ދެން އޮންނަ ރިޔާސީ އިންތިހާބުގައި ވާދަކުރައްވަން ރައީސް ސޯލިހު ނިންމަވައިފި
ދެން އޮންނަ ރިޔާސީ އިންތިހާބުގައި ވާދަކުރައްވަން ޝައުގުވެރިކަން ފާޅު ކުރައްވާ އެމްޑީޕީގެ ރިޔާސީ ޓިކެޓް ހޯއްދެވުމަށް އެ ޕާޓީގެ ޕްރައިމަރީގައި ވާދަކުރައްވަން ކުރީގެ ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.
އެމަނިކުފާނު މި ނިންމެވުން ހާމަކުރެއްވީ ވަފާތެރި މެންބަރުންނާއެކު މިރޭ ބޭއްވެވި ރޭގަނޑުގެ ފަރިއްކޮޅެއްގަ އެވެ. ރައީސް ސޯލިހްގެ މި ނިންމެވުމުން މެންބަރުންނާއި ހިއްސާކުރެއްވީ އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު އެވެ. މުހައްމަދާއި ރައީސް ސޯލިހަކީ ދެ ޅިޔަނުންނެވެ.
މިދިޔަ ރިޔާސީ އިންތިހާބުގައި ސޯލިހްގެ ރަނިންމޭޓަކަށް އިހްތިޔާރު ކުރެއްވި މަޖިލީހުގެ ކުރީގެ ރައީސް މުހައްމަދު އަސްލަމާއި އެމަނިކުފާނުގެ ކެބިނެޓް ބައެއް މެންބަރުން ވެސް މިރޭގެ ފަރިއްކޮޅުގައި ބައިވެރިވެވަޑައިގެންނެވި އެވެ.
ރިޔާސީ އިންތިހާބުގައި ވާދަކުރައްވަން ޝައުގުވެރިކަން ފާޅު ކުރައްވާ އެމްޑީޕީގެ ރިޔާސީ ޓިކެޓް ހޯއްދެވުމަށް އެ ޕާޓީގެ ޕްރައިމަރީގައި ވާދަކުރައްވަން ކުރީގެ ރައީސް އިބްރާހިމް މުހައްމަދު ސޯލިހު މި ނިންމެވީ ރިޔާސީ ރޭހަށް ޝައުގުވެރިކަން ފާޅުކުރައްވާ ކުރީގެ ރައީސް މުހައްމަދު ނަޝީދު މާދަމާ ރޭ އެމްޑީޕީއާ އަލުން ގުޅިވަޑައިގަތުމަށް ބޮޑު ހަފްލާއެއް ބާއްވަން ތައްޔާރު ވަމުން ދަނިކޮށެވެ.
2023 ގެ ރިޔާސީ އިންތިހާބުގައި ވެސް އެމްޑީޕީގެ ޓިކެޓް ހޯއްދެވުމަށް ރައީސް ސޯލިހާއި ރައީސް ނަޝީދު ވާދަކުރެއްވި އެވެ. އެ ފަހަރު ޓިކެޓް ހޯއްދެވީ ރައީސް ސޯލިހެވެ.
އޭގެ ފަހުން ދެ ރައީސުންގެ ގުޅުން މުޅީން ކެނޑި ނަޝީދު އެމްޑީޕީން ވަކިވެވަޑައިގަތެވެ. ސޯލިހަަށް ދެވަނަ ދައުރެއް ލިބިވަޑައިގަތުމަށް އެންމެ ބޮޑަށް ހުރަސްއެޅުއްވީ ނަޝީދާއި އެމަނިކުފާނުގެ ދަ ޑިމޮކްރެޓްސްގެ މެންބަރުންނެވެ.
އެމްޑީޕީގެ ރިޔާސީ ޓިކެޓް ހޯދުމަށް އެ ޕާޓީގައި ވެސް ބޮޑު ވާދައެއް އެބަ އޮތެވެ. ނަޝީދު ވެސް ބޭނުންފުޅު ވަނީ އެމްޑީޕީގެ ޓިކެޓް ކަމަށް ބެލެވެ އެވެ. 2028 ގެ އިންތިހާބަށް އެމްޑީީޕީގެ ޓިކެޓް ހޯއްދެވުމަށް އެ ޕާޓީގެ ޗެއާޕާސަން ފައްޔާޒް އިސްމާއީލް އާއި އެމްޑީޕީގެ ރައީސް ޝާހިދުގެ އިތުރުން ހުޅުމާލެ ދާއިރާގެ މެންބަރު ޑރ. ޖަމްޝީދު ވެސް ޝައުގުވެރިވެ އެވެ.
Advertisement
This content is created and paid for by advertisers and does not involve Voice Journalists
