އައިޖީއެމްއެޗަށް، ނިމިދިޔަ 10 އަހަރު ދުވަހުގެ ތެރޭގައި އިތުރު ނުކުރެވޭހާ ގިނަ އަދަދަކަށް މި އަހަރު އެކަނި އެނދު އިތުރު ކޮށްފައިވާ ކަމަށް ހެލްތް މިނިސްޓަރު އަބްދުالله ނާޒިމް އިބްރާހީމް ވިދާޅުވެއްޖެއެވެ.

އެސްއެސް ޓީވީގެ 'ބާރު ހަތަރެއް' ޕްރޮގްރާމުގައި ވާހަކަ ދައްކަވަމުން ނާޒިމް ވިދާޅުވީ، ހޮސްޕިޓަލްތަކުގައި ކިޔު ދިގުވާ މައްސަލަ އަކީ ބޮޑު ކަމަކަށްވާއިރު، އެކަން ހައްލުކުރުމަށް، ޑޮކްޓަރުން ބަލިމީހުން ބަލާ ވަގުތު އިތުރުކުރަން ޖެހޭ ކަމަށެވެ. އެކަމަށްޓަކައި އައިޖީއެމްއެޗުގެ އޯޕީޑީގެ ޚިދުމަތް ދެދަންފަޅިއަށް ބަހާލައިގެން ކުރިއަށް ގެންދާކަން ނާޒިމް ފާހަގަކުރެއްވިއެވެ. 

ކިޔު ކުޑަކުރުމަށް ދެން ކުރަންޖެހޭ ކަމަކީ، އަތޮޅު ތެރޭގައި ދެވޭ ސިއްޙީ ޚިދުމަތްތައް އިތުރަށް ރަނގަޅު ކުރުން ކަމަށާ، އަދި ހޮސްޕިޓަލުގެ ކެޕޭސިޓީ އިތުރުކުރުމަކީވެސް ކުރަންޖެހޭ ކަމެއް ކަމަށް ނާޒިމް ވިދާޅުވިއެވެ.

ނާޒިމް ވިދާޅުވީ މިފަހުންވެސް އައިޖީއެމްއެޗަށް 75 އެނދުގެ ވާޑެއް އިތުރުކުރެވިފައިވާ ކަމަށެވެ. 

ނާޒިމް އިތުރަށް ވިދާޅުވީ އައިޖީއެމްއެޗްގެ ކިއު ކުޑަކުރުމަށް ކުރަމުންދާ މަސައްކަތްތައް ދަނީ ރަނގަޅު މިސްރާބަކަށް ކަމަށާ، އެގޮތުން ހޮސްޕިޓަލަށް އިތުރު މުވައްޒަފުން ހޯދުމުގެ މަސައްކަތްވެސް މިހާރު ކުރެވެމުންދާ ކަމަށެވެ. 

މިނިސްޓަރު ވިދާޅުވީ ޚިދުމަތް ދޭ މީހުންގެ އަދަދު އިތުރުވުމާއި ޖާގައިގެ ތަނަވަސްކަން އިތުރުވުމުގެ އިތުރުން ޚިދުމަތްދޭ ގޮތަށް ގެންނަ ބަދަލާއެކު އައިޖީއެމްއެޗްގެ ކިއުއަށް ކުރިއަށް އޮތްތަނުގައި ލުއި ލިބިގެންދާނެ ކަމަށެވެ.