މެދުއިރުމަތީގެ މަސްރަހް މިވަގުތު އޮތްގޮތުން މިހާލަތުގައި ރާއްޖެއަށް ކޮށްފާނެ އަސަރުތައް ވަރަށް ގާތުން ބަލަމުންދާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ، މެދުއިރުމަތީގެ ހާލަތަށް އަންނަމުންދާ ބަދަލުތަކުގެ ސަބަބުން ރާއްޖޭގެ އިގްތިސާދަށް ކޮށްފާނޭ ނޭދެވޭ އަސަރުތައް ދެނެގަތުމަށް މަސައްކަތްކުރަމުން އަންނަކަމަށެވެ. އެގޮތުން ހަކަތައިގެ ގޮތުގައި ބޭނުންކުރާ ތެލުގެ ބާވަތްތަކާއި ކާބޯތަކެތީގެ އަގުތަކަށް އައިސްދާނެ ބަދަލުތައް ވަރަށް ރަނގަޅަށް ވިލަރެސްކުރަމުން އަންނަކަމަށް ވަޒީރު ވިދާޅުވިއެވެ.
އަދި އެކަމުގެ ސަބަބުން ރާއްޖޭގެ ބާޒާރުގައި ތަކެތީގެ އަގުތަކަށް އަތުވެދާނޭ ބަދަލުތައް ދެނެގަތުމުގެ މަސައްކަތް ކަމާބެހޭ މުއައްސަސާތަކާއެކު ކުރަމުން އަންނައިރު، މިކަމުގެ ތަކުލީފް ދިވެހިންނަށް އުފުލަން ނުޖެހޭނެ ގޮތަކަށް ސަރުކާރުން ކަންކަން އިންތިޒާމް ކުރަމުންގެންދާނޭ ކަމަށްވެސް ވަޒީރުގެ ޕޯސްޓްގައި ވަނީ ފާހަގަކުރައްވާފައެވެ.
މެދުއިރުމަތީގެ މަޝްރަހު ހޫނުވާން ފަށާފައިވަނީ އީރާނުން ނިއުކްލިއާ ހަތިޔާރު އުފައްދާކަމަށް ތުހުމަތުކޮށް އިޒްރާއީލުން އީރާނަށް އިސްވެ ހަމަލާތައްދޭން ފެށުމާ ގުޅިގެންނެވެ. އަދި މަޝްރަހް އިތުރަށް ގޯސްވެފައިވަނީ، ބައެއް އަރަބިގައުމުތަކާ ގުޅިގެން އެމެރިކާއިން އެޤައުމުތަކުގައި ގާއިމްކޮށްފައިވާ އަސްކަރީ މަރުކަޒުތަކުގެ އެހީގައި އީރާނަށް ވައިގެ މަގުން ހަމަލާތައް ދިނުމުންނެވެ. އޭގެ ރައްދުގައި އީރާނުން ރޭ ވަނީ ޤަތަރުގައި ހުންނަ އެމެރިކާގެ އަސްކަރީ މަރުކަޒަކަށް މިސައިލް ހަމަލާތަކެއްދީފައެވެ.
Advertisement
This content is created and paid for by advertisers and does not involve Voice Journalists
