ރަޝިޔާއިން ޔޫކްރެއިންގެ ވެރިރަށް ކީވްއަށް ވަރުގަދަ ޑްރޯން ހަމަލާތަކެއްދީފި
ރަޝިޔާއިން ޔޫކްރެއިންގެ ވެރިރަށް ކީވްއަށާއި ކީވްގެ ވަށައިގެންވާ އެހެނިހެން ސަރަހައްދުތަކަށް އަމާޒުކޮށް ވަރުގަދަ ޑްރޯން ހަމަލާތަކެއް ދީފިއެވެ.
ޔޫކްރެއިންގެ މީޑިޔާތަކުގައި ރިޕޯޓްކޮށްފައިވާ ގޮތުގައި މިހަމަލާއަކީ މިހަފްތާ ފެށުނުފަހުން ރަޝިޔާއިން އެޤައުމަށް ދީފައިވާ އެންމެ ނުރައްކާތެރި އެއް ހަމަލާއެވެ. އެގޮތުން ރަޝިޔާއިން ވަނީ 352 ޑްރޯންގެ އިތުރުން 11 ބެލިސްޓިކް މިސައިލް ހަމަލާ ޔޫކްރެއިންއަށް ދީފައިވާ ކަމަށާއި އިމާރާތްތަކަށް ވެސް އިއާދަ ނުކުރެވޭވަރުގެ ބޮޑެތި ގެއްލުން ލިބިފައިވާކަމަށް ޔޫކްރެއިންގެ އެއރ ފޯސްއިން ވަނީ ބުނެފައެވެ.
އިއްޔެގެ މިހަމަލާތަކުގައި ޔޫކްރެއިންގެ 10 މީހަކު މަރުވެފައިވާ ކަމަށާއި އެތަކެއްބަޔަކު ޒަހަމްވެފައިވާ ކަމަށް ވެސް ޔޫކްރެއިންގެ މީޑިޔާތަކުން ވަނީ ރިޕޯޓްކޮށްފައެވެ.
ޔޫކްރެއިންގެ އަސްކަރިއްޔާގެ އިސްފަރާތެއް ކަމުގައިވާ ޓްކަޗެންކޯ ބުނެފައިވާ ގޮތުގައި ރަޝިޔާ އިން ދަނީ އާންމުންނަށާއި، މީހުން ދިރިއުޅޭ އެޕާޓްމެންޓްތަކަށާއި، ޓްރެއިން ސްޓޭޝަންތަކަށް އަމާޒުކޮށް ހަމަލާ ދެމުންނެވެ. މިއީ ގަސްތުގައި ރަޝިޔާއިން ހިންގަމުންދާ ޖަރީމާއެއްކަމަށް ވެސް އޭނާ ވަނީ ބުނެފައެވެ.
ފާހަގަކޮށްލަންޖެހޭ ގޮތުގައި ރަޝިޔާއިން ދަނީ މިހަނގުރާމާގައި އަސްކަރީ ގޮތުން އެތަކެއް ކާމިޔާބީތަކެއް ހޯދަމުންނެވެ. އެގޮތުން މިހާރު ރަޝިޔާއިން ވަނީ ޔޫކްރެއިންގެ ގިނަ ރަށްތަކަކަށް އަތްގަދަކުރުމުގެ އޮޕަރޭޝަނެއްވެސް ފަށައިފައެވެ.
Advertisement
This content is created and paid for by advertisers and does not involve Voice Journalists
