ވާނުވާ ބަންދުގައި ތިބި 10 މީހަކު ޓެގް އެޅުވުމަށްފަހު ދޫކޮށްލައިފި
އިލެކްޓްރޯނިކް މޮނިޓަރިންގ ނިޒާމުގެ ދަށުން ޓެގް އަޅުވާ ބަންދަށް ލުއި ދިނުމަށްފަހު ވާނުވާ ބަންދުގައި ތިބި 10 މީހަކު، ބަންދުން ދޫކޮށްލައިފިއެވެ.
މި ނިޒާމުގެ ދަށުން ބަންދަށް ލުއި ދެވޭނެ މީހުން ކަނޑައަޅަމުން އަންނަނީ، އެ މީހުން މޮނިޓަރ ކުރެވޭ ގޮތަށް މުޖުތަމައު ތެރެއަށް ދޫކޮށްލައިފިނަމަ، މުޖުތަމައުގެ ސަލާމަތާއި ރައްކާތެރިކަމަށް އޮތް ނުރައްކާ ދެނެގަތުމަށް ދިވެހި ފުލުހުންގެ ޚިދުމަތުން ތައްޔާރުކުރާ އެސެސްމަންޓަށް ރިޢާޔަތްކޮށް ކަމަށާއި މި އެސެސްމަންޓުތައް ޕީޖީ އޮފީހަށް ލިބެމުންދާ ވަރަކުން ބަންދަށް ލުއި ދިނުމުގެ ކަންކަން ކުރިއަށްގެންދެވޭނެ ކަމަށް ޕީޖީ އޮފީހުން ވަނީ ބުނެފައެވެ.
މި މައްސަލައަށް ހައްލެއް ގެނައުމުގެ ގޮތުން މިދިޔަ މެއި މަހުން ފެށިގެން ވާނުވާ ބަންދުގައި ތިބޭ މީހުންނަށް ލުއި ދިނުމުގެ ގޮތުން ބަލަންޖެހޭ ކަންކަން ބެލުމަށްފަހު، ބަންދުގައި ތިބޭ މީހުން ޓެގު އެޅުވުމަށްފަހު ބަންދުން ދޫކުރުމުގެ މަސައްކަތް މިހާރު ފަށާފައިވާ ކަމަށް ޕީޖީ އޮފީހުން މީގެ ކުރިން ވަނީ ބުނެފައެވެ.
ޓެގުއެޅުވުމަށްފަހު ވާނުވާ ބަންދުގައި ތިބޭ މީހުން ދޫކުރަނީ ކޯޓުން ކަނޑައަޅާ ވަކި ޝަރުތުތަކަށް ރިޢާޔަތްކޮށެވެ. މި ނިޒާމުގެ ދަށުން ބަންދަށް ލުއި ދީފައިވާ މީހުންގެ ޝަރުތުތައް ކޮންމެ 100 ދުވަހަކުން އެއް ދުވަހު ޕީޖީ އޮފީހުން ކޯޓަށް ހުށަހެޅުމުން ކޯޓުން އެކަންކަން މުރާޖައާ ކުރާނެއެވެ.
އިލެކްޓްރޯނިކް މޮނިޓަރިންގ ނިޒާމުގެ ދަށުން ޓެގް އެޅުވުމަށްފަހު ބަންދަށް ލުޔަށް އެދޭ ފަރާތްތަކުން ޕްރޮސެކިއުޓަރ ޖެނެރަލްގެ އޮފީހަށް ސަބަބާއިއެކު ހުށަހެޅުމުން ޕްރޮސެކިއުޓަރ ޖެނެރަލްގެ އޮފީހުން އެކަން ކުރިއަށް ގެންދާނެއެވެ.
Advertisement
This content is created and paid for by advertisers and does not involve Voice Journalists
