އަދުގެ ސަރުކާރު ބަލިކޮށްލެވޭނެ ކޮންމެ ފޯމިއުލާއަކަށް ތިބެންވާނީ ތައްޔާރުވެގެން ކަމަށާއި، އަމާޒު ހުންނަން ވާނީ މުސްތަޤްބަލަށްކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އިދިކޮޅު އެންމެ ބޮޑު ޕާޓީ އެމްޑީޕީގެ ފަރާތުން ފުވައްމުލައް ސިޓީގައި ބޭއްވި ޖަލްސާގައި ޝާހިދު ވަނީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ލާމަރުކަޒީ ގާނޫނަށް ބަދަލުގެނެސް، ކައުންސިލަރުންގެ އަދަދު މަދުކުރަން ސަރުކާރުން އުޅެނީ ހަރަދު ކުޑަކުރާކަށް ނޫންކަމަށާއި، މަދުވާ އަދަދަށް ސްޓޭޓް މިނިސްޓަރުކަމާއި ޑެޕިއުޓީ މިނިސްޓަރުކަން ދޭނެކަމަށް ޝާހިދު ވިދާޅުވިއެވެ. އަދި ކައުންސިލްތަކުގެ އަގު ވައްޓާލުމާއި ކައުންސިލްތަކުގެ ބާރުތައް ހަނިކުރުމަށް ސަރުކާރުން ނިކުމެ އޮތީ އަންނަ އަހަރު އޮންނަ ލޯކަލް ކައުންސިލް އިންތިޚާބުން ސަރުކާރު ބަލިވާނެކަން އެނގޭތީކަމަށެވެ.

އަދި ކައުންސިލްތަކުގެ އަގު ވައްޓާލަން ސަރުކާރުގެ އެންމެ އިސްވެރިޔާ ނިކުމެ އެ ހުންނެވީ ގޮތް ހުސްވީމާކަމަށް ވިދާޅުވެ، ޝާހިދު ވަނީ ރައީސް ޑރ. މުއިއްޒުއަށް ފާޑު ވިދާޅުވެފައެވެ.

ކުރީގެ ރައީސް މުހައްމަދު ނަޝީދާއި، ޑިމޮކްރެޓްސްގެ އެމްޑީޕީއަށް ބަޔަތު ހިފި ހިފުމާ ގުޅޭގޮތުން ޝާހިދު ވިދާޅުވީ މިއީ މާޒީ ދޫކޮށް ކުރިއަށްދާންވީ ވަގުތު ކަމަށާއި، އެމްޑީޕީއާ ޑިމޮކްރެޓްސް ގުޅިގެން ދިއުމަކީ އިސްލާހަށް ކުރާ މަސައްކަތްތަކަށް ލިބިގެންދިޔަ ވަރަށްބޮޑު ކުރިއެރުމެއްކަމަށެވެ. 

އެމްޑީޕީގެ ރައީސް ޢަބްދުﷲ ޝާހިދު އާއި އެޕާޓީގެ އިސް ބޭފުޅުންގެ ޓީމެއް ފުވައްމުލަކަށް ވައިގެންފައިވަނީ ޕާޓީގެ ހަރަކާތްތައް ހިންގުމުގައި އެރަށުގައި ތިބި މެމްބަރުންނާއެކު މަޝްވަރާކޮށްލުމަށެވެ. މީގެ އިތުރުން ކުރިއަށް އޮތް ލޯކަލް ކައުންސިލް އިންތިޚާބަށް ތައްޔާރުވުންވެސް އެމްޑީޕީގެ މި ދަތުރުގައި ހިމެނެއެވެ.