން ފައިސާ ނަގާފައިވާ އެމްޓީއެފްއީ (MTFE) ނަމަކަށް ކިޔާ ޕޮންޒީ އެޕެއް ކޮލެޕްސްވެ އެ ބޭނުން ކުރާ މީހުންގެ ފައިސާތައް ގެއްލިއްޖެއެވެ.

މިކަން ހާމަވީ މިދިޔަ ބުރާސްފަތި ދުވަހުގެ ރޭ އެމްޓީއެފްއީ ބޭނުންކުރާ ފަރާތްތަކަށް ކުއްލިއަކަށް އެމީހުންގެ ވާރޗުއަލް ޓްރޭޑިންގ އެކައުންޓްތަކުން ބޮޑެތި އަދަދުތަކެއް ގެއްލިފައިވާކަން ފާހަގަކުރެވިގެން ބެލިބެލުމުންނެވެ.

މީޑިއާ ރިޕޯޓްތައް ބުނާ ގޮތުން މީގެ ކުރިން ވެސް ދެ ހަފްތާއެއްހާ ދުވަހު އެމީހުންނަށް ފައިސާ ނެގުމަށް ދަތިތަކެއް ވަނީ ކުރިމަތިވެފައެވެ. 

ޑަކާގައި ދިރިއުޅޭ އެމްޓީއެފްއީ ބޭނުންކުރާ ފަރާތެއް ކަމުގައިވާ އަސަދުރް ރަހްމާން ބުނެފައިވާ ގޮތުން، އޭނާގެ އެމްޓީއެފްއީ ވާރޗުއަލް އެކައުންޓްގައި ހާހެއްހާ ޑޮލަރު ހުއްޓެވެ.

”އެކަމަކު ހުކުރު ދުވަހު ބެލިއިރު އެކައުންޓް ބެލެންސް ދައްކަނީ މައިނަސް 1،400 ޑޮލަރު." އޭނާ ބުނެފައިވެއެވެ. 

އެޕް ކޮލެޕްސް ވުމުން ލިބުނު ގެއްލުންތައް ފޫބެއްދުމަށް އެމްޓީއެފްއީ އިތުރު އިންވެސްޓްމަންޓްތަކަށް އެދެމުންދާއިރު، ނޭނގޭ އޭޖެންޓުތަކެއް މެދުވެރިކޮށް އެއަށް އިންވެސްޓް ކުރި މީހުންނަށް ބިރުދައްކަމުން އަންނަ ކަމަށްވެސް އެ ބޭނުންކުރާ މީހުން އަންނަނީ ބުނަމުންނެވެ. އެގޮތުން، އިތުރު ފައިސާ ނުދައްކައިފިނަމަ ޤާނޫނީ ފިޔަވަޅު އަޅާނެކަމުގެ އިންޒާރު ދީފައިވާކަމަށް އެމީހުން ބުނެފައިވެއެވެ.

ޑަކާގައި ދިރިއުޅޭ، މި އެޕް ބޭނުންކުރާ މީހެއް ކަމުގައިވާ މޮއިނުލް އިސްލާމް ބުނީ، އެމްޓީއެފްއީ އަކީ ސްކޭމް އެއްކަން މިހާރު ޔަގީންވެފައިވާ ކަމަށެވެ.

”ޙަޤީޤަތުގައި އެމީހުންގެ ވާރޗުއަލް ޓްރޭޑިންގ މާޙައުލަކީ އަޅުގަނޑުމެންގެ ފައިސާ ވަގަށް ނެގުމަށް ހަދާފައި އޮތް އެއްޗެއް." އޭނާ ބުންޏެވެ.

އެމެރިކާގެ ސެޓިފައިޑް ފްރޯޑް އެގްޒެމިނަރުންގެ އެސޯސިއޭޝަންގެ މެމްބަރެއް ކަމުގައިވާ މޭޖަރ މުޙައްމަދު ޝަމްސުއްޒޮހާ (ރިޓަޔަރޑް) ވިދާޅުވެފައިވާ ގޮތުން އެ ޕޮންޒީ ޕްލެޓްފޯމުން އެއްވެސް ޤާނޫނީ މުޢާމަލާތެއް ނުކުރެއެވެ. އަދި އޭގެ ވެރިންނާއި މެނޭޖްމަންޓް ޓީމް ވެސް އެއްވެސް މީހަކަށް ނޭނގޭ ކަމަށާއި، އެހެން ނަމަވެސް މީހުން އަވަސް ފައިދާއެއް ހޯދުމުގެ އުންމީދުގައި މިފަދަ ސްކޭމް ތަކުގައި ޖެހެމުންދާ ކަމަށް އޭނާ ވިދާޅުވިއެވެ. 

މި ޕޮންޒީ ސްކީމްގެ ސަބަބުން ގިނަ ބަޔަކަށް ލައްކައިން ގެއްލުން ވެފައިވާ ކަމަށް ބަންގްލަދޭޝްގެ ނޫސްތަކުން ބުނެފައިވެއެވެ.