ރާއްޖޭގައި މަތީ އަރުތަވެރިންގެ ގިންތީގައި ހިމެނޭ ދަރިވަރުންގެ އަދަދު ނިސްބަތުން މަދުކަމަށް ތަޢުލީީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ޑރ. ޝަފީޢު މިހެން ވިދާޅުވެފައިވަނީ، މިއަދު ބޭއްވުނު މަތީ އަރުތަވެރިންގެ އިނާމު ދިނުމުގެ ރަސްމިއްޔާތުގައި ވާހަކަފުޅުދައްކަމުންނެވެ. ވަޒީރު ވިދާޅުވެފައިވަނީ ތައުލީމީ ދާއިރާ ކުރިއެރުވުމަށް އެތަކެއް މަސައްކަތްތަކެއް ކުރަމުންދާ ކަމަށެވެ. އަދި ހަމައެހެންމެ މުދައްރިސުންނާއި ބެލެނިވެރިން ގިނަ މަސައްކަތްތަކެއް ކުރަމުންދާ ނަމަވެސް ދާން ބޭނުންވާ މަންޒިލަށް އަދިވެސް ނުދެވޭކަމަށް ޑރ. ޝަފީޢު ވިދާޅުވިއެވެ. ތައުލީމީ ދާއިރާގެ ތަފާސްހިސާބުތަކުގެ މައްޗަށް އަލިއަޅުވައި ވާހަކަފުޅު ދައްކަވަމުން މިނިސްޓަރު ވަނީ އޯލެވެލް އިމްތިހާނުތަކުގައި ބައިވެރިވަމުން އަންނަ ގިނަ ދަރިވަރުން 5 މާއްދާއިން ފާސްނުވާކަންވެސް ފާހަގަކުރައްވާފައެވެ.

އެގޮތުން 2013 ވަނަ އަހަރާއި 2014 ވަނަ އަހަރުގެ އޯލެވެލް އިމްތިހާނުގައި ބައިވެރިވި 50 އިންސައްތައަށްވުރެ ގިނަ ދަރިވަރުން 5 މާއްދާއިން ފާސްވެފައި ނުވާކަން ވަނީ ފާހަގަކުރައްވައި ވަޒީރު ވިދާޅުވީ، މިދިޔަ ދެ އަހަރުވެސް ފެނިގެންދިޔައީ ހަމަ އެމަންޒަރު ކަމަށެވެ. އޯލެވެލްގެ އިމްތިހާނުގެ ނަތީޖާ ދަށްވުމަށް މެދުވެރިވާ މައިގަނޑު ސަބަބެއްކަމަށް ވަޒީރު ޝަފީއު ފާހަގަކުރެއްވީ ޕްރައިމަރީ މަރުހަލާގެ ނަތީޖާ ދަށްވުމެވެ. 

ވަޒީރު ވިދާޅުވީ ދައުލަތުން ތައުލީމީ ދާއިރާއަށް ފައިސާ ހަރަދުކުރަމުންދާއިރު އެކަށީގެންވާ ނަތީޖާއެއް ނުފެންނަކަށާއި މި ހަގީގަތް ގަބޫލުކޮށްގެން ނޫނީ ދަރިވަރުންގެ ނަތީޖާ އިތުރު ހަރުފަތަކަށް ނުޖެއްސޭނެކަމަށެވެ.

މުދައްރިސުންގެ ޕްރޮޕެޝަނަލް ޑިވެލޮޕްމަންޓުތަކަށް މަސައްކަތްތަކެއް ކުރެވެމުންދާކަމަށާއި އަދި ސްކޫލްތަކުގެ ހިންގުން އިތުރަށް ހަރުދަނާކުރުމުގެ ގޮތުން ރާއްޖޭގެ ހުރިހާ ސްކޫލްތަކެއްގެ ޕްރިންސިޕަލުންނަށް ލީޑަރޝިޕް ޓްރެއިނިން ދިނުމުގެ އިތުރުން ކަރިކިއުލަމާއި ކޮންޓެންޓަށް ގެންނަން ޖެހޭ މުހިއްމު ބަދަލުތައް ގެންނަމުންދާކަމަށް ވެސް ޑރ. ޝަފީޢު ވިދާޅުވިއެވެ.