ރާއްޖޭގައި މުދައްރިސުން ލިބުމުގެ ދަތިކަން އެބަހުރިކަމަށް އެޑިއުކޭޝަން މިނިސްޓަރ ޑރ. އިސްމާއީލް ޝަފީއު ވިދާޅުވެއްޖެއެވެ.

ޑރ. ޝަފީއު މިފަދައިން ވިދާޅުވެފައިވަނީ މަތީ އަރުތަވެރިންގެ އިނާމު ދިނުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

މުދައްރިސުން ނުލިބުމުގެ މައްސަލައަކީ ރާއްޖޭގައި އަބަދުވެސް އޮންނަ މައްސަލައެއް ކަން ފާހަގަކުރައްވާ މިނިސްޓަރ ވިދާޅުވެފައިވަނީ ހަމައެކަނި ޕްރައިމަރީ ގްރޭޑްތަކަށް ބަލާލިކަމުގައި ވީނަމަވެސް 200 އެއްހާ މުދައްރިސުން ބޭނުންވާ ކަމަށާއި، އަދިހަމައެހެންމެ ނުކުޅެދުންތެރިކަން ހުންނަ ދަރިވަރުންނަށް ކިޔަވައިދިނުމަށް 600 މުދައްރިސުން ބޭނުންވާކަމަށެވެ.

މިނިސްޓަރ ފާހަގަކުރެއްވި ގޮތުގައި ރާއްޖޭގެ ސްކޫލްތަކުގައި ކިޔަވައިދޭ މުދައްރިސުން ތެރެއިން ބިދޭސީ މުދައްރިސުންނާ އެކުވެސް 77 އިންސައްތަ މުދައްރިސުންނަކީ އަންހެން މުދައްރިސުން ކަމަށާއި، ފިރިހެން މުދައްރިސުންގެ އަދަދަކީ އެންމެ 23 އިންސައްތަ ކަމަށެވެ. އަދި ހަމައެކަނި ދިވެހި ފިރިހެން މުދައްރިސުންގެ އަދަދަކީ އެންމެ 16 އިންސައްތަކަމަށް މިނިސްޓަރު ވަނީ ފާހަގަކުރައްވާފައެވެ.

މިނިސްޓަރ ވަނީ އޯ ލެވެލްގައި ނިންމި އަދި އޭ ލެވެލް ކިޔަވަމުނަދާ ދަރިވަރުން ތަޢުލީމީ ދާއިރާއަށް ވަނުމަށް އެދިވަޑައިގެންފައެވެ. ސަބަބަކީ މުދައްރިސުން ލިބުމުގެ ދަތިކަމަށް އޮތް ހައްލަކީ ރަނގަޅު ނަތީޖާ ހޯދާ ދަރިވަރުން ތައުލީމީ ދާއިރާއަށް މުދައްރިސުންނާއި، ޕްރިންސިޕަލުންނާއި ޕޮލިސީ މޭކަރުންގެ ގޮތުގައި ގުޅުން ކަމަށް މިނިސްޓަރ ވިދާޅުވިއެވެ.

ސަރުކާރުން ދަނީ ދަރިވަރުން އުނގެނުމަށް ފަހި މާހައުލެއް ބިނާކުރުމަށްޓަކައި ގިނަމަސައްކަތްތަކެއް ކުރަމުންނެވެ. ދައުލަތުން ތަޢުލީމީ ދާއިރާއަށް ބޮޑު ހޭދައެއް ކުރިނަމަވެސް، ތައުލީމީ ދާއިރާއިން ހާސިލުކުރަން ބޭނުންވާ ނަތީޖާ ހާސިލު ނުވާ ކަމަށް މިނިސްޓަރ ވަނީ ފާހަގަކުރައްވާފައެވެ.