މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން، ވެލާނާ އިންޓަރނޭޝަނަލް އެއާޕޯޓުގެ އައު ޕަސިންޖަރ ޓަރމިނަލް ހުޅުވުމުގެ ކައުންޓްޑައުން، ރަސްމީކޮށް ފަށައިފިއެވެ.

އައު ޓަރމިނަލް ހުޅުވުމުގެ ކައުންޓްޑައުން ރޭ ދަންވަރު 00:00ގައި ރަސްމީކޮށް ފައްޓަވައިދެއްވެވީ އެމް.އޭ.ސީ.އެލްގެ މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ. މިރަސްމިއްޔާތުގައި އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ލަމްޢާން އަދި މުޖުތަބާ ލަތީފްގެ އިތުރުން އެ ކުންފުނީގެ މެނޭޖްމެންޓްގެ އިސް ބޭފުޅުން ބައިވެރިވެ ވަޑައިގެންފައިވެއެވެ. 

1960 ވަނަ އަހަރު ދަގަނޑު ފިލާތަކެއް ބޭނުންކޮށްގެން ހެދި ރަންވޭގެ މައްޗަށް އެންމެ ފުރުތަމަ މަތިންދާބޯޓެއް ޖެއްސުމަށް ދިވެހިން ކުރި ޤައުމީ މަސައްކަތް ހަނދާން އާކޮށްދެއްވައި ވާހަކަފުޅު ދައްކަވަމުން ޝަރީފް ވިދާޅުވީ އެމް.އޭ.ސީ.އެލްގައި މިވީ މަދު ދުވަސްކޮޅުގެ ތެރޭގައި އެ ކުންފުނީގެ މުވައްޒަފުންގެ ހިތްވަރާއި ކެރުމާއި އަދި ކަމަކަށް ކުރިމަތިލައިފިނަމަ އެކަމެއް ނިންމުމާއި މެދު އޮންނަ ޔަގީންކަމާއިމެދު އެއްވެސް ޝައްކެއް ނުކުރައްވާކަމަށެވެ.

 އެމް.އޭ.ސީ.އެލްގެ މެނޭޖިންގ ޑިރެކްޓަރ އިބްރާހީމް ޝަރީފް ވާހަކަދައްކަވަނީ... ފޮޓޯ: އެމްއޭސީއެލް

ރާއްޖޭގެ ވައިގެ ދަތުރުފަތުރުކުރުމުގެ ސިނާއަތަށް ބޮޑެތި ކުރިއެރުންތަކެއް ގެންނާނެ މި ޓަރމިނަލަކީ ޒަމާނީ ފެންވަރަށް ވެލާނާ އިންްޓަނޭޝަނަލް އެއަރޕޯޓް (ވީ.އައި.އޭ) ތަރައްގީކުރުމަށް ކުރިއަށްގެންދާ މަޝްރޫއުތަކުގައި ހިމެނޭ އެންމެ މުހިއްމު އެއް މަޝްރޫއު ކަން ޝަރީފްގެ ވާޙަކަފުޅުގައި ވަނީ ފާހަގަކުރައްވާފައެވެ.

އެންމެފަހުގެ ޓެކްނޮލޮޖީގެ ވަސީލަތްތަކާއި އެކު މި ޓަރމިނަލް ހުޅުވިގެން ދިއުމުގެ ސަބަބުން ރާއްޖޭގެ އިގްތިސާދަށް ހާއްސަގޮތެއްގައި ފަތުރުވެރިކަމަށާއި ދަތުރުފަތުރުކަމުގެ ދާއިރާއަށް ބޮޑެތި ކުރިއެރުންތަކެއް ގެނުވާނެއެވެ.

ވެލާނާ އިންޓަރނޭޝަނަލް އެއާޕޯޓު (ވީ.އައި.އޭ)ގެ އައު ޓަރމިނަލް ހުޅުވުމަށްވާންޖެހޭ އެންމެފަހުގެ ތައްޔާރީތައް ވަމުން އަންނައިރު، މި ޓަރމިނަލް ވެގެންދާނީ މިހާރު ބޭނުންކުރަމުން އަންނަ ޓަރމިނަލްއަށްވުރެ އެތައްގުންއެއް ބޮޑު، އަހަރެއްގެ މައްޗައް 7.5 މިލިއަން ދަތުރުވެރިންނަށް ހިދުމަތްދެވޭނެ ތަނަވަސް ޓަރމިނަލަކަށެވެ. އެގޮތުން، އެއިރޯ ބްރިޖާއި، ސެލްފް ޗެކިންގ ސިސްޓަމާއި، އޮޓޯމެޓިކް ބެގޭޖް ހޭންޑްލިންގ ސިސްޓަމްގެ އިތުރުން އެޑްވާންސް ވިޝުއަލް ޑޮކިންގ ގައިޑެންސް ސިސްޓަމްތަކުގެ ހިދުމަތް އައު ޓަރމިނަލުން ލިބިގެންދާނެއެވެ.