އައްޑޫ ކެތު ލެބުގެ ހިދުމަތް ހަތަރު މަސް ތެރޭގައި ފެށޭނެ ކަމަށް ސިއްޙަތާއި ބެހޭ ވަޒީރު އަބްދުالله ނާޒިމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން މަރުޒޫޤް ވަނީ، އައްޑޫ އިކުއެޓޯރިއަލް ހޮސްޕިޓަލުގައި ގާއިމްކުރެވިފައިވާ ކެތަޓަރައިޒޭޝަން ލެބޯޓަރީގެ ޚިދުމަތް ދިނުން ލަސްވާ ސަބަބާއި އެ ތަނުގެ ޚިދުމަތް ދެވެން ފެށޭނެ ތާރީޚު ސާފުކޮށްދެއްވުން އެދި ވަޒީރާ ސުވާލުކުރައްވާފައެވެ.
އެ ސުވާލުގެ ޖަވާބު ލިޔުމުން ފޮނުއްވާފައިވާއިރު، ވަޒީރުގެ ޖަވާބު މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ.
އެގޮތުން ވަޒީރު ވިދާޅުވީ، ކެތު ލެބް ގާއިމް ކުރުމަށް އިކުއެޓޯރިއަލް ހޮސްޕިޓަލުގެ އިމާރާތަށް ގެންނަންޖެހޭ ބަދަލު ގެނެސް މެޝިނަރީ އިންސްޓޯލް ކުރުމާއި ގުޅުންހުރި މަސައްކަތްތަކުގެ 98 އިންސައްތަ ނިމިފައިވާ ކަމަށެވެ.
އަދި އެ ކެތު ލެބު ފުރިހަމަ ގޮތުގައި ހިންގާ ބެލެހެއްޓުމަށް ޝައުގުވެރިވާ ފަރާތްތައް ހޯދުމަށް މީހާރު އިއުލާން ކުރެވިފައިވާ ކަމަށާ، ޝައުގުވެރިވާ ފަރާތްތަކުގެ ތެރެއިން ހޮވާލެވޭ ފަރާތްތަކުގެ ޕްރޮޕޯސަލް ހޯދައި އެ ފަރާތްތަކާ ކެތުލެބް ހިންގުމުގެ ކަންކަން ހަވާލު ކުރެވޭނެ ކަމަށް ވަޒީރު ވިދާޅުވިއެވެ.
އެކަންކަން ނިމި، ހަތަރު މަހެއްހާ ދުވަހުގެ ތެރޭގައި ކެތު ލެބުގެ މަސައްކަތް ފެށޭނެ ކަމަށް ވަޒީރު ވިދާޅުވިއެވެ.
އޭއީއެޗްގެ ކެތު ލެބްގެ މަސައްކަތް ނިންމައިލީ 2023 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ. އެތަނުން ކޮރޮނަރީ އެންޖިއޯގްރަފީ އާއި އިންވޭސިވް އަދި ނޮން-އިންވޭސިވް ފަރުވާތައް ދެވޭނެކަމަށް ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
