އަދުގެ ސަރުކާރުގެ ބޯހިޔާވަހިކަމުގެ އެންމެ ބިޔަ މަޝްރޫޢު ކަމަށްވާ ރަސްމާލެ ހިއްކުމުގެ މުއާމަލާތުގައި ސީއެމްސީސީން، އެމްޓީސީސީއަށް 1.6 މިލިއަން ޑޮލަރު ދޭން ޖެހިއްޖެއެވެ.

ރަސްމާލެ ހިއްކުމުގެ މަސައްކަތް ސަރުކާރުން ހަވާލުކުރީ ލަންކާގެ ކުންފުންޏެއްކަމަށްވާ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އެވެ. ރަސްމާލެ ހިއްކުމުގެ މަޝްރޫޢުގައި ސީއެމްސީސީން ވަނީ އެމްޓީސީސީ ލައްވައި 10 ހެކްޓަރުގެ ބިން ހިއްކާފައެވެ. އެމްޓީސީސީން އެބިން ހިއްކާފައިވަނީ 2023 ވަނަ އަހަރެވެ.

އެމްޓީސީސީން ވަނީ އެކުންފުނިން ބިން ހިއްކުމުގެ މަސައްކަތަށްވާ އަގު ސީއެމްސީސީން ނުދެއްކުމުން އެ މައްސަލަ މިދިޔަ އަހަރުގެ ޑިސެމްބަރުމަހު ސިވިލްކޯޓަށް ހުށަހަޅާފައެވެ. އެމްޓީސީސީން ސީއެމްސީސީގެ މައްޗަށް ދައުވާކޮށްފައިވަނީ ބިން ހިއްކުމުގެ މަސައްކަތުގެ އަގަށްވާ 1،683،901.44 ޑޮލަރު ހޯދާށެވެ. ކޯޓުގައި ސީއެމްސީސީން ވަނީ އެ ފައިސާއަކީ އެކުންފުނިން އެމްޓީސީސީއަށް ދައްކަންޖެހޭ ފައިސާއެއްކަމަށްވެސް އިއުތިރާފް ވެފައެވެ.

ސިވިލްކޯޓުން ހުކުމް ކުރީ 10 ހެކްޓަރުގެ ބިންހިއްކުމުގެ އަގަށްވާ 1.6 މިލިއަން ޑޮލަރު މިއަދުން ފެށިގެން 30 ދުވަހުގެ ތެރޭގައި އެ ކޯޓަށް ދައްކައި ހަލާސްކުރުމަށެވެ. 

ރަސްމާލެ މަޝްރޫޢުގެ ބިން ހިއްކަން ފަށާފައިވަނީ 2023 ވަނަ އަހަރުގެ ޑިސެމްބަރުމަހުގެ 18 ވަނަ ދުވަހުއެވެ. މި މަޝްރޫޢުއަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނައުމަށް މި ސަރުކާރުން ފެށި އެންމެ މުހިންމު މަޝްރޫޢުއެވެ. އަދި މިއީ ބޯހިޔާވަހިކަމަށް ރާއްޖޭގައި މިހާތަނަށް ކުރިއަށްގެންދާ އެންމެ ބިޔަ މަޝްރޫޢުއެވެ 

ރަސްމާލެ މަޝްރޫޢުގެ ދަށުން ހިއްކާ ބިމުން 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ޕްލޭނުގައި ހިމަނާފައިވާއިރު އެ މަސައްކަތުގެ ތެރެއިން ގާތްގަނޑަކަށް، 75،000 ޢާއިލާއަކަށް ބޯހިޔާވަހިކަން ކަށަވަރުވެގެންދާނޭކަމަށް ސަރުކާރުން ވަނީ ބުނެފައެވެ. ގެދޮރުވެރިކަމުގެ އިތުރުން، ފުށިދިއްގަރުފަޅު ޕްލޭންކޮށް ތަރައްގީ ކުރެވިގެންދާނީ ވިޔަފާރިތަކަށާއި އިންޑަސްޓްރިއަލް އެކި ބޭނުންތަކަށް އަދި ޓޫރިޒަމްގެ އެކި ބާވަތްތައް ވެސް ހިމަނައިގެންނެވެ.