މޯލްޑިވްސް ޓްރާންސްޕޯޓް ކޮމްޕެނީ ލިމިޓެޑް (އެ.މް.ޓީ.ސީ.ސީ) އިން ބ. ހިތާދޫ ބަނދަރު ތަރައްޤީ ކުރުމުގެ މަސައްކަތުގެ ބޮޑުބައި ނިންމާލައިފިއެވެ.

އެމް.ޓީ.ސީ.ސީން ބުނެފައިވާ ގޮތުގައި ހިތާދޫ ބަނދަރު ތަރައްޤީކުރުމުގެ މަޝްރޫޢުގެ %70 މިހާރުވަނީ ނިމިފައެވެ. އެގޮތުން އެރަށު ބަނދަރުގެ އެއްގަމު ތޮށީގެ މަސައްކަތުގެ އިތުރުން ބަނދަރު ފުންކުރުމުގެ މަސައްކަތް ވަނީ ނިންމާލައިފައި ކަމަށް އެމް.ޓީ.ސީ.ސީ އިން ވަނީ ބުނެފައެވެ.

މި މަޝްރޫއު ނިންމުމަށް އެކުންފުންޏަށް ހަވާލުކޮށްފައިވަނީ ޖުމުލަ 17.7 މިލިއަން ރުފިޔާއަށެވެ. މި މަޝްރޫއުގެ ދަށުން 22 މީޓަރުގެ ސަރަޙައްދެއްގައި ގްރޮއިން ޖެހުމާއި، 495 މީޓަރުގެ ސަރަޙައްދެއްގައި ބޭރުތޮށި ލުމާއި، 90 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 350 މީޓަރުގެ ސަރަޙައްދެއްގެ އެއްގަމުތޮށި މަރާމާތުކުރުން ހިމެނެއެވެ.

މީގެ އިތުރުން، 1750 އަކަ މީޓަރުގެ ސަރަޙައްދެއްގައި ބަނދަރުގެ ޕޭވްމަންޓް ހެދުމާއި، ރޭމްޕް ހެދުމާއި، ކޮންކްރީޓް ޕްލެޓްފޯމެއް ހެދުމުގެ އިތުރުން ނެރު ބައްތިއާއި ބަނދަރު ބައްތި ހަރުކުރުމުގެ މަސައްކަތްވެސް މި މަޝްރޫޢުގެ ދަށުން ކުރިއަށް ދާނެއެވެ. އެކުންފުނިން ބުނެފައިވާ ގޮތުގައި މިވަގުތު މި މަޝްރޫއުގެ ދަށުން ކުރިއަށްދަނީ ބްރޭކްވޯޓަރުގެ ޕްރޮފައިލިންގ މަސައްކަތާއި ކުއޭ ވޯލް ޑިޒައިންކޮށް އިމާރާތް ކުރުމުގެ މަސައްކަތެވެ.

ފާހަގަކޮށްލެވޭ ގޮތުގައި ހިތާދޫ ބަނދަރަކީ މަސްވެރިކަމަށް ބޭނުންކުރާ ބޮޑެތި އުޅަނދުތަކަށް ވެސް ބޭނުން ކުރަމުންއަންނަ ބަނދަރެކެވެ.